Read Uzbek Muqaddas Kitob Ibtido 50 Bible Online

Ibtido 50 - Uzbek Muqaddas Kitob bible

Ibtido 50

¹Yusuf oʻzini otasining ustiga tashlab, yigʻlaganicha, uni oʻpdi.

²Yusuf qoʻl ostidagi tabiblarga: “Otamning jasadini mumiyolanglar!” deb amr berdi. Tabiblar Yoqubning[367] jasadini mumiyolashdi.

³Ular bu ish uchun qirq kun vaqt sarf qildilar. Chunki mumiyolash uchun shuncha vaqt talab qilinar edi. Misrliklar Yoqub uchun yetmish kun aza tutishdi.

⁴Aza muddati tugagach, Yusuf fir’avnning a’yonlari huzuriga kelib, dedi: — Agar men sizlarning iltifotingizga sazovor boʻlsam, fir’avn janobi oliylariga shu gaplarni yetkazsangizlar:

⁵“Otam menga qasam ichirib, olamdan oʻtganimdan keyin, jasadimni Kan’on yurtiga olib borib, oʻzim uchun men qazigan qabrga dafn qil, deb aytgan. Endi otamni dafn qilgani borishimga ijozat bersalar. Otamni dafn qilganimdan keyin qaytib kelaman.”

⁶— Mayli, boraver, — deb ijozat berdi fir’avn, — qasamni ado qilib, otangni dafn qilib kel.

⁷Shunday qilib, Yusuf otasini dafn qilgani joʻnadi. Fir’avnning hamma a’yonlari — saroyidagi amaldorlar, Misr yurtidagi barcha amaldorlar Yusuf bilan birga ketishdi.

⁸Shuningdek, Yusufning barcha oila a’zolari, aka — ukalari, otasining qolgan xonadoni ahli ham Yusuf bilan birga ketishdi. Faqat ularning bolalari, qoʻy — echkilari, podalari Goʻshen yerlarida[368] qoldirildi.

⁹Gʻoyat katta jamoa Yusufga hamroh boʻldi. U bilan bir talay aravakashlar va jang aravalari ham ketdi.

¹⁰Ular Iordan daryosi sharqidagi Otad degan xirmonga yetib keldilar. U yerda uzoq vaqt ogʻir ta’ziya marosimi oʻtkazdilar. Shunday qilib, Yusuf otasi uchun yetti kun aza marosimi oʻtkazdi.

¹¹Kan’on xalqlari bu yerdagi aza marosimini koʻrib: “Misrliklar qanday ogʻir aza marosimi oʻtkazyaptilar — a!” deb aytdilar. Shuning uchun bu joyga Ovil — Misrayim[369] deb nom qoʻydilar.

¹²Shunday qilib, Yoqub oʻgʻillariga qanday vasiyat qilgan boʻlsa, oʻgʻillari otalarining vasiyatini toʻla — toʻkis bajardilar.

¹³Ular otalarining jasadini Kan’on yurtiga olib kelib, Maxpaladagi dalada joylashgan gʻorga dafn qildilar[370]. Ibrohim oʻz oilasiga qabriston uchun Xet xalqidan boʻlgan Efroʻndan sotib olgan Mamre sharqidagi gʻor shudir.

¹⁴Yusuf otasini dafn qilgandan keyin, aka — ukalarini, otasini dafn qilgani birga kelgan hamrohlarini ergashtirib Misrga qaytdi.

¹⁵Otalari vafot etgandan keyin, Yusufning akalari: “Biz Yusufga yomonlik qilgan edik, endi u oʻsha yomonliklarimiz uchun kek saqlab yurgan boʻlsa, bizdan oʻch oladi”, deb qoʻrqa boshladilar.

¹⁶Shuning uchun ular Yusufga shunday xabar yubordilar: “Otamiz vafotidan oldin bizga,

¹⁷Yusufning huzuriga borib aytinglar, men undan oʻtinaman, sizlar unga qarshi qilgan ogʻir jinoyatlaringizni unutsin, deb aytgan edilar. Iltimos qilamiz, otang Xudosining bu qullari qilgan jinoyatlarni unutgin.” Yusuf shu xabarni eshitganda, yigʻlab yubordi.

¹⁸Keyin akalari ham kelib: “Biz sening qullaringmiz”, deb Yusufning oyoqlariga yiqildilar.

¹⁹Lekin Yusuf akalariga: — Qoʻrqmanglar, men sizlarni hukm qilib, jazolaydigan Xudo emasman — ku! — dedi.

²⁰— Sizlar menga ravo koʻrgan yomonlikni Xudo yaxshilikka ishlatdi. Son — sanoqsiz odamlarni saqlab qolish uchun U meni shu yerga olib keldi.

²¹Shuning uchun qoʻrqmanglar, men oʻzlaringizni ham, bola — chaqalaringizni ham boqaman. Yusuf akalariga muloyim gapirib, ularga tasalli berdi.

²²Shunday qilib, Yusuf, uning aka — ukalari, ularning oilalari Misrda yashab qoldilar. Yusuf 110 yil umr koʻrdi.

²³Yusuf Efrayimning nevara — chevaralarini ham koʻrdi. Manashening oʻgʻli Moxirning bolalari tugʻilganda, Yusuf hayot edi. Yusuf bu bolalarni ham farzandlari qatoriga qabul qildi.

²⁴“Mening umrim oxirlab boryapti, — dedi Yusuf aka — ukalariga. — Lekin Xudo sizlarni kuzatib turadi, sizlarni bu yurtdan olib chiqib, Ibrohim, Is’hoq va Yoqubga beraman, deb qasam ichgan yurtga qaytarib olib boradi.”

²⁵Soʻng Yusuf Isroil urugʻlariga qasam ichdirib: “Xudo sizlarning oldingizga kelganda, sizlar mening suyaklarimni bu yerdan olib ketinglar”, — dedi.

²⁶Yusuf 110 yil yashab, olamdan oʻtdi. Uning jasadini mumiyolab, Misrda bir tobutga soldilar.