Read Uzbek Muqaddas Kitob 2 Shohlar 22 Bible Online

2 Shohlar 22 - Uzbek Muqaddas Kitob bible

2 Shohlar 22

¹Egamiz Dovudni jamiki dushmanlari va Shoulning qoʻlidan ozod qilgan kuni Dovud Egamizga atab shu qoʻshiqni aytdi:

²“Egam suyangan qoyamdir[140], mening qal’am, qutqaruvchimdir.

³Ha, Xudodir mening qoyam, Unda panoh topaman. Udir mening qalqonim, qudratli najotkorim[141], Qoʻrgʻonimu boshpanam. Xaloskorim, zulmdan meni Sen qutqarasan!

⁴Egamga iltijo qilaman, Gʻanimlarimdan U meni xalos qiladi. Egamizga hamdu sanolar boʻlsin!

⁵Oʻlim toʻlqinlari meni qurshab olgandi, Balo — qazo sellari dahshat ila bosgandi,

⁶Ha, oʻliklar diyorining[142] toʻrlari meni oʻrab olgandi, Oʻlim oʻz tuzogʻiga meni asir qilgandi.

⁷Kulfatda qolganimda Egamga iltijo qildim, Ha, Xudoyimga iltijo qildim. Ma’badidan turib U ovozimni eshitdi, Ohu nolam qulogʻiga yetib bordi.

⁸Oʻsha zamon yer yuzi titrab, tebrandi, Osmon poydevori[143] larzaga keldi, Egam gʻoyat gʻazabga mingan edi.

⁹Burnidan tutun buruqsab chiqardi, Ogʻzidan otash pishqirardi, Oldidan qip — qizil choʻgʻ yogʻilardi.

¹⁰U koʻklarni yorib, pastga tushdi, Oyoqlari ostida — qora bulut.

¹¹Egam bir karubga[144] minib uchib keldi, Yel qanotlari uzra koʻringan edi.

¹²Atrofini zulmat bilan oʻradi, Atrofidagi qora bulutlarni Oʻziga chayla qildi.

¹³Ulkan nur Egamning oldidan chiqdi, Qip — qizil choʻgʻ yogʻilib turdi.

¹⁴Egamning ovozi koʻklardan guldiradi, Xudoyi Taoloning sadosi eshitildi.

¹⁵Oʻqlar otdi, chaqmoq chaqtirib, yovlarini tirqiratdi, Ularni sarosimaga soldi.

¹⁶Egamning tahdidlaridan, Uning qahrli nafasidan Dengizning tubi koʻrinib qoldi, Zamin poydevori[145] yalangʻoch boʻlib qoldi.

¹⁷Egam yuqoridan qoʻl uzatib, meni tutdi, Bahaybat suvlardan[146] meni chiqarib oldi.

¹⁸Meni kuchli gʻanimlarim qoʻlidan, Mendan nafratlangan yovlarimdan qutqardi, Ular mendan kuchli edilar.

¹⁹Qora kunimda ular menga hamla qildilar, Ammo Egam menga tayanch boʻldi.

²⁰Meni bexavotir joyga chiqarib qoʻydi, Mendan mamnun boʻlib, najot berdi.

²¹Egam solihligim uchun meni mukofotlaydi, Aybsizligim uchun meni taqdirlaydi.

²²Zero, men Egamning yoʻlidan yurdim, Axloqsizlik qilmadim, Xudoyimdan yuz oʻgirmadim.

²³Uning hamma qonun — qoidalariga rioya qildim, Farmonlaridan boʻyin tovlamadim.

²⁴Uning oldida benuqson boʻldim, Gunoh qilishdan oʻzimni saqladim.

²⁵Shu sababli Egam meni pok deb bildi, Solihligimga yarasha mukofot berdi.

²⁶Ey Egam! Senga sodiq boʻlganga Sen sodiq boʻlasan, Yaxshi insondan yaxshiligingni ayamaysan.

²⁷Pok kishiga pokligingni koʻrsatasan, Egrining ayyorligini oʻz boshiga solasan.

²⁸Ahli kamtarga esa najot berasan, Dimogʻdorni kuzatib, yerga urasan.

²⁹Ey Egam! Sen Oʻzing chirogʻimsan, Zulmatni men uchun yorugʻlikka aylantirasan.

³⁰Ey Xudoyim! Senga suyanib lashkarni yoʻq qilaman, Senga suyanib devorlardan oshib oʻtaman.

³¹Xudoning yoʻli komildir, Egamizning kalomi chin haqiqatdir, Panoh izlab borganga U qalqondir.

³²Egamizdan boshqa Xudo kim ekan?! Xudoyimizdan boʻlak suyanchiq Qoya bormikan?!

³³Mening mustahkam qal’am Xudodir, Yoʻlimni Oʻzi bexatar qiladi.

³⁴U oyoqlarimni kiyik oyogʻiday qiladi, Choʻqqilar uzra meni bexatar yurgizadi.

³⁵Qoʻllarimni jang qilishga oʻrgatadi, Barmoqlarim bronza yoyni buka oladi.

³⁶Ey Egam, Sen menga zafar qalqoningni bergansan, Madading esa meni yuksaltiradi.

³⁷Oyoqlarim uchun yoʻlimni keng qilgansan, Oyoqlarim sira ogʻib ketmaydi.

³⁸Gʻanimlarimni quvlab, halok qildim, Ularni yoʻq qilmay ortga qaytmadim.

³⁹Ularni shunday ezdimki, hech ham tura olmadilar. Oyoqlarim ostida choʻzilib qoldilar.

⁴⁰Sen menga quvvat berib, jangga yubording, Menga qarshi otlangan yovni oldimda bosh egdirding.

⁴¹Gʻanimlarimni mendan qochirding, Mendan nafratlanganlarni men yoʻq qildim.

⁴²Ular madad soʻrab faryod qildilar, Najotkorni esa topolmadilar, Ey Egam, gʻanimlarim Senga yolvordilar, Ammo Sen javob bermading.

⁴³Yerdagi tuproq singari ularni ezdim, Yoʻldagi loydek tepkilab bosdim.

⁴⁴Sen meni xalqim gʻiybatidan xalos qilding, Meni ellarga yoʻlboshchi qilish uchun saqlading. Oʻzim tanimagan elat menga qaram boʻldi.

⁴⁵Yot ellar menga boʻyin egdilar, Ovozimni eshitiboq quloq tutdilar.

⁴⁶Yot ellar holsizlanib yiqildilar, Qaltirab manzilidan chiqib qochdilar.

⁴⁷Egam barhayotdir! Suyangan Qoyamga olqishlar boʻlsin! Najotim qoyasi — Xudoyim yuksalsin!

⁴⁸Qasdimni olgan Xudodir, Xalqlarni menga U tobe qilgan.

⁴⁹Meni gʻanimlarimdan U qutqargan, Bosqinchilardan meni ustun qilgan, Meni zoʻravonlar qoʻlidan xalos etgan.

⁵⁰Shu bois, ey Egam, xalqlar ichra Senga hamdlar aytaman! Seni kuylab sano aytaman!

⁵¹Egamiz Oʻz shohini ulugʻ zafarlarga erishtiradi, Oʻzi tanlagan shoh Dovud va uning nasliga To abad sodiq sevgisini koʻrsatadi.”