Read Uzbek Muqaddas Kitob 2 Shohlar 24 Bible Online

2 Shohlar 24 - Uzbek Muqaddas Kitob bible

2 Shohlar 24

¹Isroil xalqiga Egamiz yana gʻazabini sochdi. Egamiz xalqqa zarar yetkazmoqchi boʻlib, aholini roʻyxat qilishga Dovudni majbur etdi: “Qani, Isroil va Yahudo xalqini sanab chiq”, dedi.

²Shoh yonida turgan lashkarboshisi Yoʻabga shunday buyruq berdi: — Isroilning hamma qabilalarini — Dandan Bershebagacha boʻlgan joylarni kezib, xalqni sanab chiqinglar, toki qancha aholi borligini men bilayin.

³Lekin Yoʻab shunday dedi: — Egangiz Xudo xalqning hozirgi sonini yuz karra koʻpaytirsin, shoh hazratlari ham oʻsha kunlarni koʻrsin! Shohim nimaga buni istab qoldilar?

⁴Lekin Yoʻab va lashkarboshilarning soʻzidan shohning soʻzi ustun keldi. Shundan soʻng ular shohning huzuridan chiqib, Isroil xalqini sanash uchun ketishdi.

⁵Ular Iordan daryosini kechib oʻtishdi va Aror shahri yonida chodir qurib, oʻsha yerda istiqomat qiladigan Isroil xalqini sanashdi. Aror shahri soylikdan janubda joylashgan edi. Keyin ular Gad qabilasining hududiga borib, Yazir shahrining aholisini sanashdi.

⁶Soʻng Gilad yerlarini bosib oʻtib, Taxtim — Xodshi yerlariga borishdi. Soʻngra Danyonga, Danyondan esa Sidon atroflariga aylanib borib, bu yerning xalqini sanashdi.

⁷Yana Tir qal’asidagi, Xiv va Kan’on xalqlarining hamma shaharlaridagi Isroil xalqini sanab chiqishdi. Nihoyat, janubga — Yahudoning Nagav choʻlidagi Bersheba shahriga kelishdi.

⁸Ular toʻqqiz oy va yigirma kun yurtni u boshidan bu boshigacha aylanib chiqqanlaridan keyin Quddusga qaytib kelishdi.

⁹Yoʻab roʻyxat natijasini shohga ma’lum qildi: Isroilda jang qilishga qodir 800.000 odam, Yahudoda esa 500.000 odam bor ekan.

¹⁰Xalqni sanab chiqqandan soʻng Dovudning vijdoni qiynaldi. — Bu ishni qilib ogʻir gunohga botdim, aqlsizlarcha ish tutdim. Oʻtinaman, ey Egam, bu qulingning gunohini kechir, — deb iltijo qildi.

¹¹Ertasiga ertalab Dovud uyqudan turgach, Dovudning xizmatida boʻlgan valiy — Gad paygʻambarga Egamizning shu soʻzlari ayon boʻldi:

¹²“Borib Dovudga shu gaplarni yetkaz: «Egam shunday deb aytmoqda: Men senga uchta jazoni taklif qilaman, shulardan bittasini tanla, keyin senga oʻsha jazoni yuboraman.»”

¹³Gad Dovudning huzuriga borib, uchta jazoni birma — bir bayon qildi: — Yurtingda uch[162] yil ocharchilik boʻlsinmi? Yoki seni ta’qib qiladigan gʻanimlaringdan uch oy qochib yurishni istaysanmi? Yo boʻlmasa, yurtingda uch kun oʻlat boʻlsinmi? Endi yaxshilab oʻyla, meni Yuborganga nima deb javob berayin?

¹⁴— Men juda ogʻir ahvolda qoldim — ku, — dedi Dovud Gadga. — Nima boʻlsa ham, odamzodning qoʻliga tushmayin. Mayli, Egamning Oʻzi bizni jazolasin, chunki U gʻoyat rahmdil.

¹⁵Shunday qilib, Egamiz oʻsha kuni ertalabdan belgilangan vaqtgacha Isroil yurtiga oʻlat yubordi. Butun yurt boʻylab — Dandan Bershebagacha boʻlgan joyda 70.000 kishi oʻldi.

¹⁶Egamizning farishtasi, Quddusni yoʻq qilaman deb, qoʻl koʻtarganda, Egamiz rahm qilib, balo — qazo joʻnatmaydigan boʻldi. Xalqni qirayotgan farishtaga: — Boʻldi, bas! Yetadi! — deb amr berdi. Egamizning farishtasi oʻsha paytda Quddusda — Yobus xalqidan boʻlgan Aravno degan odamning xirmonida[163] edi.

¹⁷Dovud xalqni oʻldirayotgan farishtani koʻrgach, Egamizga dedi: — Gunoh qilgan menman, men aybdorman! Qoʻyday beozor bu insonlar nima ayb qilibdi? Gʻazabingni menga va otam xonadoniga socha qol!

¹⁸Oʻsha kuni Gad Dovudning huzuriga bordi va unga: — Yobus xalqidan boʻlgan Aravnoning xirmoniga borib, oʻsha yerda Egamga atab bir qurbongoh qurgin, — dedi.

¹⁹Dovud Gadning soʻziga kirib, xuddi Egamiz amr etganiday, xirmonga bordi.

²⁰Aravno shoh bilan a’yonlarning oʻziga tomon kelayotganini koʻrdi va Dovudning oldiga borib, yerga muk tushib ta’zim qildi.

²¹— Shoh hazratlari nechun bu qulining oldiga tashrif buyurdilar? — deb soʻradi. — Egamga atab bir qurbongoh qurish uchun xirmoningni sendan sotib olgani keldim, toki oʻlat xalqdan daf boʻlsin, — dedi Dovud.

²²— Shoh hazratlari nimani ma’qul topsalar, Egamizga oʻshani nazr qilsinlar, — dedi Aravno. — Ana, kuydiriladigan qurbonliklar uchun hoʻkizlar, oʻtin uchun esa xoʻptir[164] va hoʻkizlarning boʻyinturuqlari bor.

²³Ey shohim, bularning hammasini sizga in’om etaman. Keyin qoʻshib qoʻydi: — Egangiz Xudo sizdan rozi boʻlsin!

²⁴— Boʻlmaydi! — dedi shoh. — Sendan bu narsalarni oʻz bahosida sotib olaman. Tekin tushgan qurbonliklarni Egam Xudoga kuydirib nazr qilmayman. Shundan soʻng Dovud xirmonni va hoʻkizlarni ellik kumush tangaga[165] sotib oldi.

²⁵Dovud oʻsha yerda Egamizga atab qurbongoh qurib, kuydiriladigan qurbonliklar va tinchlik qurbonliklarini atadi. Egamiz esa Isroil yurti uchun Dovudning iltijolariga javob berdi. Shunday qilib, Isroildan oʻlat daf qilindi.