Read Uzbek Muqaddas Kitob 2 Shohlar 9 Bible Online

2 Shohlar 9 - Uzbek Muqaddas Kitob bible

2 Shohlar 9

¹Bir kuni Dovud: — Shoul xonadonidan biror odam qoldimi? — deb soʻradi. — Agar boʻlsa, Yoʻnatanning haqi — hurmati unga yaxshilik qilayin.

²Shoul xonadonida Zibax degan bir xizmatkor bor edi. Uni Dovudning huzuriga chaqirib kelishdi. — Sen Zibaxmisan? — deb soʻradi shoh. — Ha, janobi oliylari, menman, — dedi Zibax.

³— Shoul xonadonidan birorta odam qolganmi? — deb soʻradi shoh. — Unga Xudoning marhamatini koʻrsatayin. — Yoʻnatanning bir oʻgʻli bor, uning ikkala oyogʻi ham mayib[59], — dedi Zibax.

⁴— Qayerda u? — soʻradi shoh. — Loʻdavorda, Omiyol oʻgʻli Moxirning uyida, — dedi Zibax.

⁵Shoh Dovud Loʻdavordagi Moxirning uyidan Mefibositni oʻz huzuriga chaqirtirdi.

⁶Shoulning nabirasi Mefibosit Yoʻnatanning oʻgʻli edi. Mefibosit Dovudning huzuriga kelib, muk tushib ta’zim qildi. — Mefibosit! — dedi Dovud. — Qulingiz shu yerda, — deb javob berdi Mefibosit.

⁷Dovud unga dedi: — Qoʻrqma, otang Yoʻnatanning haqi — hurmati uchun senga yaxshilik qilay. Bobong Shoulning hamma yerlarini senga qaytarib beraman. Oʻzing esa har doim mening dasturxonimdan taom yeysan.

⁸Mefibosit ta’zim qilib: — Men, qulingiz, kim boʻlibmanki, oʻlik itga oʻxshagan mendek bir kimsaga yaxshilik qilyapsiz? — dedi.

⁹Soʻng shoh Dovud Shoulning xizmatkori Zibaxni chaqirtirdi: — Ilgari Shoulga va uning xonadoniga nima tegishli boʻlsa, hammasini xoʻjayiningning nabirasi Mefibositga berdim, — dedi Dovud unga.

¹⁰— Mefibosit uchun sen oʻgʻillaring va qullaring bilan birga yerga ishlov berib, hosil olinglar, toki xoʻjayiningning nabirasi ehtiyojiga yarasha oziq — ovqat bilan ta’minlansin. Xoʻjayiningning nabirasi Mefibosit har doim mening dasturxonimdan taom yeydi. Zibaxning oʻn besh oʻgʻli va yigirmata quli bor edi. Shunda Zibax shohga:

¹¹— Janobi oliylari bu quliga nima buyurgan boʻlsalar, hammasini ijro etarman, — dedi. Mefibosit, xuddi shoh farzandlarining biriday, shoh dasturxonidan[60] taom yeydigan boʻldi.

¹²Mefibositning Mixa degan yoshgina oʻgʻli ham bor edi. Zibax xonadonida yashaganlarning hammasi Mefibositning xizmatkori boʻldi.

¹³Mefibosit Quddusda istiqomat qilib qoldi va doim shoh dasturxonidan taom yedi. Uning ikkala oyogʻi ham choʻloq edi.