Read Uzbek Muqaddas Kitob 3 Shohlar 14 Bible Online

3 Shohlar 14 - Uzbek Muqaddas Kitob bible

3 Shohlar 14

¹Oʻsha paytda shoh Yeribomning oʻgʻli Abiyo kasal boʻlib qoldi.

²Yeribom xotiniga: — Qani, tur, kiyimlaringni oʻzgartir, toki mening xotinim ekanligingni hech kim bilib qolmasin, — dedi. — Shiloʻga joʻna. Oxiyo paygʻambar oʻsha yerda. Isroil xalqining shohi boʻlishim haqida u bashorat qilgan edi[123].

³Oʻnta non, bir nechta kulcha, bir xumcha asal olib, Oxiyo paygʻambarning huzuriga bor. Oʻgʻlimizga nima boʻlishini u senga aytadi.

⁴Xotini Yeribom aytganiday qildi, oʻrnidan turib, Shiloʻga yoʻl oldi. Oxiyoning uyiga yetib ham keldi. Oxiyo qartayganidan koʻzlari koʻrmaydigan boʻlib qolgan edi.

⁵Egamiz Oxiyoga dedi: — Ana, Yeribomning xotini kelyapti, qara, qiyofasini oʻzgartirib olgan, oʻgʻli kasal, unga nima boʻladi — shuni sendan soʻramoqchi. Unga shunday — shunday deb ayt.

⁶Yeribomning xotini eshikni ochib, ostona hatlashi bilanoq, Oxiyo uning qadam tovushlarini eshitdi. Shu zahoti Oxiyo ayolga dedi: — Kel, Yeribomning xotini, ichkariga kir. Meni birov tanib qolmasin, deb boshqacha kiyinib olibsanmi?! Ammo senga sovuq xabarlarim bor.

⁷Izingga qaytib bor, Yeribomga shu gaplarni yetkaz: “Isroil xalqining Xudosi — Egamiz shunday aytmoqda: seni xalqing orasidan yuksaltirib, xalqim Isroil ustidan hukmdor qildim.

⁸Shohlikni Dovud xonadonidan tortib olib, senga berdim. Biroq sen qulim Dovudga oʻxshagan boʻlmading. U mening amrlarimga rioya qilib, butun qalbi bilan Menga ergashar, oldimda toʻgʻri ishlarnigina qilardi.

⁹Sen oʻzingdan oldin oʻtganlarning hammasidan ham koʻp yomon ishlar qilding. Oʻzing uchun boshqa xudolarning tasvirlarini yasab, Meni gʻazablantirding. Mendan yuz oʻgirding.

¹⁰Ana shu qilmishlaring evaziga xonadoningga baloyu ofat keltiraman. Xoh qul boʻlsin, xoh ozod boʻlsin, Isroildagi har bir erkak urugʻingni qirib yuboraman. Xonadoningni, xuddi supurindini bitta qoldirmay uloqtirganday, ildizidan quritib tashlayman.

¹¹Shaharda oʻlgan oilang a’zosi koʻppaklarga yem boʻlar, qirda oʻlgani koʻkdagi qushlarga yem boʻlar. Zotan, bu soʻzlarni Egamiz aytgan.”

¹²Endi oʻrningdan tur, uyingga joʻna. Shaharga qadam qoʻyishing bilanoq, bolang nobud boʻladi.

¹³Butun Isroil xalqi bolangni dafn qiladi, unga aza tutadi. Isroil xalqining Xudosi — Egamiz Yeribom xonadonidan faqat shu bolanigina xush koʻrdi. Yeribom xonadonidan qabrga koʻmiladigan faqat shu boladir.

¹⁴Shundan keyin Egamiz Oʻzi uchun Isroil ustiga bir shoh qoʻyadi. U shoh Yeribom xonadonini oʻsha kuni — oʻsha zahotiyoq qirib bitiradi.

¹⁵Egamiz Isroil xalqini shunday uradiki, Isroil suv ichida oʻsgan qamishga oʻxshab titraydi. Egamiz Isroil xalqini ota — bobosiga bergan bu hosildor yurtdan yulib olib, Furot daryosining narigi tomoniga sochib yuboradi. Chunki bu xalq Asheraga[124] atab ustunlar yasab, Egamizni gʻazablantirdi.

¹⁶Yeribom gunoh qildi, Isroil xalqini ham gunohga botirdi, shuning uchun Egamiz Isroilni tark etadi.

¹⁷Yeribomning xotini oʻrnidan turib, uyiga joʻnadi. U Tirzaga[125] yetib kelib, uyining ostonasidan hatlashi bilanoq, bolasi jon berdi.

¹⁸Egamizning Oʻz quli Oxiyo paygʻambar orqali aytgan soʻzlari bajo boʻldi, butun Isroil xalqi bolani dafn qilib, unga aza tutdi.

¹⁹Yeribomning boshqa ishlari — qanday jang qilgani, qay tarzda hukmronlik qilgani — hammasi “Isroil shohlari tarixi” kitobida yozilgan.

²⁰Yeribom yigirma ikki yil shoh boʻldi. U ham olamdan oʻtdi. Oʻrniga oʻgʻli Nadov shoh boʻldi.

²¹Sulaymonning oʻgʻli Raxabom esa Yahudoda hukmronlik qildi. U taxtga oʻtirgan paytda qirq bir yoshda edi. Onasi Ommonlik boʻlib, ismi Namax edi. Raxabom Quddusda oʻn yetti yil shohlik qildi. Egamiz hamma Isroil qabilalarining shaharlari orasidan Quddus shahrini Oʻzi ulugʻlanishi uchun tanlab olgan edi.

²²Yahudo xalqi ham Egamiz oldida qabihliklar qildi. Gunoh ishlari bilan Xudoning rashkini qoʻzgʻatib, Uni ota — bobolaridan ham qattiqroq gʻazablantirdi.

²³Har bir tepalik joyda, har bir yashil daraxt ostida oʻzlariga sajdagohlar[126], butsimon toshlar, Asheraning ustunlarini yasadilar.

²⁴Bu yurtdagi sajdagohlarda fohishlar[127] ham bor edi. Yahudo xalqi shunchalik koʻp qabih ishlar qildiki, ularning qilmishlari Kan’on yurtidan Egamiz quvib yuborgan hamma xalqlarning jirkanch ishlariga barobar edi.

²⁵Raxabom hukmronligining beshinchi yilida[128] Misr shohi Shishax Quddusga bostirib keldi.

²⁶U Egamizning uyidagi va saroydagi xazinalarni tortib oldi, qoʻliga nima ilinsa, hammasini oldi. Sulaymon yasattirgan hamma oltin qalqonlarni ham oldi.

²⁷Shoh Raxabom oltin qalqonlar oʻrniga bronza qalqonlar yasattirdi va ularni shoh saroyi darvozasini qoʻriqlaydigan soqchilar boshliqlari qoʻliga berdi.

²⁸Shoh Egamizning uyiga kirganda, soqchilar qalqonlarni koʻtarib borishar, keyin esa qalqonlarni joyiga eltib qoʻyishardi.

²⁹Raxabom bilan Yeribom butun umri davomida urishib keldilar. Raxabomning boshqa ishlari, butun faoliyati “Yahudo shohlari tarixi” kitobida yozilgan.

³¹Nihoyat, Raxabom olamdan oʻtib, Dovud qal’asida, ota — bobolari yoniga dafn qilindi. Onasi Ommonlik boʻlib, ismi Namax edi. Raxabomning oʻrniga oʻgʻli Abiyo[129] shoh boʻldi.