Read Uzbek Muqaddas Kitob 3 Shohlar 4 Bible Online

3 Shohlar 4 - Uzbek Muqaddas Kitob bible

3 Shohlar 4

¹Sulaymon butun Isroilning shohi edi.

²Uning qoʻli ostidagi a’yonlar quyidagilar edi: Zodoʻx oʻgʻli Ozariyo — ruhoniy,

³Shishoning oʻgʻillari Elixorut va Oxiyo — kotib, Oxilud oʻgʻli Yohushafat — tarixnavis,

⁴Yohayido oʻgʻli Binayo — lashkarboshi, Zodoʻx bilan Abuatar — ruhoniy,

⁵Natan oʻgʻli Ozariyo — hokimlarning nazoratchisi, Natan oʻgʻli Zabud — ruhoniy va shohning maslahatchisi,

⁶Oxisar — saroy boshqaruvchisi, Abdax oʻgʻli Odoniram — qarollarning boshligʻi edi.

⁷Sulaymonning oʻn ikkita hokimi boʻlib, ular Isroil hududlarini boshqarar, shohni va shoh xonadonini oziq — ovqat bilan ta’minlardilar. Har bittasi yiliga bir oy davomida shoh xonadoniga oziq — ovqat yetkazib berishi shart edi.

⁸Ularning ismlari quyidagicha edi: Efrayim qirlarida — Banxur,

⁹Moxaz, Shalbim, Bayt — Shamash, Eloʻn — Bayt — Xanon degan shaharlarda — Bandaxor,

¹⁰Arboʻt va Soʻxu shaharlarida, butun Xafer oʻlkasida — Banxesed,

¹¹Butun Nafoʻt — Doʻr[28] degan joyda — Banabunadav (Sulaymonning qizi Toʻfat Banabunadavning xotini edi),

¹²Tanax va Magidoʻ shaharlarida, butun Bayt — Shan hududida — Oxilud oʻgʻli Bano (bu joy Yizril etagidagi Zoraton shahridan Ovil — Maxla shahrigacha va Yoxmayom shahrining narigi tomoniga qadar boʻlgan yerlardir),

¹³Giladdagi Ramoʻt shahrida — Bangeber, shuningdek, Manashe oʻgʻli Yovir urugʻiga qarashli Gilad oʻlkasidagi qishloqlar, Bashan oʻlkasidagi Argob hududi, devor bilan oʻralgan va darvozasi bronza tamba bilan mustahkamlangan oltmishta katta shahar ham unga qarashli edi.

¹⁴Moxanayim yerlarida — Iddo oʻgʻli Oxinadav,

¹⁵Naftali hududida — Oximas (u Sulaymonning qizi Bosimatga uylangan edi),

¹⁶Osher hududida va Boloʻt shahrida — Xushay oʻgʻli Bano,

¹⁷Issaxor yerlarida — Paruvax oʻgʻli Yohushafat,

¹⁸Benyamin yerlarida — Ela oʻgʻli Shimax,

¹⁹Gilad oʻlkasida — Uri oʻgʻli Geber. Ilgari Gilad oʻlkasida Amor shohi Sixoʻn va Bashan shohi Oʻg hukmronlik qilishgan. Yahudo yurtining oʻz hukmdori bor edi[29].

²⁰Yahudo va Isroil xalqi shu qadar koʻp ediki, goʻyo dengiz qirgʻogʻidagi qumni eslatardi. Ular yeb — ichib, xursandchilik bilan yashardi.

²¹Sulaymon Furot daryosidan Filistlar yeriga va Misr chegaralariga qadar boʻlgan hamma oʻlkalarda shohlik qilardi. Bu oʻlkalardagi xalqlar Sulaymonga oʻlpon toʻlab, umr boʻyi unga tobe boʻldilar.

²²Sulaymon xonadonining bir kunlik ozigʻi quyidagicha edi: 300 togʻora[30] sifatli un va 600 togʻora[31] kepakli un,

²³ogʻilxonada boqilgan 10 ta semiz mol va yaylovda boqilgan 20 ta buqa, 100 ta qoʻy, bulardan tashqari, bugʻular, kiyiklar, ohular, semiz parrandalar.

²⁴Furot daryosining gʻarbidagi Tifsaxdan Gʻazo shahriga qadar boʻlgan oʻlkalarda, daryoning gʻarb tomonidagi hamma shohlar ustidan Sulaymon hukmron edi. Atrofdagi hamma yurtlar bilan aloqasi yaxshi edi.

²⁵Sulaymon hayotligida Dandan Bershebagacha boʻlgan Yahudo va Isroil yurtidagi har bir odam oʻz uzumzorida, oʻz anjir daraxti ostida tinchgina umr kechirardi.

²⁶Sulaymonning otxonalarida jang aravalari uchun 4000[32] oti va 12.000 uchqur otlari bor edi.

²⁷Oʻsha oʻn ikki hokimning har biri shoh Sulaymonni, shoh Sulaymonning dasturxonidan taom yeydiganlarning hammasini belgilangan oyda oziq — ovqat bilan ta’minlardi, birorta ham kamchilikka yoʻl qoʻyishmasdi.

²⁸Har biri oʻzining navbati kelganda shoh tayinlagan yerga[33] jang aravalarining otlari va boshqa otlar uchun arpa, somon ham olib kelishardi.

²⁹Shunday qilib, Xudo Sulaymonga dengiz qirgʻogʻidagi qum kabi cheksiz — chegarasiz donolik, idrok, tengsiz aql berdi.

³⁰Sulaymonning donoligi butun sharq xalqlarining donoligidan, butun Misr xalqining donoligidan ham ortiq edi.

³¹U hamma insonlardan, Zerax urugʻidan boʻlgan Etxandan, Moxul oʻgʻillari Xaman, Qolkoʻl, Dardaxdan ham dono edi. Atrofdagi hamma xalqlar orasida uning dongʻi ketgan edi.

³²U 3000 matal, 1005 ta qoʻshiqlar ijro etdi.

³³U Lubnondagi sadr daraxtidan tortib, devorda oʻsgan issopgacha, qoʻyingki, jamiki dov — daraxtlar, hayvonlar, qushlar, sudralib yuruvchilar, baliqlar haqida soʻz yuritardi.

³⁴Sulaymonning donoligi haqida eshitgan dunyodagi hamma shohlar uning oldiga odamlarini yuborardi. Barcha xalqlardan kelgan bu odamlar Sulaymonning donoligidan bahramand boʻlardi.