Read Uzbek Muqaddas Kitob 3 Shohlar 9 Bible Online

3 Shohlar 9 - Uzbek Muqaddas Kitob bible

3 Shohlar 9

¹Sulaymon Egamizning uyini ham, oʻzining saroyini ham qurib boʻldi. Moʻljallangan hamma yumushlarni tamom qildi.

²Shundan keyin Egamiz Sulaymonga, ilgari Givonda zohir boʻlganiday[72], yana zohir boʻldi.

³Egamiz unga shu soʻzlarini ayon qildi: “Menga qilgan iltijolaringni eshitdim. Sen qurgan va Oʻzim ulugʻlanadigan uyni muqaddas qildim. Koʻzlarim, koʻnglim doimo oʻsha yerda boʻladi.

⁴Sen ham Mening oldimda, otang Dovud kabi, sofdil va toʻgʻri boʻlib yursang, Men amr etgan hamma farmonlarimni ijro etsang, qonun — qoidalarimni mahkam tutsang,

⁵Isroil ustidan shohlik taxtingni abadiy mustahkam qilaman. Otang Dovudga ham: «Sening naslingdan boʻlgan erkak zoti to abad Isroil taxtida oʻtiradi», deb va’da bergan edim[73].

⁶Bordi — yu, sen ham, sening nasling ham Men koʻrsatgan yoʻldan qaytsangiz, sizlarga bergan amr va farmonlarimga rioya qilmasangiz, borib boshqa xudolarga xizmat qilsangiz, ularga topinsangiz,

⁷Isroil xalqini Oʻzim bergan yurtdan uloqtirib tashlayman. Men muqaddas qilgan, Oʻzim ulugʻlanadigan uyni tark etaman. Ana oʻshanda Isroil xalqi hammaning ogʻzida duv — duv gap boʻladi, hamma xalqlar ularni masxara qiladi.

⁸Hozir ajoyib boʻlib turgan uyning yonidan oʻtganlar buning ayanchli ahvolini koʻrganda, dahshatga tushib: «Nimaga ularning Egasi bu yurtni va bu uyni mana shu ahvolga soldi ekan — a?» deb qotib qoladi.

⁹Soʻng yana oʻzlari shunday xulosa chiqaradilar: «Eha, ular ota — bobolarini Misr yurtidan olib chiqqan oʻzlarining Egasi Xudodan yuz oʻgirdilar — ku! Boshqa xudolarga ergashib, oʻsha xudolarga topinib, xizmat qildilar — ku! Qilmishlariga yarasha oʻzlarining Egasi ularning boshiga shu koʻrgiliklarni solibdi — da.»”

¹⁰Sulaymon ikkala uyni — Egamizning uyini va oʻz saroyini yigirma yilda bitirgan edi.

¹¹Tir shohi Xiram Sulaymonning ehtiyojiga koʻra, sadr yogʻochi, sarv yogʻochi, oltin yetkazib bergan edi. Shoh Sulaymon Xiramga bu xizmatlari uchun Jalila hududidagi yigirmata shaharni berdi.

¹²Xiram: “Sulaymon bergan shaharlarni koʻray — chi”, deb Tirdan yoʻlga chiqdi, lekin u shaharlar Xiramga ma’qul kelmadi.

¹³— Doʻstim, menga bergan shaharlaring bori — yoʻgʻi shumi?! — dedi Xiram Sulaymonga. Xiram oʻsha yerlarga Kavul[74] deb nom berdi va bugunga qadar shu nom bilan yuritiladi.

¹⁴Xiram esa shoh Sulaymonga 250 pud[75] oltin yuborgan edi.

¹⁵Shoh Sulaymon majburlab olgan qarollarni chaqirtirib, Egamizning uyini, oʻzining saroyini barpo ettirgan edi. Shuningdek, Quddusning sharq tomonidagi Milloni[76] mustahkam qildirgan va shahar devorini qurdirgan edi. Xazor, Magidoʻ va Gezer shaharlarini mustahkamlagan edi.

¹⁶Misr fir’avni Gezerga bostirib kelib, shaharni qoʻlga olgan va oʻt qoʻygandi. Shu yerda istiqomat qilayotgan Kan’on aholisini qirib tashlab, shaharni oʻzining qizi — Sulaymonning xotiniga sep qilib bergandi.

¹⁷Shundan soʻng Sulaymon Gezer shahrini, Pastki Bayt — Xoʻronni,

¹⁸Baalatni, Yahudoning choʻlidagi Tamarni[77],

¹⁹oʻzining hamma ombor shaharlarini, jang aravalari saqlanadigan shaharlarni, otliqlari turadigan shaharlarini qaytadan tuzatib mustahkamladi. Bundan tashqari, Quddusda, Lubnonda, shohlikning hamma burchaklarida nima istasa, barpo qildi.

²⁰Shu oʻlkada qolib ketgan Amor, Pariz, Xiv, Xet va Yobus xalqlari Isroil xalqidan emasdi.

²¹Isroil xalqi ularning bu yurtda qolib ketgan avlodlarini tamomila qirib bitirolmagan edi. Sulaymon oʻsha qolib ketganlarini qarol qilib oldi. Ular bugungacha[78] bor.

²²Lekin Sulaymon Isroil xalqidan birortasini qul qilmadi. Aksincha, ularni shohning sipohlari, a’yonlari, akobirlari[79], lashkarboshilari, jang aravalarining qoʻmondonlari va suvorilarining qoʻmondonlari lavozimiga tayinladi.

²³Sulaymonning ishboshilari 550 kishi boʻlib, ular ishlayotgan odamlar ustidan nazoratchi edilar.

²⁴Fir’avnning qizi Dovud qal’asidan oʻziga atalgan saroyga koʻchib oʻtdi. Bu saroyni Sulaymon unga atab barpo qilgan edi. Shundan keyin Sulaymon Quddusning sharq tomonidagi Milloni[80] mustahkam qildirgandi.

²⁵Xullas, Sulaymon Egamizning uyini bitkazdi. U Egamizga atab qurgan qurbongohda yiliga uch marta kuydiriladigan qurbonliklar va tinchlik qurbonliklari qilar, tutatqi tutatardi.

²⁶Shoh Sulaymon Edom yurtida, Qizil dengiz[81] boʻyidagi Elet shahri yonida joylashgan Ezyoʻn — Geber shahrida kemalar yasadi.

²⁷Xiram oʻz tajribali dengizchilarini Sulaymonning odamlari bilan birga kemalarda joʻnatdi.

²⁸Ular Ofir yurtiga[82] borib, u yerdan 900 pud[83] oltin olib, shoh Sulaymonga keltirib berdilar.