Read Uzbek Muqaddas Kitob 4 Shohlar 12 Bible Online

4 Shohlar 12 - Uzbek Muqaddas Kitob bible

4 Shohlar 12

¹Isroil shohi Yohu hukmronligining yettinchi yilida Yoʻsh[75] Yahudo shohi boʻlgan edi. U Quddusda qirq yil hukmronlik qildi. Onasi Bersheba shahridan boʻlib, ismi Zibiyox edi.

²Yoʻsh umri boʻyi Egamiz oldida toʻgʻri ishlar qildi, chunki ruhoniy Yohayido unga yoʻl koʻrsatardi.

³Lekin sajdagohlar[76] hamon yoʻq qilinmagan, xalq hali ham oʻsha joylarda qurbonlik qilib, tutatqi tutatardi.

⁴Yoʻsh ruhoniylarga farmon berdi: — Egamizning uyiga ehson sifatida olib kelingan kumushni, doimiy soliqni, va’da qilingan nazrni va ixtiyoriy berilgan hadyalarni toʻplanglar.

⁵Bu kumushlarni ruhoniylar olib keluvchilardan qabul qilib olib, Egamiz uyining buzilgan joylarini tuzatishga sarflashsin.

⁶Yoʻsh hukmronligining yigirma uchinchi yilida ham ruhoniylar Egamiz uyining buzilgan joylarini hali tuzatmagan edilar.

⁷Shundan keyin shoh Yoʻsh ruhoniy Yohayido bilan boshqa ruhoniylarni chaqirib: — Nimaga Egamizning uyini tuzatmayapsizlar? — dedi ularga, — endi odamlardan kumush olmanglar. Olgan kumushlaringizni Egamizning uyini tuzatishga beringlar.

⁸Ruhoniylar xalqdan oʻzlari pul yigʻmaslikka va Egamizning uyi ta’mirlanishini nazorat qilmaslikka rozi boʻlishdi.

⁹Ruhoniy Yohayido bir quti olib, qopqogʻi ustidan teshik ochdi. Uni qurbongohning yoniga — odamlar Egamizning uyiga kiradigan joyning oʻng tomoniga joylashtirdi. Ostonada qorovul boʻlib turgan ruhoniylar Egamizning uyiga keltirilgan hamma kumushni qutiga tashlayverishdi.

¹⁰Qutida koʻp pul yigʻilgandan keyin, shohning mirzasi bilan oliy ruhoniy kelib, Egamizning uyiga keltirilgan kumushlarni qoplarga solib tortishardi.

¹¹Tortilgan kumushlar Egamizning uyidagi ishlarning boshida turgan odamlarga berilardi. Ular esa bu kumushlarni Egamizning uyida ishlayotgan duradgor va binokorlarga,

¹²tosh teruvchilarga, sangtaroshlarga toʻlashar, uyni tuzatmoq uchun yogʻoch va tosh sotib olishga ishlatishar, uyni tuzatishga kerak boʻlgan boshqa ashyolarga sarf qilishardi.

¹³Egamizning uyida yigʻilgan kumush bu joy uchun kumush togʻoralar, qaychilar, togʻorachalar va karnaylar, har xil oltin yoki kumush buyumlar yasashga sarf qilinmadi.

¹⁴Bu kumushning hammasi ishlovchilarga toʻlashga va uyni tuzatishga sarf qilindi.

¹⁵Egamizning uyida ishlovchilarga pul taqsimlaydigan odamlardan hisob — kitob talab qilinmadi, chunki ular halol ishlashdi.

¹⁶Ayb va gunoh qurbonliklariga qoʻshib, zararni qoplash uchun beriladigan pul esa Egamizning uyiga olib kiritilmasdi. Bu pul ruhoniylarga tegishli edi.

¹⁷Oʻsha paytda Oram shohi Xazayil Gat shahriga[77] hujum qilib, shaharni qoʻlga kiritdi. Keyin Quddusga hujum qilmoqqa qaror qildi.

¹⁸Yahudo shohi Yoʻsh esa ota — bobolari — Yahudo shohlari Yohushafatning, Yohuramning, Oxoziyoning va oʻzining Egamizga atagan hamma muqaddas nazrlarini, Egamizning uyidan va saroy xazinalaridan olingan jamiki oltinlarni Oram shohi Xazayilga yubordi. Shundan keyin Xazayil Quddusga hujum qilish qaroridan qaytdi.

¹⁹Yoʻshning boshqa ishlari, butun faoliyati “Yahudo shohlari tarixi” kitobida yozilgan.

²⁰Shoh Yoʻshning a’yonlari isyon koʻtarib, uni Silloga boradigan yoʻlda — Millodagi[78] uyda oʻldirdilar.

²¹Uni oʻldirganlar Yoʻshning a’yonlaridan Shimat degan odamning oʻgʻli Yoʻzabad bilan Shoʻmer deganning oʻgʻli Yohuzabad edilar. Yoʻsh Dovud qal’asida, ota — bobolari yoniga dafn qilindi. Uning oʻrniga oʻgʻli Emoziyo shoh boʻldi.