Read Uzbek Muqaddas Kitob 4 Shohlar 15 Bible Online

4 Shohlar 15 - Uzbek Muqaddas Kitob bible

4 Shohlar 15

¹Yorubom Isroilda hukmronlik qilayotganiga yigirma yetti yil boʻlganda, Uzziyo[96] Yahudo shohi boʻldi. Uzziyo Emoziyoning oʻgʻli edi.

²Uzziyo shoh boʻlganda, oʻn olti yoshda edi. U Quddusda ellik ikki yil hukmronlik qildi. Onasi Qudduslik boʻlib, ismi Yoxoliyo edi.

³Uzziyo ham, otasi Emoziyo kabi, Egamiz oldida toʻgʻri ishlar qildi.

⁴Lekin sajdagohlar[97] hamon yoʻq qilinmagan, xalq oʻsha joylarda hali ham qurbonliklar keltirib, tutatqi tutatardi.

⁵Egamiz Uzziyoni jazolab, tuzalmas teri kasalligiga[98] yoʻliqtirdi. Uzziyo umrining oxirigacha bir uyda yolgʻiz yashadi. Yurtdagi xalqni ham, shoh saroyini ham oʻgʻli Yoʻtom boshqarardi.

⁶Uzziyoning boshqa ishlari, butun faoliyati “Yahudo shohlari tarixi” kitobida yozilgan.

⁷Uzziyo olamdan oʻtib, Dovud qal’asida, ota — bobolari yoniga dafn qilindi. Uning oʻrniga oʻgʻli Yoʻtom shoh boʻldi.

⁸Uzziyo Yahudoda shohlik qilayotganiga oʻttiz sakkiz yil boʻlganda, Zakariyo Samariyada Isroil shohi boʻldi va olti oy hukmronlik qildi. Zakariyo Yorubomning oʻgʻli edi.

⁹U ham, otalari kabi, Egamiz oldida qabih ishlar qilib, Isroilni gunohga botirgan Nabat oʻgʻli Yeribom qilgan gunohlarga ergashdi.

¹⁰Shallum degan odam Zakariyoga qarshi fitna uyushtirdi. Shallum Yobosh deganning oʻgʻli edi. Hammaning oldida Zakariyoni oʻldirib, oʻrniga oʻzi shoh boʻldi.

¹¹Zakariyoning boshqa ishlari “Isroil shohlari tarixi” kitobida yozilgan.

¹²Shunday qilib, Egamizning Yohuga: “Sening nasling toʻrtinchi avlodigacha Isroil taxtida oʻtiradi”, deb aytgan va’dasi amalga oshdi[99].

¹³Uzziyo Yahudoda shohlik qilayotganiga oʻttiz toʻqqiz yil boʻlganda, Shallum Isroil shohi boʻldi va Samariyada bir oy hukmronlik qildi.

¹⁴Manaxim degan odam Tirzadan[100] Samariyaga kelib, Shallumga suiqasd uyushtirdi. Manaxim Gadi deganning oʻgʻli edi. Manaxim Shallumni oʻldirib, oʻrniga oʻzi shoh boʻldi.

¹⁵Shallumning boshqa ishlari va u qilgan fitna haqida “Isroil shohlari tarixi” kitobida yozilgan.

¹⁶Oʻshanda Tifsax aholisi taslim boʻlmagani uchun Manaxim Tirzadan joʻnab ketdi — da, borib Tifsax shahri va uning atrofidagi qishloqlarni qirdi. Hatto homilador ayollarning qorinlarini yorib tashladi.

¹⁷Uzziyo Yahudoda shohlik qilayotganiga oʻttiz toʻqqiz yil boʻlganda, Gadi oʻgʻli Manaxim Isroil shohi boʻlgan edi. Manaxim Samariyada oʻn yil hukmronlik qildi.

¹⁸U Egamiz oldida qabih ishlar qilib, Isroilni gunohga botirgan Nabat oʻgʻli Yeribom qilgan gunohlarga umri boʻyi ergashdi.

¹⁹Shundan keyin Ossuriya shohi Tigʻlatpilasar[101] Isroil yerlariga hujum qildi. “Tigʻlatpilasar meni qoʻllab — quvvatlasin, oʻzim shoh boʻlib qolay” degan maqsadda Manaxim unga 2000 pud[102] kumush berdi.

²⁰Manaxim Isroildagi hamma boylarni odam boshiga ellik kumush tangadan[103] toʻlashga majbur qilib, Ossuriya shohiga berilgan kumushning oʻrnini qopladi. Shundan soʻng Ossuriya shohi Isroil yerlaridan chiqib, yurtiga qaytib ketdi.

²¹Manaximning boshqa ishlari, uning butun faoliyati “Isroil shohlari tarixi” kitobida yozilgan.

²²Manaxim olamdan oʻtgach, oʻrniga oʻgʻli Pakaxiyo shoh boʻldi.

²³Uzziyo Yahudoda shohlik qilayotganiga ellik yil boʻlganda, Pakaxiyo Samariyada Isroil shohi boʻldi va ikki yil hukmronlik qildi. Pakaxiyo Manaximning oʻgʻli edi.

²⁴Pakaxiyo Egamiz oldida qabih ishlar qilib, Isroilni gunohga botirgan Nabat oʻgʻli Yeribom qilgan gunohlarga ergashdi.

²⁵Pekax degan lashkarboshi Pakaxiyoga qarshi fitna uyushtirdi. Pekax Ramaliyo degan odamning oʻgʻli edi. Pekax yoniga Giladlik ellikta odamni olib, Samariyadagi shoh saroyining qal’asida Pakaxiyoni, Argob va Oreyni oʻldirdi. Uning oʻrniga Pekaxning oʻzi shoh boʻldi.

²⁶Pakaxiyoning boshqa ishlari, butun faoliyati “Isroil shohlari tarixi” kitobida yozilgan.

²⁷Uzziyo Yahudoda shohlik qilayotganiga ellik ikki yil boʻlganda, Pekax Samariyada Isroil shohi boʻldi va yigirma yil hukmronlik qildi.

²⁸U Egamiz oldida qabih ishlar qilib, Isroilni gunohga botirgan Nabat oʻgʻli Yeribom qilgan gunohlarga ergashdi.

²⁹Isroil shohi Pekax davrida Ossuriya shohi Tigʻlatpilasar[104] bostirib kelib, Isroilning Iyxon, Ovil — Bayt — Maxo, Yonox, Kedesh, Xazor shaharlari bilan birga Gilad, Jalila va butun Naftali hududlarini qoʻlga kiritdi hamda bu yerlardagi xalqni Ossuriyaga asir qilib olib ketdi.

³⁰Yahudo shohi Yoʻtom hukmronligining yigirmanchi yilida Xoʻsheya Pekaxga fitna uyushtirib, uni oʻldirdi va oʻrniga oʻzi shoh boʻldi. Xoʻsheya Elox deganning oʻgʻli edi.

³¹Pekaxning boshqa ishlari, butun faoliyati “Isroil shohlari tarixi” kitobida yozilgan.

³²Isroil shohi Pekax hukmronlik qilayotganiga ikki yil boʻlganda, Yoʻtom Yahudo shohi boʻldi. Yoʻtom Uzziyoning oʻgʻli edi.

³³Yoʻtom yigirma besh yoshida shoh boʻlib, Quddusda oʻn olti yil hukmronlik qildi. Onasining ismi Yerusha boʻlib, u Zodoʻxning qizi edi.

³⁴Yoʻtom, otasi Uzziyo kabi, Egamiz oldida toʻgʻri ishlar qildi.

³⁵Ammo sajdagohlar hamon yoʻq qilinmagan, xalq oʻsha sajdagohlarda qurbonliklar keltirib, tutatqi tutatardi. Yoʻtom Egamiz uyining Yuqori Darvozasini qurdi.

³⁶Yoʻtomning boshqa ishlari, butun faoliyati haqida “Yahudo shohlari tarixi” kitobida yozilgan.

³⁷Oʻsha kunlarda Oram shohi Ratan bilan Isroil shohi Pekaxning Yahudoga hujum qilishlariga Egamiz yoʻl qoʻyib berdi.

³⁸Yoʻtom olamdan oʻtib, bobosi Dovud qal’asida, ota — bobolari yoniga dafn qilindi. Uning oʻrniga oʻgʻli Oxoz shoh boʻldi.