Read Uzbek Muqaddas Kitob 4 Shohlar 21 Bible Online

4 Shohlar 21 - Uzbek Muqaddas Kitob bible

4 Shohlar 21

¹Manashe oʻn ikki yoshida shoh boʻlib, Quddusda ellik besh yil hukmronlik qildi. Onasining ismi Xafzibo edi.

²U Egamiz oldida qabih ishlar qildi. Egamiz Oʻz xalqi Isroilning oldidan quvib yuborgan xalqlarning jirkanch odatlariga ergashdi.

³Otasi Hizqiyo yoʻq qilgan sajdagohlarni[155] qaytadan barpo etdi. U Isroil shohi Axab kabi Baalga atab qurbongohlar qurdi, Asheraning[156] ustunini oʻrnatdi. Barcha samoviy jismlarga sajda etib xizmat qildi.

⁴Manashe Egamizning ulugʻlanishi kerak boʻlgan uyida begona xudolarga atab qurbongohlar qurdi.

⁵Egamiz uyining ikkala hovlisida ham jamiki samoviy jismlarga sajda qilish uchun qurbongohlar barpo qildirdi.

⁶Oʻgʻlini qurbonlik qilib, olovda kuydirdi[157], follar ochtirdi, ta’birchilarga e’tiqod qildi, arvoh chaqiruvchilarga maslahat soldi. Egamiz oldida koʻp qabih ishlar qilib, Uni gʻazablantirdi.

⁷Manashe Asheraga atab oʻyib ishlangan ustunni Egamizning uyiga qoʻydi. Egamiz bu uy toʻgʻrisida Dovud bilan uning oʻgʻli Sulaymonga shunday degan edi[158]: “Men bu uyni va Quddusni Isroil qavmlari yashaydigan maskanlar orasidan tanlab olganman. Men to abad oʻsha yerda ulugʻlanaman.

⁸Ular amrlarimni bitta qoldirmay bajarsalar, qulim Muso amr etgan hamma qonunlarga rioya qilsalar, Isroil xalqining ota — bobolariga Men bergan yerdan haydalishlariga yoʻl qoʻymayman.”

⁹Ammo xalq quloq solmadi. Manashe xalqni shu qadar yoʻldan ozdirdiki, Kan’on yurtidan Egamiz yoʻqotib yuborgan xalqlardan ham koʻra, koʻproq qabih ishlar qildilar.

¹⁰Egamiz Oʻz qullari — paygʻambarlar orqali shunday dedi:

¹¹— Yahudo shohi Manashe jirkanch ishlar qilgani, oʻzidan oldingi Amor xalqlaridan[159] ham battar qabihliklar qilgani, butlar yasab, Yahudo xalqini gunohga botirgani uchun

¹²Men, Isroil xalqining Xudosi — Egangiz, aytmoqdaman: “Quddusning va Yahudo xalqining boshiga shunday falokat keltiramanki, bu falokatni eshitganlarning boshidan hushi uchadi.

¹³Samariyaga qarshi ishlatgan oʻlchov ipini va Axabning xonadoniga qarshi ishlatgan shoqulni[160] Quddusga qarshi ishlataman. Quddusni bu qabih xalqdan tozalab tashlayman, uni toza kosaday toʻntarib qoʻyaman.

¹⁴Oʻz xalqimning omon qolganlaridan yuz oʻgiraman va gʻanimlarining qoʻliga taslim ettiraman. Gʻanimlar Quddus aholisini talon — taroj qiladi, oʻlja qilib olib ketadi.

¹⁵Chunki ular oldimda qabih ishlar qildilar. Ota — bobolari Misrdan chiqqan kundan bugungacha bu xalq Meni gʻazablantirib keladi.”

¹⁶Manashe shunchalik koʻp aybsiz qon toʻkdiki, Quddusni bu boshidan narigi boshigacha qonga botirdi. Qon toʻkishdan tashqari, Yahudo xalqini gunohga botirdi, ular Egamiz oldida qabihliklar qildilar.

¹⁷Manashening boshqa ishlari, butun faoliyati, qilgan gunohlari haqida “Yahudo shohlari tarixi” kitobida yozilgan.

¹⁸Manashe olamdan oʻtdi va saroyidagi Uzzo degan boqqa dafn etildi. Oʻrniga oʻgʻli Omon shoh boʻldi.

¹⁹Omon shoh boʻlganda yigirma ikki yoshda edi. U Quddusda ikki yil hukmronlik qildi. Onasining ismi Mashullamot boʻlib, Yotbaxlik Xoruzning qizi edi.

²⁰Omon ham, otasi Manashe kabi, Egamiz oldida qabih ishlar qildi.

²¹Xuddi otasi yurgan yoʻllardan yurib, oʻsha butlarga xizmat etib, sajda qildi.

²²Ota — bobolarining Xudosi — Egamizdan yuz oʻgirib, Uning yoʻlidan yurmadi.

²³Shoh Omonning a’yonlari fitna uyushtirib uni oʻz saroyida oʻldirdilar.

²⁴Yahudo xalqi oʻz shohi Omonga fitna uyushtirganlarning hammasini oʻldirib, oʻrniga oʻgʻli Yoʻshiyoni shoh qilib koʻtardi.

²⁵Omonning boshqa ishlari “Yahudo shohlari tarixi” kitobida yozilgan.

²⁶Omon Uzzo bogʻida, ota — bobolari xilxonasiga dafn etildi. Uning oʻrniga oʻgʻli Yoʻshiyo shoh boʻldi.