Read Uzbek Muqaddas Kitob 4 Shohlar 24 Bible Online

4 Shohlar 24 - Uzbek Muqaddas Kitob bible

4 Shohlar 24

¹Yahudo shohi Yohayiqim hukmronligi davrida Bobil shohi Navuxadnazar[184] Yahudoga hujum qildi. Yohayiqim uch yil uning hukmdorligi ostida boʻldi. Oxiri u Navuxadnazarga qarshi isyon koʻtardi.

²Egamiz Oʻz qullari paygʻambarlar orqali aytganiga koʻra, Yahudo xalqiga qarshi Bobil[185], Oram, Moʻab va Ommon bosqinchi toʻdalarini yuborib, bu yurt xalqini yoʻq qilmoqchi boʻldi.

³Egamizning amri bilan Yahudo xalqining boshiga koʻp kulfatlar keldi. Manashe qilgan barcha gunohlari uchun, aybsizlarning qonini toʻkkani uchun Egamiz Yahudo xalqini Oʻz huzuridan haydamoqchi boʻldi. Manashe Quddusni aybsizlarning qoniga botirgan edi. Egamiz Manasheni bu qilmishi uchun kechirmoqchi emasdi.

⁵Yohayiqimning boshqa ishlari, butun faoliyati “Yahudo shohlari tarixi” kitobida yozilgan.

⁶Yohayiqim olamdan oʻtgach, oʻrniga oʻgʻli Yohayixin shoh boʻldi.

⁷Misr fir’avni qaytib oʻz yurtidan tashqariga chiqmadi[186]. Bobil shohi Misrning shimoliy chegarasi — Misr chegarasidagi irmoqdan[187] tortib, Furot daryosigacha fir’avnga qarashli boʻlgan hamma yerlarni bosib olgan edi.

⁸Yohayixin oʻn sakkiz yoshida shoh boʻlib, Quddusda uch oy hukmronlik qildi. Onasining ismi Naxushta boʻlib, Qudduslik Elnatanning qizi edi.

⁹Yohayixin ham, otasi kabi, Egamiz oldida qabih ishlar qildi.

¹⁰Oʻsha paytda Bobil shohi Navuxadnazarning lashkari Quddusni qamal qildi.

¹¹Qamal paytida Navuxadnazarning oʻzi Quddusga keldi.

¹²Yahudo shohi Yohayixinning oʻzi, onasi, xizmatkorlari, lashkarboshilari, saroy a’yonlari Navuxadnazarga taslim boʻldilar. Bobil shohi hukmronligining sakkizinchi yilida[188] Yohayixin asirga olindi.

¹³Egamizning aytgani boʻyicha[189], Navuxadnazar Egamizning uyidagi va shoh saroyidagi barcha xazinalarni boʻshatdi. Isroil shohi Sulaymon Egamizning uyi uchun yasattirgan oltin ashyolarning hammasini maydaladi.

¹⁴Jamiki Quddus aholisini, beklarni, jasur sipohlarni, hunarmandlarni, temirchilarni, hammasi boʻlib oʻn mingta odamni asir qilib olib ketdi. Yahudo xalqining eng qashshoqlaridan boshqa hech kim bu yurtda qolmadi.

¹⁵Bobil shohi Navuxadnazar Yohayixinni asir qilgandan keyin, Bobilga olib keldi. Yohayixin bilan birga uning onasini, xotinlarini, a’yonlarini va yurtning obroʻli odamlarini ham Quddusdan Bobilga haydab keldi.

¹⁶Bundan tashqari, hamma jasur sipohlarni — yetti mingta sipohni, jang qilishga qodir mingta hunarmand va temirchini ham asir qilib olib ketdi.

¹⁷Yohayixinning oʻrniga esa amakisi Mattaniyoni shoh qilib tayinladi va uning otini oʻzgartirib, Zidqiyo qoʻydi.

¹⁸Zidqiyo yigirma bir yoshida shoh boʻldi va Quddusda oʻn bir yil hukmronlik qildi. Onasining ismi Xamutal boʻlib, Libnalik Yeremiyoning[190] qizi edi.

¹⁹Zidqiyo ham, Yohayiqim kabi, Egamiz oldida qabih ishlar qilgani uchun

²⁰Egamiz Quddus va Yahudo xalqidan gʻoyat gʻazablangan, oqibatda ularni Oʻz huzuridan quvib yuborgan edi. Zidqiyo Bobil shohiga qarshi isyon koʻtardi.