Read Uzbek Muqaddas Kitob 4 Shohlar 25 Bible Online

4 Shohlar 25 - Uzbek Muqaddas Kitob bible

4 Shohlar 25

¹Zidqiyo hukmronligining toʻqqizinchi yili oʻninchi oyining[191] oʻninchi kunida Bobil shohi Navuxadnazar Quddusga qarshi butun lashkarini tortib kelib, shaharni qamal qildi. Shahar devori atrofida qamal inshootlarini[192] yasatdi.

²Shoh Zidqiyo hukmronligining oʻn birinchi yiligacha shahar qamalda qoldi.

³Toʻrtinchi[193] oyning[194] toʻqqizinchi kuni shaharda ocharchilik shu qadar kuchaydiki, xalq bir burda nonga zor boʻldi.

⁴Bobilliklar[195] Quddus devorini yorib kirdilar. Ular Quddusni har tomondan qurshab olishgan boʻlsalar — da, Yahudo sipohlari shoh bilan birga qochib ketdilar. Ular tunda saroyning bogʻi yaqinidagi ikki devor orasidagi darvozadan chiqib, Iordan vodiysi[196] tomonga qochgan edilar.

⁵Ammo Bobil sipohlari shohning orqasidan quvib, Yerixo tekisligida unga yetib oldilar. Butun lashkar esa shohni tashlab qochib ketdi.

⁶Bobil sipohlari shoh Zidqiyoni ushlab, Rivlo shahriga[197] Bobil shohi huzuriga olib keldilar. Bobil shohi Zidqiyoni hukm qildi.

⁷Zidqiyoning koʻzi oldida oʻgʻillarini qatl qilib, oʻzining koʻzlarini oʻyib oldilar. Keyin uni kishanlab, Bobilga olib ketdilar.

⁸Beshinchi oyning yettinchi kunida, Bobil shohi Navuxadnazar hukmronligining oʻn toʻqqizinchi yilida[198] Bobil shohining amaldori — qoʻriqchilar sardori Nabizaradon Quddusga kirdi.

⁹U Egamizning uyiga, shoh saroyiga, har bir hashamatli imoratga, Quddusdagi hamma uylarga oʻt qoʻydi.

¹⁰Qoʻriqchilar sardori boshchiligida butun Bobil lashkari Quddus devorlarini yiqitdi.

¹¹Nabizaradon qolgan hamma xalqni — shaharda tirik qolganlarni, Bobil shohi tomonga oʻtgan qochoqlarni asir qilib olib ketdi.

¹²Uzumchilik va dehqonchilik bilan mashgʻul boʻlsinlar deya, hech vaqosi yoʻq, qashshoq odamlardan ba’zilarinigina qoldirdi, xolos.

¹³Bobilliklar Egamizning uyidagi bronza ustunlarni, aravalarni, bronza hovuzni[199] parchalab, bronzaning hammasini Bobilga olib ketdilar.

¹⁴Egamizning uyida xizmat paytida ishlatiladigan idishlarni — qozonlarni, kuraklarni, qaychilar va kurakchalarni, barcha bronza ashyolarni ham olib ketdilar.

¹⁵Nabizaradon toza oltin va kumush olovkuraklarni, togʻorachalarni, hamma oltin va kumush buyumlarni olib ketdi.

¹⁶Egamizning uyi uchun Sulaymon qildirgan ikki ustun, hovuz va aravalarga behisob bronza sarf qilingan edi.

¹⁷Har bir ustunning balandligi 18 tirsak[200] boʻlib, tepasida bronzadan yasalgan ustunqosh bor edi. Ikkala ustunqoshning balandligi 5 tirsakdan[201], atroflari bronzadan yasalgan toʻrsimon bezak va anor[202] tasviri bilan bezatilgan edi.

¹⁸Qoʻriqchilar sardori Nabizaradon oliy ruhoniy Sarayoni, undan keyingi ruhoniy Zafaniyoni va uchta darvozabonni ham asirga oldi.

¹⁹Quddusda qolgan sipohlarning lashkarboshisini, shohning beshta shaxsiy maslahatchisini, xalqni lashkar safiga yozgan lashkarboshining kotibini va xalqdan shaharda qolgan oltmish kishini ham bandi qildi.

²⁰Ularning hammasini Rivlo shahriga — Bobil shohi huzuriga olib keldi.

²¹Bobil shohi ularni Xomat yurtida — Rivloda qatl qildi. Shunday qilib, Yahudo xalqi oʻz yurtidan surgun boʻldi.

²²Bobil shohi Navuxadnazar Yahudoda qolgan xalq ustidan Gadaliyoni hokim qilib tayinladi. Shofonning nabirasi Gadaliyo Oxixamning oʻgʻli edi.

²³Bobil shohi Gadaliyoni hokim qilib tayinlaganini lashkarboshilar va sipohlar eshitishgach, Mispaxga[203], Gadaliyoning huzuriga keldilar. Kelganlar Nataniyo oʻgʻli Ismoil, Kariyox oʻgʻli Yoʻxanon, Natufolik Tanxumat oʻgʻli Sarayo, Maxolik Yazaniyo va ularning odamlari edi.

²⁴Gadaliyo kelganlarga va ularning odamlariga ont ichib, shunday dedi: “Bobilliklarga tobe boʻlishdan qoʻrqmanglar. Bu yurtda oʻrnashib, Bobil shohiga xizmat qilaveringlar. Shunda sizlarga yaxshi boʻladi.”

²⁵Oʻsha yilning yettinchi oyida[204] shoh urugʻidan boʻlgan Ismoil oʻnta odami bilan birga Mispaxga borib, Gadaliyoni oʻldirdi. Ismoil Elishamaning nabirasi, Nataniyoning oʻgʻli edi. U Mispaxda Gadaliyo bilan birga boʻlgan Yahudo odamlarini va Bobilliklarni ham qilichdan oʻtkazdi.

²⁶Shundan keyin jamiki xalq — boyu kambagʻal Bobilliklardan qoʻrqib, lashkarboshilar bilan birga, Misrga qochib ketdi.

²⁷Yahudo shohi Yohayixin Bobilga surgun qilinganiga oʻttiz yetti yil boʻlganda, Bobil taxtiga Evilmardux oʻtirdi[205]. Evilmardux oʻsha yilning oʻn ikkinchi oyi yigirma yettinchi kuni[206] Yahudo shohi Yohayixinni zindondan ozod qildi.

²⁸Unga yaxshi munosabatda boʻldi, Bobilga surgun qilingan boshqa shohlardan koʻra, balandroq martaba berdi.

²⁹Shunday qilib, Yohayixin zindon kiyimlarini yechdi. Umr boʻyi doimo Bobil shohining dasturxonidan taom yedi.

³⁰Umrining oxirigacha shoh tarafidan kundalik ehtiyoji har doim qondirildi.