Read Uzbek Muqaddas Kitob 4 Shohlar 8 Bible Online

4 Shohlar 8 - Uzbek Muqaddas Kitob bible

4 Shohlar 8

¹Elishay oʻzi tiriltirgan bolaning[48] onasiga shunday degan edi: — Tur oʻrningdan, oʻzing va xonadoning ahli bilan birga joʻna. Qayerda yashay olsang, oʻsha yerda yashayver, chunki Egamiz yurtga yetti yil qahatchilik yuborishga qaror qildi.

²Ayol paygʻambarning aytganlariga quloq soldi. Uning oʻzi va xonadoni ahli Filistlar yeriga borib, u yerda yetti yil istiqomat qildi.

³Oradan yetti yil oʻtgach, oʻsha ayol Filistlar yeridan qaytib keldi. Soʻng uyimni va dalamni qaytarib olay deb, shoh huzuriga keldi.

⁴Shu paytda shoh Elishayning xizmatkori Gaxazi bilan gaplashayotgan edi: — Elishay qilgan hamma ajoyibotlar haqida menga aytib ber — chi, — dedi shoh.

⁵Paygʻambar oʻlikni qanday tiriltirganini Gaxazi shohga gapirayotgan edi, haligi ayol shohdan oʻz uyi va dalasini qaytarib olish uchun soʻrab kelib qoldi. — Shoh hazratlari! — dedi Gaxazi. — Bu oʻsha ayoldir. Ana, Elishay tiriltirgan oʻgʻli ham yonida turibdi.

⁶Shoh ayoldan boʻlib oʻtgan voqealarni soʻradi. Ayol shohga hammasini aytib berdi. Shundan soʻng shoh saroy amaldorlaridan birini chaqirib, ayol bilan birga joʻnatar ekan, amaldorga amr berdi: — Bu ayolning hamma narsasi, bu yurtdan chiqib ketgan kundan boshlab bugungacha olingan jamiki daromadi bilan birga dalasi qaytarilsin.

⁷Elishay Damashqqa keldi. Oram shohi Banhadad xasta edi. “Paygʻambar shu yerga kelibdi”, deb shohga xabar yetkazishdi.

⁸Shoh shunda Xazayil degan odamga[49] dedi: — Birorta hadya olgin — da, paygʻambarga peshvoz chiq. U orqali Egamizdan soʻrab koʻr — chi, men shu kasallikdan xalos boʻlarmikanman.

⁹Xazayil Damashqdagi eng yaxshi hadyalardan qirqta tuyaga yuklab, Elishayni kutib olgani ketdi. Elishayning oldiga kelgach, unga shunday dedi: — Oram shohi — qulingiz Banhadad meni sizning huzuringizga yubordi. “Shu kasallikdan xalos boʻlarmikanman yoki yoʻqmikan, bilib kel”, dedi.

¹⁰— Shohning huzuriga borib, albatta sogʻayib ketarkansiz, deb ayt, — dedi Elishay Xazayilga, — lekin Egamiz menga ayon qildi: shoh oʻladi.

¹¹Xazayil uyatdan qizarguncha, Elishay uning yuziga tik qarab turaverdi. Keyin paygʻambar yigʻlay boshladi.

¹²— Hazratim nechun yigʻlayaptilar? — deb soʻradi Xazayil. — Isroil xalqiga qiladigan yovuzliklaringni bilganim uchun yigʻlayapman, — dedi Elishay. — Sen Isroil xalqining qal’alariga oʻt qoʻyasan, yigitlarini qilichdan oʻtkazasan, goʻdaklarini yerga urib oʻldirasan, homilador ayollarning qornini yorib tashlaysan.

¹³— Koʻppakdan farq qilmaydigan men, qulingiz, kim boʻlibmanki, shunaqa ishlarni qila olar ekanman?! — dedi Xazayil. — Egamiz menga ayon qildi: sen Oram shohi boʻlasan[50], — deya javob berdi Elishay.

¹⁴Xazayil Elishayning huzuridan chiqib, hukmdori Banhadadning yoniga qaytib keldi. — Elishay senga nima dedi? — soʻradi shoh Xazayildan. — U menga aytdiki, siz albatta sogʻayib ketarkansiz, — deb javob berdi Xazayil.

¹⁵Ertasi kuni Xazayil koʻrpani olib, suvga botirdi — da, hoʻl koʻrpani shohning yuziga yopib, uni boʻgʻdi. Shunday qilib, Xazayil shohni oʻldirib, uning oʻrniga oʻzi shoh boʻldi.

¹⁶Yohushafat hali Yahudo shohi boʻlib turganda, uning oʻgʻli Yohuram ham taxtga oʻtirdi[51]. Bu voqea Isroil shohi Yoram hukmronligining beshinchi yilida yuz berdi.

¹⁷Yohuram Yahudo shohi boʻlganda, oʻttiz ikki yoshda edi. U Quddusda sakkiz yil hukmronlik qildi.

¹⁸Xotini Axabning qizi boʻlgani uchun Yohuram ham, Axab xonadoni singari, Isroil shohlari yoʻlidan yurib, Egamiz oldida qabihliklar qildi.

¹⁹Egamiz Oʻz quli Dovud haqi — hurmati uchun Yahudoni halokatga uchratishni istamadi, chunki Egamiz Dovudga: “Sening naslingga to abad soʻnmaydigan chiroq beraman”, deb va’da qilgan edi.

²⁰Yohuram davrida Edom Yahudo shohligiga qarshi isyon qildi. Edom xalqi oʻzlarining mustaqil shohligini qurdilar.

²¹Shundan soʻng Yohuram[52] hamma jang aravalarini boshlab Zoirga bordi. Edom lashkari Yohuramni va uning jang aravalari sardorlarini oʻrab olgan edi, lekin Yohuram tunda hujum qilib, qamalni yorib chiqdi. Yahudo lashkari uylariga qochib ketdi.

²²Oʻsha paytdan beri hozirgacha[53] Edom xalqi Yahudo hukmronligidan ozoddir. Oʻsha davrda Libna shahri[54] ham isyon koʻtargan edi.

²³Yohuramning boshqa ishlari, butun faoliyati “Yahudo shohlari tarixi” kitobida yozilgan.

²⁴Yohuram olamdan oʻtdi. U Dovud qal’asida, ota — bobolari yoniga dafn qilindi. Uning oʻrniga oʻgʻli Oxoziyo shoh boʻldi.

²⁵Isroil shohi Yoram oʻn ikkinchi yil shohlik qilayotganda, Oxoziyo Yahudo shohi boʻldi. U Yohuramning oʻgʻli edi.

²⁶Oxoziyo taxtga oʻtirganda, yigirma ikki yoshda edi. U Quddusda bir yil shohlik qildi. Onasining ismi Otaliyo boʻlib, Isroil shohi Omrining nevarasi edi.

²⁷Oxoziyo ham Axab xonadonining yoʻlidan ketdi. Axab nasliga oʻxshab, Egamiz oldida qabihliklar qildi. Chunki u Axab xonadoniga qarindosh edi.

²⁸Oxoziyo bilan Yoram birga Giladdagi[55] Ramoʻtga borib, Oram shohi Xazayilga qarshi urush ochdi. Shoh Yoram shu urushda yarador boʻldi.

²⁹U yarasini davolatish uchun Yizril shahriga[56] qaytib keldi. Yahudo shohi Oxoziyo esa yaralangan Yoramni koʻrgani Yizrilga bordi.