Read Uzbek Muqaddas Kitob 1 Solnomalar 13 Bible Online

1 Solnomalar 13 - Uzbek Muqaddas Kitob bible

1 Solnomalar 13

¹Dovud har bir lashkarboshisi — mingboshi va yuzboshilari bilan maslahatlashdi.

²Soʻng butun Isroil jamoasiga dedi: “Shoh Shoul davrida biz Xudoyimizning Ahd sandigʻiga e’tiborsiz boʻlib keldik[139]. Kelinglar, Ahd sandigʻini qaytarib olib kelaylik. Butun Isroil boʻylab xabar joʻnatib yurtdagi jamiki qarindosh — urugʻlarimizni shu yerga yigʻaylik, oʻz shaharlarida yashaydigan ruhoniylaru levilar ham oldimizga yigʻilib kelishsin. Agar siz bunga rozi boʻlsangiz va bu Egamiz Xudoning irodasi boʻlsa, shuni qilaylik.”

⁴Butun jamoaga bu taklif ma’qul tushib, hamma taklifga rozi boʻldi.

⁵Shunday qilib, Dovud Xudoning Sandigʻini Xirat — Yoʻrimdan[140] Quddusga olib kelish uchun butun yurtdagi — Misrdagi Shixor daryosidan tortib, to shimoldagi Levo — Xomat shahriga[141] qadar boʻlgan joylardagi jamiki Isroil xalqini toʻpladi.

⁶Ular birgalikda Xudoning Ahd sandigʻini olib kelish uchun Yahudodagi Baalax, ya’ni Xirat — Yoʻrim shahriga yoʻl olishdi. Ahd sandigʻi ikki karub[142] orasida taxt qurgan Egamizning nomi bilan atalgan edi.

⁷Xudoning Sandigʻi Abunadavning uyida edi. Sandiq yangi arava ustiga ortilgach, Uzzox bilan Oxyo[143] aravani haydab ketishdi.

⁸Dovud va jamiki Isroil xalqi Xudoning huzurida berilib oʻyin — kulgi qilayotgan edilar. Ular lira, arfa, childirma, zil va karnaylar chalib, qoʻshiqlar bilan bu voqeani bayram qilayotgan edilar.

⁹Ular Noxun[144] degan odamning xirmoniga yetganlarida, hoʻkizlar qoqilib ketdi. Uzzox Sandiqni ushlab qolmoqchi boʻlib qoʻlini uzatdi.

¹⁰Lekin Uzzox Ahd sandigʻiga qoʻl uzatgani uchun[145], Egamiz undan gʻazablandi. Uzzoxni urib, jonini oldi. Uzzox oʻsha yerda — Xudoning oldida jon berdi.

¹¹Egamiz Uzzoxni nobud qilgani uchun Dovud qattiq gʻazablandi. Oʻsha kundan buyon shu joy “Paraz — Uzzox”[146] deb aytiladi.

¹²Dovud oʻsha kuni Xudodan qoʻrqib: “Qanday qilib Xudoning Sandigʻini oʻzim bilan olib kela olar ekanman?” deb oʻyladi.

¹³U Sandiqni oʻzi bilan Dovud qal’asiga olib bormay, uni Gatlik[147] Obidadomning uyiga tashlab ketdi.

¹⁴Xudoning Sandigʻi u yerda uch oy turdi. Obidadomning xonadoniga va jamiki mol — mulkiga Egamiz baraka berdi.