Read Uzbek Muqaddas Kitob 1 Solnomalar 15 Bible Online

1 Solnomalar 15 - Uzbek Muqaddas Kitob bible

1 Solnomalar 15

¹Dovud oʻzi uchun Dovud qal’asida uylar barpo qildi. Xudoning Sandigʻi uchun ham joy tayyorlab, chodir qurdi.

²Keyin u shunday amr berdi: “Xudoning Sandigʻini faqat levilar koʻtarib yursin. Zero, Egamiz Oʻz Sandigʻini koʻtarib yurish uchun levilarni tanlagandir. Ularni Oʻziga abadiy xizmat qilish uchun tanlab olgandir.”

³Dovud oʻzi tayyorlagan joyga Egamizning Sandigʻini olib kelish uchun jamiki Isroil xalqini Quddusda toʻpladi.

⁴Soʻngra quyidagi Horun naslini va levilarni yigʻdi:

⁵Qohot naslidan — urugʻboshi Uriyol va u bilan birga uning 120 nafar qarindoshi,

⁶Marori naslidan — urugʻboshi Osoyoh va u bilan birga 220 nafar qarindoshi,

⁷Gershon naslidan — urugʻboshi Yoʻel va u bilan birga 130 nafar qarindoshi,

⁸Elizofon naslidan — urugʻboshi Shamayo va u bilan birga 200 nafar qarindoshi,

⁹Xevron naslidan — urugʻboshi Eliyol va u bilan birga 80 nafar qarindoshi,

¹⁰Uziyol naslidan — urugʻboshi Ominadav va u bilan birga 112 nafar qarindoshi.

¹¹Dovud ikkala ruhoniyni — Zodoʻx bilan Abuatarni, levilardan Uriyol, Osoyoh, Yoʻel, Shamayo, Eliyol va Ominadavni chaqirib,

¹²ularga dedi: “Sizlar Levi qabilasining urugʻboshilarisiz. Shunday ekan, Isroil xalqining Xudosi — Egamizning Sandigʻini men tayyorlagan joyga olib kela olishingiz uchun oʻzlaringizni va levi birodarlaringizni poklanglar[153].

¹³Oldingi safar Sandiqni levilar olib kelmagani uchun Egamiz Xudo bizdan qattiq gʻazablangan edi[154]. Ha, biz Undan Sandiqni qanday olib kelishimiz kerakligini soʻramagan edik.”

¹⁴Ruhoniylar va levilar Isroil xalqining Xudosi — Egamizning Sandigʻini olib kelish uchun oʻzlarini pokladilar.

¹⁵Ular Egamizning Muso orqali bergan amriga muvofiq[155], Xudoning Sandigʻini xodalar bilan yelkalariga ortib, koʻtarib ketdilar.

¹⁶Bulardan tashqari, Dovud Levi qabilasining urugʻboshilariga, qarindoshlaringiz orasidan sozandalarni tayinlang, deb buyurgan edi. Ular arfa, lira va zillarni chalib, bu musiqa asboblarining joʻrligida shodiyona qoʻshiqlar aytishlari kerak edi.

¹⁷Levilar Marori urugʻidan quyidagi sozandalarni tayinlagan edilar: Yoʻel oʻgʻli Xaman, Barxiyo oʻgʻli Osif va Qushayo oʻgʻli Etxan.

¹⁸Ularning yordamchilari qilib quyidagilar tayinlangan edi: Zakariyo, Yaziyol[156], Shamiromoʻt, Yoxiyol, Unno, Eliyob, Binayo, Masiyo, Mattitiyo, Elifaleh, Mixniyo hamda darvozabonlar Obidadom va Yaviyol.

¹⁹Sozandalardan Xaman, Osif va Etxan bronza zillar chalishlari kerak edi.

²⁰Zakariyo, Aziyol, Shamiromoʻt, Yoxiyol, Unno, Eliyob, Masiyo va Binayo arfalarni chalishlari kerak edi[157].

²¹Mattitiyo, Elifaleh, Mixniyo, Obidadom, Yaviyol va Ozaziyo esa sakkiz torli liralarni chalib, kuy ijrosida yetakchilik qilishlari kerak edi.

²²Levilarning boshligʻi Xonaniyo mohir sozanda boʻlgani uchun uni qoʻshiqchilar rahbari qilib tayinlagan edilar.

²³Ahd sandigʻini qoʻriqlash uchun Barxiyo, Elqana, Obidadom va Yoxiyo tayinlangan edilar. Ruhoniylar Shabaniyo, Yoshafat, Natanil, Emosay, Zakariyo, Binayo va Eliazar Xudoning Sandigʻi oldida karnaylar chalib borishlari kerak edi.

²⁵Dovud, Isroil oqsoqollari va mingboshilar Egamizning Ahd sandigʻini Obidadomning uyidan olib kelish uchun katta tantana bilan ketdilar.

²⁶Ahd sandigʻini koʻtarib kelayotgan levilarga Xudoning Oʻzi yordam berdi. Shu sababdan ular yettita buqa va yettita qoʻyni qurbonlik qildilar.

²⁷Sandiqni koʻtarib kelayotgan barcha levilar, qoʻshiqchilar va qoʻshiqchilar rahbari Xonaniyo singari, Dovud ham mayin zigʻirdan toʻqilgan rido kiyib olgan edi. Dovud ridodan tashqari ruhoniylarning muqaddas libosini[158] ham kiygan edi.

²⁸Shunday qilib, butun Isroil xalqi sevinchli xitoblar bilan, arfa va lira kuylari hamda burgʻu, karnay, zillar sadolari ostida Egamizning Ahd sandigʻini olib keldi.

²⁹Ular Egamizning Sandigʻini Dovud qal’asiga olib kirishayotganda, Shoulning qizi Mixal[159] derazadan qarab turgan edi. U sakrab oʻynayotgan shoh Dovudni koʻrdi — yu, oʻz koʻnglida uni past koʻrdi.