Read Uzbek Muqaddas Kitob 1 Solnomalar 17 Bible Online

1 Solnomalar 17 - Uzbek Muqaddas Kitob bible

1 Solnomalar 17

¹Dovud oʻz saroyiga oʻrnashib olgach, Natan paygʻambarga dedi: — Qarang, men sadr yogʻochidan qurilgan uyda yashayapman, Egamizning Ahd sandigʻi esa chodirda turibdi.

²— Koʻnglingda nima boʻlsa, shuni qilaver, Xudo sen bilan, — dedi Natan.

³Oʻsha kuni kechasi Natanga Egamizning soʻzi ayon boʻldi:

⁴“Qulim Dovudning oldiga borgin — da, unga shu gaplarni yetkaz: «Egam shunday demoqda: istiqomat qilishim uchun uyni Menga sen qurmaysan.

⁵Isroil xalqini Misrdan olib chiqqanimdan to shu kungacha biror uyda yashagan emasman. U yerdan — bu yerga koʻchib yurdim, chodirda maskan qildim.

⁶Men hech qachon Isroil xalqining hakamlariga[167] shikoyat qilmadim. Xalqimga choʻponlik qilish vazifasini ularning zimmasiga yuklagan boʻlsam — da, hech qachon ularning birortasiga: ‘Nima uchun Menga sadr daraxti yogʻochidan uy qurib bermadingizlar?’ deb aytmadim.»

⁷Endi qulim Dovudga ayt: «Sarvari Olam shunday demoqda: Men seni yaylovlardagi qoʻy suruvi orasidan tanlab olib, xalqim Isroilga hukmdor qildim.

⁸Qayerga borsang, sen bilan boʻldim, hujum qilganingda, hamma gʻanimlaringni yoʻq qildim. Endi sening nomingni olamdagi ulugʻ odamlarning nomi singari mashhur qilaman.

⁹Xalqim Isroilga ilk hakamlarni tayinlaganimdan buyon vijdonsiz odamlar xalqimni ezib keldilar. Endi xalqim Isroil uchun bir yurt tayin etib, ularni oʻsha yerga oʻtqazaman. Ular oʻz yurtida istiqomat qilishadi, boshqa behalovat boʻlishmaydi. Hamma gʻanimlaringni senga boʻysundiraman. Men, Egang, sen uchun bir xonadon barpo etaman, deb aytmoqdaman.

¹¹Sen olamdan oʻtib, ota — bobolaring yoniga dafn qilinganingdan keyin ham, Men oʻgʻillaringdan birini, pushti kamaringdan bino boʻlgan farzandingni shoh qilib, uning shohligini mustahkamlayman.

¹²Menga atab uyni u quradi. Men esa uning taxtini to abad mustahkam qilaman.

¹³Men unga ota boʻlaman, u esa Menga oʻgʻil boʻladi. Men sendan oldingi shohni marhamatimdan mahrum qilgan edim. Lekin oʻgʻlingdan hech qachon marhamatimni darigʻ tutmayman.

¹⁴Men uni Oʻz xonadonim va shohligim ustiga abadiy oʻtqazaman, uning taxti to abad mustahkam boʻladi.»”

¹⁵Xudo ayon qilganlarning hammasini Natan Dovudga aytdi.

¹⁶Shundan keyin shoh Dovud Egamizning huzurida oʻtirib[168], shunday ibodat qildi: “Ey Parvardigor Egam! Men kim boʻlibman, xonadonim nima boʻlibdiki, Sen meni bu qadar ulugʻlading?!

¹⁷Buning ustiga, ey Xudo, Sen kelajak zamonda yuz beradigan voqealarni xabar qilding. Bu qulingning xonadoni uchun koʻp va’da berding. Nazaringda meni ulugʻ odamday bilding[169], ey Parvardigor Egam!

¹⁸Sen bu qulingni shuhratga erishtirding, Senga bundan ortiq nima ham deya olardim?! Axir, bu qulingni bilasan — ku.

¹⁹Ey Egam, Sen bu qulingning haqi — hurmati uchun Oʻz xohishingga muvofiq, shunday ulugʻvor ish qilding. Bu buyuk va’dalaringni bizga ayon qilding.

²⁰Senga oʻxshagan boshqa xudo haqida hech qachon eshitmaganmiz. Sening aslo oʻxshashing yoʻq. Ey Egam, Sendan oʻzga Xudo yoʻq!

²¹Xalqing Isroilga oʻxshashi yoʻq! Ey Xudoyim, boshqa qaysi xalqni Sen qullikdan xalos qilib, Oʻzingning xalqing qilding?! Sen Oʻz xalqingni Misrdan olib chiqib, butun olamga shuhratingni yoyding. Buyuk va ajoyib ishlaring orqali xalqing oldidan begona xalqlarni quvding.

²²Xalqing Isroilni to abad Oʻzingning xalqing qilding. Ey Egam, Sen ularning Xudosi boʻlding.

²³Ey Egam! Bu qulingga va uning xonadoniga qarata aytgan soʻzingda to abad tur, bergan va’dangni bajar,

²⁴toki odamlar, Sarvari Olam — Isroil xalqining Xudosi ekan, deb nomingni to abad maqtab yursinlar. Ha, quling Dovudning xonadonini Oʻzing har doim mustahkam qilgin.

²⁵Zotan, Sen, ey Xudoyim, bu qulingga, sening xonadoningni barpo etaman, deb ayon etgansan! Shu sababdan bu quling Senga ibodat qilishga jur’at etdi.

²⁶Ey Egam! Sen Xudosan. Sen bu qulingga ana shunday ezgu narsalarni va’da qilgansan.

²⁷Agar Oʻzing ma’qul koʻrsang, bu qulingning xonadoniga marhamat qilgin, toki Sening huzuringda to abad tursin. Zotan, Sen marhamat qilgan xonadon, ey Egam, to abad marhamatga sazovor boʻlgʻay.”