Read Uzbek Muqaddas Kitob 1 Solnomalar 18 Bible Online

1 Solnomalar 18 - Uzbek Muqaddas Kitob bible

1 Solnomalar 18

¹Birmuncha vaqt oʻtgach, Dovud yana Filistlarga hujum qilib, ularni magʻlub qildi. Gat shahri[170] va uning atrofidagi qishloqlarni Filistlardan tortib oldi.

²Soʻng Moʻab xalqini ham magʻlub qildi. Moʻab xalqi Dovudga qaram boʻlib, oʻlpon toʻlaydigan boʻlishdi.

³Zoʻvo[171] shohi Hadadzar Furot daryosi boʻylariga yurish qilib, oʻsha yerlarda oʻz hokimiyatini oʻrnatmoqchi boʻlgan bir paytda Dovud unga hujum qildi. Dovud Hadadzarni Xomat shahri yonida tor — mor etdi.

⁴Hadadzarning 1000 ta jang aravasini, 7000 otliq va 20.000 piyoda sipohini asirga oldi. Oʻzining 100 ta jang aravasi uchun kerakli otlarni qoldirib, boshqa hamma otlarni mayib qildi.

⁵Damashqdagi Oram xalqi Zoʻvo shohi Hadadzarga yordamga kelgan edi, Dovud ulardan 22.000 kishini oʻldirdi.

⁶Soʻng Damashqdagi Oram xalqining shaharlariga oʻzining qoʻnolgʻalarini joylashtirdi. Oram xalqi ham Dovudga qaram boʻlib, oʻlpon toʻlaydigan boʻldi. Shunday qilib, Dovud qayerga bormasin, Egamiz uni zafarga erishtirdi.

⁷Dovud Hadadzarning a’yonlari koʻtarib yuradigan oltin qalqonlarni qoʻlga kiritib, Quddusga keltirdi.

⁸Yana Hadadzarning qoʻli ostidagi shaharlari boʻlgan Tivxat va Xundan koʻp bronza olib keldi. Keyinchalik Sulaymon bu bronzadan hovuz, ustunlar va har xil ashyolar yasattirdi[172].

⁹Xomat[173] shohi Toʻax[174]: “Dovud Hadadzarning butun lashkarini magʻlub qilibdi” degan xabarni eshitib qoldi.

¹⁰Toʻax shoh Dovudning huzuriga oʻgʻli Yoramni[175] yuborib, qutladi, jangda Hadadzardan gʻolib kelgani uchun Dovudni olqishladi. Toʻax Hadadzar bilan uzoq vaqtdan beri urishib kelardi. U Dovudga oltin, kumush, bronza idishlarni tortiq qilib yubordi.

¹¹Shoh Dovud bu in’omlarni boshqa yurtlardan — Edom, Moʻab, Ommon, Filist va Omolekdan tortib olib kelgan oltinu kumushlar bilan birga Egamizga nazr qildi.

¹²Zeruya oʻgʻli Abushay Tuz vodiysida[176] Edom xalqidan 18.000 kishini halok qildi.

¹³U Edom yurtiga[177] oʻz qoʻnolgʻalarini joylashtirdi. Edom xalqi Dovudga qaram boʻldi. Dovud qayerga bormasin, Egamiz uni zafarga erishtirdi.

¹⁴Dovud butun Isroilda shohlik qilar ekan, xalqini odillik bilan boshqarardi.

¹⁵Zeruya oʻgʻli Yoʻab — lashkarboshi, Oxilud oʻgʻli Yohushafat mushovir[178] edi.

¹⁶Oxitob oʻgʻli Zodoʻx bilan Abuatar oʻgʻli Oximalek[179] — ruhoniy, Sarayo[180] mirza edi.

¹⁷Yohayido oʻgʻli Binayo Xaretlik va Palatlik qoʻriqchilarning[181] boshligʻi edi. Dovudning oʻgʻillari saroyda yuksak lavozimdagi a’yonlar edilar.