Read Uzbek Muqaddas Kitob 1 Solnomalar 23 Bible Online

1 Solnomalar 23 - Uzbek Muqaddas Kitob bible

1 Solnomalar 23

¹Dovud rosa keksayib, umri oxirlab qolgach, oʻgʻli Sulaymonni Isroil ustidan shoh qildi.

²Dovud Isroilning hamma yoʻlboshchilarini, ruhoniylarini va levilarni toʻpladi.

³U oʻttiz va undan yuqori yoshdagi levilarni hisobladi. Ularning jami 38.000 erkak chiqdi.

⁴Shunda Dovud aytdi: “Bulardan 24.000 nafari Egamizning uyidagi ishlar uchun mas’ul boʻladi, 6000 nafari amaldorlar va hakamlar boʻlib xizmat qiladi,

⁵4000 nafari darvozabon boʻladi, qolgan 4000 nafari esa men yasattirgan musiqa asboblarini chalib, Egamizni madh qiladi.”

⁶Dovud levilarni urugʻlariga koʻra, Gershon, Qohot va Marori guruhlariga boʻldi.

⁷Gershonning Lubnax[206] va Shimax degan ikki oʻgʻli bor edi.

⁸Lubnaxning uchta oʻgʻli boʻlib, toʻngʻichi Yoxiyol, oʻrtanchasi Zatom va kenjasi Yoʻel edi.

⁹Ular Lubnax naslining urugʻboshilari edilar. Shimaxning Shalumoʻt, Xaziyol va Xaron ismli uch oʻgʻli bor edi.

¹⁰Keyinchalik Shimax yana toʻrt oʻgʻil koʻrdi, ularning tartibi quyidagicha edi: Yaxat, Zizo, Yoush va Bariyo. Yoush bilan Bariyoning oʻgʻillari kam boʻlgani uchun ular bitta xonadon hisoblanardilar.

¹²Qohotning toʻrtta oʻgʻli boʻlib, ularning ismlari Imrom, Izxor, Xevron va Uziyol edi.

¹³Imromning oʻgʻillari Horun va Muso edi. Horun Xudoga bagʻishlangan boʻlib, eng muqaddas ashyolar uchun mas’uliyat to abad uning va uning nasli zimmasiga yuklangan edi. Ular Egamizning huzurida qurbonliklar keltirishlari, Unga xizmat qilishlari va to abad Uning nomidan xalqni duo qilishlari kerak edi.

¹⁴Xudoning odami Musoga kelsak, uning oʻgʻillari Levi qabilasining bir qismi hisoblanardi.

¹⁵Musoning Gershom va Eliazar degan ikki oʻgʻli bor edi.

¹⁶Gershomning oʻgʻillari orasida Shavuvol toʻngʻichi edi.

¹⁷Eliazarning toʻngʻich farzandi Raxaviyo edi. Eliazarning undan boʻlak oʻgʻillari boʻlmasa — da, Raxaviyoning oʻgʻillari nihoyatda koʻp edi.

¹⁸Qohotning ikkinchi oʻgʻli Izxor ham oʻgʻillar koʻrgan edi. Uning toʻngʻich oʻgʻli Shalumit edi.

¹⁹Qohotning uchinchi oʻgʻli Xevron toʻrt oʻgʻil koʻrgan edi. Toʻngʻich oʻgʻlining ismi Yoriyo, keyingilariniki Emoriyo, Yaxaziyol va Yoxamom edi.

²⁰Qohotning kenja oʻgʻli Uziyolning ikki oʻgʻli bor edi: toʻngʻichi Mixo va kenjasi Ishshiyo.

²¹Marorining Maxli va Mushi degan ikkita oʻgʻli bor edi. Maxlining Elazar va Kish ismli ikkita oʻgʻli bor edi.

²²Elazar oʻgʻil koʻrmay oʻtib ketdi. Undan faqat qizlar tugʻildi. Uning qizlari oʻzlarining amakivachchalari — Kishning oʻgʻillariga turmushga chiqdilar.

²³Mushining Maxli, Eder va Yorimoʻt ismli uch oʻgʻli bor edi.

²⁴Xullas, levilarning nomma — nom roʻyxatga kiritilgan avlodlari, ularning urugʻ va xonadonlari shulardan iborat edi. Yigirma va undan yuqori yoshdagi levilar Egamizning uyidagi xizmatga tayinlangan edilar.

²⁵Dovud shunday degan edi: “Isroil xalqining Xudosi — Egamiz Oʻz xalqiga tinchlik ato qildi. Endi U Quddusda abadiy istiqomat qiladi.

²⁶Shunday ekan, bundan buyon levilar Muqaddas chodirni yoki unda ishlatiladigan ashyolarni koʻtarib yurishlari shart emas.”

²⁷Dovudning oxirgi farmoniga koʻra, yigirma va undan yuqori yoshdagi levilar roʻyxatga olingan edilar.

²⁸Levilarning vazifasi Egamizning uyidagi xizmatda Horun nasliga yordam berish edi. Bunga: hovli va yon xonalarga mas’ul boʻlish, muqaddas ashyolarni poklash va Egamizning uyidagi har qanday boshqa yumushlarni bajarish vazifalari kirar edi.

²⁹Shuningdek, levilar Egamiz huzuridagi xontaxta ustiga qoʻyiladigan nonlar, don nazri uchun sifatli un, xamirturushsiz chalpaklar, pishirib tayyorlanadigan nazrlar, zaytun moyi aralashtirilgan nazrlar, nazrlarning ogʻirligi, soni va hajmi uchun mas’ul edilar.

³⁰Har kuni ertalab va kechqurun ular Ma’badda Egamizga shukronalar aytib, hamdu sanolar kuylashlari kerak edi.

³¹Shabbat kunlari, yangi oy va boshqa belgilangan bayramlarda qurbonliklar kuydirilganda ham shukronalar aytib, hamdu sanolar kuylash ularning zimmasida edi. Egamizning huzurida doimo xizmat qilayotgan levilarning soni qoidaga muvofiq boʻlishi shart edi.

³²Demak, levilar Uchrashuv chodiri[207] va Ma’bad uchun mas’ul boʻlib, Egamizning uyida xizmat qilgan oʻz qarindoshlari — Horun nasliga yordam berishlari kerak edi.