Read Uzbek Muqaddas Kitob 1 Solnomalar 26 Bible Online

1 Solnomalar 26 - Uzbek Muqaddas Kitob bible

1 Solnomalar 26

¹Ma’bad darvozasida xizmat qilish uchun quyidagi levilar tayinlangan edi: Koʻrax naslidagi Osif xonadonidan — Kori oʻgʻli Mashalmiyo.

²Mashalmiyoning yetti oʻgʻli bor edi: toʻngʻichi — Zakariyo, ikkinchisi — Yodiyol, uchinchisi — Zabadiyo, toʻrtinchisi — Yatniyol,

³beshinchisi — Elam, oltinchisi — Yohuxanon va yettinchisi — Elixoʻnay.

⁴Xudo Obidadomni barakalab, unga sakkiz oʻgʻil bergan edi: toʻngʻich oʻgʻli — Shamayo, ikkinchisi — Yohuzabad, uchinchisi — Yoʻx, toʻrtinchisi — Soxor, beshinchisi — Natanil, oltinchisi — Omiyol, yettinchisi — Issaxor va sakkizinchisi — Fullatay.

⁶Obidadomning toʻngʻichi Shamayoning ham oʻgʻillari bor edi. Ular nihoyatda qobiliyatli boʻlganlari uchun oʻzlarining ota xonadonida urugʻboshilar edilar.

⁷Ularning ismlari Oʻtnax, Rafail, Obid va Elzabad edi. Shamayoning qarindoshlari Elixu bilan Samaxiyo ham nihoyatda qobiliyatli edilar.

⁸Obidadomning bu avlodi jami oltmish ikki kishini tashkil qilib, hammasi qobiliyatli, oʻz xizmatiga layoqatli edilar.

⁹Mashalmiyoning oʻgʻillari va aka — ukalari oʻn sakkiz kishini tashkil qilib, hammasi qobiliyatli edilar.

¹⁰Marori naslidan boʻlgan Xoʻsaxning toʻrt oʻgʻli bor edi. Uning Shimri degan oʻgʻli yoʻlboshchi edi. Shimri toʻngʻich oʻgʻil boʻlmasa ham, otasi uni yoʻlboshchi qilgan edi.

¹¹Xoʻsaxning ikkinchi oʻgʻli — Xilqiyo, uchinchisi — Tavaliyo va toʻrtinchisi Zakariyo edi. Xoʻsax xonadonining oʻn uch a’zosi Ma’bad darvozabonlari boʻlib xizmat qilar edilar.

¹²Darvozabonlar xonadonlari boʻyicha guruhlarga boʻlingan edilar. Ular Egamizning uyida xizmat qilayotgan boshqa levilar singari oʻz vazifalariga ega edilar.

¹³Har bir xonadon katta — kichikligiga qaramay qur’a tashlab[219], qoʻriqlaydigan darvozasini aniqlab oldi.

¹⁴Sharq tomondagi darvoza uchun qur’a tashlanganda, qur’a Mashalmiyoga[220] tushdi. Soʻngra oʻgʻli Zakariyo uchun qur’a tashlandi, unga shimol tomondagi darvoza tushdi. Zakariyo dono maslahatchi edi.

¹⁵Obidadom uchun qur’a tashlanganda, unga janub tomondagi darvoza tushdi. Oʻgʻillari uchun qur’a tashlanganda, ularga omborxonani qoʻriqlash tushdi.

¹⁶Gʻarb tomondagi darvoza va yuqori yoʻl ustidagi Shallexet darvozasi uchun qur’a tashlanganda, qur’a Shupim bilan Xoʻsaxga tushdi. Darvozabonlar oʻz xizmatini belgilangan vaqtda, ketma — ketlikda uzluksiz ravishda bajarishlari lozim edi.

¹⁷Sharq tomondagi darvozada kuniga oltita darvozabon, shimol tomondagi darvozada toʻrtta, janub tomondagi darvozada ham toʻrtta darvozabon turardi. Shuningdek, ikkita omborxonada ikkitadan darvozabon turardi.

¹⁸Gʻarb tomondagi hovliga kelsak, yoʻlakda toʻrtta darvozabon, hovlining ichida esa ikkita darvozabon turardi.

¹⁹Koʻrax va Marori naslidan boʻlgan darvozabonlarga mana shu qoʻriqchilik vazifasi topshirilgan edi.

²⁰Oxiyo boshchiligidagi boshqa levilar[221] Xudoning uyidagi xazinalar va nazr qilingan hadyalar xazinalari uchun mas’ul edilar.

²¹Gershon urugʻidan boʻlgan Lubnax[222] Yoxiyolning otasi edi. Lubnaxning naslidan bir necha urugʻboshilar chiqdi.

²²Yoxiyolning oʻgʻillari Zatom bilan Yoʻel Egamizning uyidagi xazinalar uchun mas’ul edilar.

²³Imrom, Izxor, Xevron va Uziyol urugʻlariga ham vazifalar taqsimlanib berildi.

²⁴Muso oʻgʻli Gershomning urugʻidan Shavuvol Ma’badning bosh xazinaboni edi.

²⁵Gershomning ukasi Eliazarning nasli quyidagilar edi: Eliazarning oʻgʻli — Raxaviyo, Raxaviyoning oʻgʻli — Yeshayo, Yeshayoning oʻgʻli — Yoram, Yoramning oʻgʻli — Zixri va Zixrining oʻgʻli — Shalumoʻt.

²⁶Shalumoʻt va uning xonadoni Egamizga nazr qilingan hadyalar xazinasi uchun mas’ul edi. Bu xazinada shoh Dovud, urugʻboshilar, mingboshilar, yuzboshilar va lashkarboshilar Xudoga nazr qilgan hadyalar saqlanar edi.

²⁷Ular jangda qoʻlga kiritgan oʻljaning bir qismini Egamizning uyini ta’minlash uchun nazr qilardilar.

²⁸Shalumoʻt va uning xonadoni barcha hadyalar uchun mas’ul edilar. Valiy Shomuil, Kish oʻgʻli Shoul, Nar oʻgʻli Abnur va Zeruya oʻgʻli Yoʻab nazr qilgan hadyalar ham ularning nazorati ostida edi.

²⁹Izxor naslidan Xonaniyo va uning oʻgʻillari Isroil xalqi uchun ma’murlar va hakamlar qilib tayinlandilar. Ular Ma’baddan tashqarida xizmat qilishardi.

³⁰Xevron naslidan Xashaviyo va uning 1700 nafar qobiliyatli qarindoshi ham ma’murlar qilib tayinlandilar. Ular Iordan daryosining gʻarb tomonidagi qabilalar uchun mas’ul boʻlib, Egamizning va shohning xizmatiga oid masalalarni yechishar edi.

³¹Xevron naslidagi Yoriyo, nasabnoma ma’lumotiga koʻra, Xevron naslining yoʻlboshchisi edi. Dovud hukmronligining qirqinchi yilida nasabnomalarga oid barcha yozma ma’lumotlar koʻrib chiqilgan edi. Shunda Giladdagi Yazir shahrida Xevron nasli orasida qobiliyatli odamlar borligi aniqlandi.

³²Shoh Dovud Yoriyoni va uning 2700 nafar qobiliyatli qarindoshini ma’murlar qilib tayinladi. Ular Iordan daryosining sharq tomonidagi Ruben, Gad va Manashe qabilasining yarmi uchun mas’ul boʻlib, Xudoning va shohning xizmatiga oid barcha masalalarni hal qilishlari kerak edi.