Read Uzbek Muqaddas Kitob 1 Solnomalar 28 Bible Online

1 Solnomalar 28 - Uzbek Muqaddas Kitob bible

1 Solnomalar 28

¹Dovud Isroildagi hamma a’yonlarni — qabila yoʻlboshchilarini, shohga xizmat qiladigan harbiy qismlar sardorlarini, mingboshilarni, yuzboshilarni, shoh va shahzodalar mulkini va podalarini boshqaruvchilarni, saroy a’yonlarini, bahodir pahlavonlarni va boshqa hamma jangchilarni Quddusda toʻpladi.

²Shoh Dovud ularning oldida turib, gapirdi: “Birodarlarim, xalqim, gapimni eshitinglar! Men Xudoning oyoq kursisi boʻlmish Egamizning Ahd sandigʻi[229] uchun bir oromgoh qurmoqchi edim. Qurilish uchun hamma tayyorgarlikni ham koʻrib qoʻygan edim.

³Lekin Xudo: «Menga atab uyni sen qurmaysan, sen jang qilib, koʻp qon toʻkding», — dedi.

⁴Vaholanki, Isroil xalqining Xudosi — Egamiz butun otam xonadonidan meni tanlab oldi. Meni to abad Isroilning shohi qildi. U Yahudo qabilasini yetakchi qilib tanladi, Yahudo qabilasidan esa otamning xonadonini ravo koʻrdi, otamning oʻgʻillari orasidan esa meni mamnuniyat ila butun Isroil ustidan shoh qildi.

⁵Egamiz menga koʻp oʻgʻillar berdi, hamma oʻgʻillarim orasidan Isroil shohi qilib Sulaymonni tanladi. Ha, Egamizning shohligi taxtiga u oʻtiradi.

⁶Egamiz menga aytdi: «Men uchun uyni va hovlilarni quradigan oʻgʻling Sulaymondir. Men uni Oʻzimga oʻgʻil qilib tanladim, Men unga ota boʻlaman.

⁷Agar u bugungiday, Mening amrlarimu qonunlarimga qat’iyat bilan rioya qilib yursa, uning taxtini to abad mustahkam qilaman.»

⁸Shuning uchun endi Egamizning jamoasi Isroil xalqining koʻzi oʻngida va Xudoyimizning guvohligida sizlarga aytayin: Egangiz Xudoning amrlarini bitta qoldirmay bajaring. Ana shunda sizlar mana shu hosildor yurtga egalik qilasizlar, bolalaringizga ham uni abadiy meros qilib qoldirasizlar.

⁹Endi Sulaymon oʻgʻlim, otangning Xudosini tan olgin, butun onging bilan sidqidildan Unga xizmat qilgin. Zotan, Egamiz har bir insonning yuragini sinaydi, niyatu fikrlarimizni U biladi. Agar Uni izlasang, topasan. Agar Uni tark etsang, U ham seni abadiy tashlab ketadi.

¹⁰Gapimga quloq sol! Ma’bad qurish uchun Egamiz seni tanlagan ekan, qani, dadil boʻlib, ishga bel bogʻla!”

¹¹Dovud Ma’bad binolarining, omborxonalarining, boshqa xonalarining va Eng muqaddas xonaning, ya’ni gunohdan poklash joyining chizma loyihalarini oʻgʻli Sulaymonga berdi.

¹²Shuningdek, Dovud Egamiz uyining hovlilari va atrofidagi xonalari, Xudo uyining xazinalari va nazr qilingan hadyalar saqlanadigan xonalari uchun koʻnglidagi niyatlarini[230] aytdi.

¹³Ruhoniylar va levilarning tuzumiga, ularning Egamizning uyida qilinadigan barcha xizmatlariga va xizmat paytida foydalaniladigan barcha ashyolarga oid koʻrsatmalar berdi.

¹⁴Xizmatda ishlatiladigan quyidagi idish va jihozlarni yasash uchun oltin va kumush vaznini belgilab berdi:

¹⁵moychiroqlar va chiroqpoyalar,

¹⁶muqaddas nonlar qoʻyiladigan oltin xontaxta, kumush xontaxtalar,

¹⁷sanchqilar, togʻorachalar, koʻzalar, jomlar va

¹⁸tutatqi qurbongohi. Bundan tashqari, oltin aravaning, ya’ni qanotlarini yoyib, Egamizning Ahd sandigʻini qoplab turgan oltin karublarning loyihasini[231] ham Sulaymonga berdi.

¹⁹Soʻngra Dovud oʻgʻli Sulaymonga shunday dedi: — Bularning hammasini men Egamning boshchiligida yozdim, loyihaning ikir — chikirlarini Uning Oʻzi menga ayon qildi. Dadil va botir boʻl! Ishni boshla! Qoʻrqma, vahimaga tushma! Parvardigor Egamiz — mening Xudoyim sen bilan birgadir. Egamizning uyidagi ishlar bitmaguncha, U seni tashlab qoʻymaydi, tark etmaydi.

²¹Mana, ruhoniylar va levilar guruhlari Xudoning uyidagi har qanday xizmatni qilishga tayyor boʻlib turibdilar. Mohir hunarmandlar senga bajonidil yordam beradilar. Butun xalq va ularning yoʻlboshchilari amringga muntazirdirlar.