Read Uzbek Muqaddas Kitob 1 Solnomalar 29 Bible Online

1 Solnomalar 29 - Uzbek Muqaddas Kitob bible

1 Solnomalar 29

¹Shoh Dovud butun jamoaga shunday dedi: “Xudo tanlagan oʻgʻlim Sulaymon hali yosh, tajribasiz, qiladigan ishi esa ulkandir, chunki bu Muqaddas koshona[232] inson uchun emas, balki Parvardigor Egamiz uchundir.

²Xudoyimning uyini qurish uchun men qoʻlimdan kelganicha oltin, kumush, bronza, temir, yogʻoch, aqiq toshlar, bezak uchun firuza toshlar, rango — rang toshlar, har xil qimmatbaho toshlar va marmar yigʻdim.

³Endi esa, Xudoyimning uyiga boʻlgan sadoqatimni koʻrsatib, bularga qoʻshimcha qilgan holda shaxsiy xazinamdagi oltin va kumushni beraman.

⁴Men berayotgan mana bu 6000 pud[233] Ofir[234] oltinini va 14.000 pud[235] toza kumushni binolarning devorlarini qoplash uchun

⁵hamda hunarmandlar yasaydigan ashyolar uchun ishlatinglar. Qani, yana kim bugun Egamizga oʻz sadoqatini koʻrsatmoqchi? Kim Ma’badning qurilishiga nazrlar bermoqchi?”

⁶Shunda urugʻboshilar, qabila yoʻlboshchilari, mingboshilar, yuzboshilar va shohning a’yonlari koʻngildan chiqarib nazrlar berdilar.

⁷Ular Xudo uyining qurilishi uchun 10.000 pud[236] oltin, 10.000 oltin tanga[237], 20.000 pud[238] kumush, 36.000 pud[239] bronza va 200.000 pud[240] temir nazr qildilar.

⁸Kimda qimmatbaho toshlar boʻlsa, ularni Egamizning uyi xazinasiga berdilar. Xazinaga Gershon naslidan boʻlgan Yoxiyol mas’ul edi.

⁹Odamlar yoʻlboshchilarning bergan bu hadyalari uchun sevindilar, chunki hammalari koʻngildan chiqarib bergan bu nazrlarini yakdillik bilan Egamizga keltirgan edilar. Shoh Dovud ham juda xursand boʻldi.

¹⁰Dovud butun jamoaning koʻzi oldida Egamizga hamdu sano oʻqidi: “Ey bobomiz Yoqubning[241] Xudosi — Egamiz! Senga to abad hamdu sanolar boʻlsin!

¹¹Ey Egamiz! Sen buyuk, qudratli, shuhratli, salobatli va ulugʻdirsan. Zotan, yeru osmondagi barcha narsa Senikidir. Ey Egamiz! Sen Shohsan. Sen har narsadan yuksaksan.

¹²Boylik va shon — sharafning manbayi Sensan. Ha, Sen hamma narsa ustidan hukmronsan. Kuch — qudrat egasi Oʻzingsan. Odamlarni yuksaltiradigan, ularga kuch beradigan Sensan.

¹³Endi, ey Xudoyimiz, biz Senga shukurlar aytamiz, Sening ulugʻ nomingni madh qilamiz.

¹⁴Lekin men kim boʻlibman, mening xalqim nima boʻlibdiki, biz koʻngildan chiqarib Senga nazr bera oladigan boʻlsak? Axir, hamma narsa Sendan kelgan! Biz bugun bor — yoʻgʻi Sening narsangni Oʻzingga qaytarib berdik, xolos.

¹⁵Biz Sening oldingda, ota — bobolarimiz singari musofiru mehmonmiz. Bizning umrimiz soyaday izsiz oʻtib ketadi.

¹⁶Ey Egamiz Xudo! Biz Sening muqaddas ismingga atab uy barpo qilish uchun yiqqan mana shu boyliklarning hammasi Sendan kelgan. Ha, hammasi Oʻzingnikidir.

¹⁷Ey Xudoyim! Bilaman, Sen yurakni sinaysan, solih odamdan xushnud boʻlasan. Mana shu nazrlarni men Senga chin dildan, koʻnglimdan chiqarib berdim. Hozir esa shu yerda turgan xalqing ham nazrlarini Senga xursandchilik bilan ataganini koʻrdim.

¹⁸Ey ota — bobolarimiz Ibrohim, Is’hoq va Yoqubning Xudosi — Egamiz! Xalqingning yuragidagi bu niyatu maqsadlarini to abad saqla, ularning yuragini Oʻzingga bur.

¹⁹Oʻgʻlim Sulaymon Sening amrlaringga, shartlaringga va qonunlaringga rioya qila olishi uchun va men hozirligini koʻrib qoʻygan Muqaddas koshonani qura olishi uchun unga kuchli istak ato qilgin.”

²⁰Shundan keyin Dovud butun jamoaga: “Egangiz Xudoni olqishlang!” dedi. Ular ota — bobolarining Xudosi — Egamizni olqishladilar. Unga ta’zim qilib, Egamiz va shohning oldida muk tushdilar.

²¹Ertasi kuni ular mingta buqa, mingta qoʻchqor va mingta qoʻzini Egamizga kuydiriladigan qurbonlik qildilar. Bular bilan birga sharob nazrlarini va butun Isroil xalqi uchun bir talay boshqa qurbonliklarni keltirdilar.

²²Oʻsha kuni jamiki Isroil xalqi katta xursandchilik bilan Egamiz huzurida yeb — ichdi. Ular Dovud oʻgʻli Sulaymonni ikkinchi marta[242] shoh deb e’lon qildilar. Soʻng Sulaymon va Zodoʻxning boshlariga moy surtib, Sulaymonni Egamizning shahzodasi, Zodoʻxni esa ruhoniy qilib tayinladilar.

²³Sulaymon Egamizning taxtiga oʻtirib, otasi Dovudning oʻrniga shoh boʻldi. U katta muvaffaqiyatga erishdi, butun Isroil xalqi unga itoat qilar edi.

²⁴Barcha yoʻlboshchilar, bahodir jangchilar va shoh Dovudning hamma oʻgʻillari shoh Sulaymonga sodiq boʻlishga soʻz berdilar.

²⁵Egamiz Sulaymonni shu qadar yuksaltirdiki, butun Isroil xalqi uni nihoyatda izzat qiladigan boʻldi. Darhaqiqat, Sulaymondan oldin hech qanday shoh Isroilda bunday dabdabali shuhratga erishmagan edi.

²⁶Essay oʻgʻli Dovud butun Isroil ustidan shoh boʻlgandi.

²⁷U Isroilda qirq yil shohlik qildi: shundan yetti yili Xevronda, oʻttiz uch yili Quddusda oʻtdi.

²⁸Dovud davlatu shuhrat orttirdi. Yoshini yashab, oshini oshab, olamdan oʻtdi. Oʻrniga oʻgʻli Sulaymon shoh boʻldi.

²⁹Shoh Dovudning butun faoliyati boshdan oxirigacha valiy Shomuilning, Natan paygʻambarning va valiy Gadning qoʻlyozmalarida bayon etilgan.

³⁰Dovudning hukmronligi davrida koʻrsatgan qahramonliklari, Isroil xalqining va oʻzining boshidan kechirgan voqealar hamda atrofdagi shohliklarda yuz bergan hodisalar oʻsha kitoblarga kiritilgan.