Read Uzbek Muqaddas Kitob 2 Solnomalar 11 Bible Online

2 Solnomalar 11 - Uzbek Muqaddas Kitob bible

2 Solnomalar 11

¹Raxabom Quddusga kelib, Yahudo va Benyamin qabilalaridan 180.000 odamni sipohlikka tanlab oldi. “Shohlikni qaytarib olaman” degan maqsadda ularni Isroil xalqiga qarshi jang qilish uchun tayyorladi.

²Lekin oʻshanda Shamayo paygʻambarga Egamizning quyidagi soʻzlari ayon boʻldi:

³— Yahudo shohi Sulaymon oʻgʻli Raxabomga hamda Yahudo va Benyamin hududlarida istiqomat qilayotgan butun Isroil xalqiga shu gaplarni yetkaz:

⁴“Egamiz shunday deb aytmoqda: qarindoshlaringizga qarshi urush boshlamanglar! Har kim oʻz uyiga qaytsin! Chunki bu ishlar hammasi Mendan boʻldi.” Ular Egamizning amriga itoat etib, Yeribomga qarshi urush qilmadilar.

⁵Raxabom Quddusda yashadi, u mudofaa uchun Yahudodagi quyidagi shaharlarni mustahkamladi:

⁶Baytlahm, Etom, Taxuva,

⁷Bayt — Zur, Soʻxu, Adullam,

⁸Gat, Morisho, Zif,

⁹Odorayim, Laxish, Ozikah,

¹⁰Zorox, Oyjavlon va Xevron. Bu shaharlar Yahudo va Benyamin hududlaridagi mustahkam shaharlar boʻldi.

¹¹Raxabom qal’alarni mustahkamladi. U yerga qoʻmondonlar tayin qilib, oziq — ovqat, zaytun moyi va sharob gʻamladi.

¹²Har bir shaharni qalqon va nayzalar bilan ta’minlab, mudofaani gʻoyat kuchaytirdi. Shu tariqa u Yahudo va Benyamin qabilalarini qoʻli ostida saqladi.

¹³Isroilning barcha hududlaridagi ruhoniylar va levilar Raxabomning tarafdorlari edilar.

¹⁴Levilar hatto oʻz yaylovlarini va mulklarini tashlab, Yahudo va Quddusga kelgan edilar. Chunki Isroil shohi Yeribom va uning oʻgʻillari levilarga Egamizning ruhoniylari sifatida xizmat qilishga yoʻl qoʻymagan edilar.

¹⁵Yeribom sajdagohlarda[74] xizmat qilish uchun oʻz ruhoniylarini tayinladi. Ular Yeribom yasattirgan oltin buzoqlarga va echki jinlarga[75] topinar edilar.

¹⁶Isroilning hamma qabilalaridan Egamizga[76] chin yurakdan intilganlar esa levilar va ruhoniylarga ergashib, Quddusga keldilar. Ular Quddusda ota — bobolarining Xudosi — Egamizga qurbonlik qilishardi.

¹⁷Buning natijasida Yahudo shohligi mustahkam boʻldi. Ular Dovud bilan Sulaymonga qanday xizmat qilgan boʻlsalar, Raxabomga ham uch yil davomida sadoqat bilan xizmat qildilar.

¹⁸Raxabom Dovud oʻgʻli Yarimoʻtning qizi Maxalatga uylandi. Maxalatning onasi Abuhayil, Essay oʻgʻli Eliyobning qizi edi.

¹⁹Maxalat Raxabomga Yoush, Shamariyo va Zaham degan oʻgʻillar tugʻib berdi.

²⁰Keyinchalik Raxabom Absalomning qizi Maxoni[77] oʻziga xotin qilib oldi. Maxo unga Abiyo, Attay, Zizo va Shalumit degan oʻgʻillar tugʻib berdi.

²¹Raxabom boshqa xotinlari va kanizaklariga[78] qaraganda, Absalomning qizi Maxoni yaxshi koʻrardi. Raxabomning oʻn sakkizta xotini va oltmishta kanizagi boʻlib, u yigirma sakkiz oʻgʻil va oltmish qiz koʻrdi.

²²Raxabom xotini Maxo tuqqan oʻgʻli Abiyoni taxt vorisi qilish niyatida, hamma aka — ukalari orasida bosh shahzoda qilib tayinladi.

²³Raxabom donolarcha ish tutib, qolgan oʻgʻillariga mas’uliyatni taqsimlab berdi, ularni Yahudo va Benyamin hududidagi mustahkam shaharlarga oʻrnashtirdi. Ularga hamma narsani moʻl qilib yetkazdi, ularni koʻp xotinlarga uylantirdi.