Read Uzbek Muqaddas Kitob 2 Solnomalar 15 Bible Online

2 Solnomalar 15 - Uzbek Muqaddas Kitob bible

2 Solnomalar 15

¹Odod oʻgʻli Ozariyoni Xudoning Ruhi qamrab oldi.

²Ozariyo Osoning huzuriga borib dedi: — Ey shoh Oso! Ey Yahudo va Benyamin xalqi! Gapimga quloq solinglar. Sizlar Egamiz bilan boʻlar ekansiz, U ham sizlar bilan birga boʻladi. Agar sizlar Egamizni izlasangizlar, Uni topasizlar. Agar Uni tark etsangizlar, U ham sizlarni tark etadi.

³Isroil xalqi uzoq vaqt davomida[88] haqiqiy Xudosiz yashadi. Ularga ta’lim beradigan ruhoniy yoʻq edi, ular qonundan mahrum edilar.

⁴Lekin boshlariga ogʻir kulfat tushganda, ular Isroil xalqining Xudosiga — Egamizga yuz burdilar, Uni izladilar, shunda topdilar.

⁵Oʻsha notinch davrda yoʻlga chiqish xatarli edi, chunki hamma joyda tartibsizlik va behalovatlik hukmron edi.

⁶Bir xalq ikkinchisini yakson qilardi, bir shahar boshqasini vayron etar edi, chunki Xudo ularni iztirobga solib, behalovat qilib qoʻygan edi.

⁷Lekin sizlar dadil boʻlinglar! Tushkunlikka tushmanglar! Sizlar qilgan ishlaringiz uchun mukofot olasizlar.

⁸Shoh Oso Odod oʻgʻli Ozariyo paygʻambarning aytgan bashoratini eshitgach[89], dadillashdi. U Yahudo va Benyamin yerlaridan, shuningdek, Efrayim qirlarida qoʻlga kiritgan shaharlardan makruh butlarni yoʻq qildi. Ma’bad hovlisidagi Egamizning qurbongohini tuzatdi.

⁹U Yahudo va Benyamin xalqini, shuningdek, oralarida istiqomat qilayotgan Efrayim, Manashe va Shimoʻn qabilasidan boʻlgan musofirlarni toʻpladi. Ularning koʻpchiligi Oso hukmronligi davrida Yahudoga koʻchib kelgan edilar, chunki Egasi Xudo Oso bilan birga boʻlganini koʻrgan edilar.

¹⁰Ular Oso hukmronligining oʻn beshinchi yili uchinchi oyida[90] Quddusda toʻplandilar.

¹¹Oʻsha kuni oʻzlari olib kelgan oʻljalardan 700 ta buqa va 7000 ta qoʻyni Egamizga qurbonlik qildilar.

¹²Soʻng ota — bobolarining Xudosiga — Egamizga butun qalbi bilan, jonu dili bilan intilishga ahd qildilar.

¹³Kimki Isroil xalqining Xudosiga — Egamizga intilmasa, xoh yosh boʻlsin, xoh qari, xoh erkak boʻlsin, xoh ayol, oʻldiriladigan boʻldi.

¹⁴Ular baland ovozda Egamizga qasamyod qildilar, hayqirdilar, karnay va burgʻular chaldilar.

¹⁵Jamiki Yahudo xalqi chin dildan qasamyod qilgani uchun xursand boʻldi. Ular Egamizni astoydil izlaganlari uchun Uni topdilar. Egamiz ularga har tarafdan osoyishtalik ato qildi.

¹⁶Shoh Osoning buvisi[91] Maxo Asheraning[92] makruh tasvirini yasattirgan edi, shuning uchun Oso buvisini malikalik martabasidan[93] mahrum qildi. U buvisi yasattirgan butni qoʻporib tashlab, parcha — parcha qilgandan keyin, Qidron soyligida[94] yoqib yubordi.

¹⁷Oso Isroildagi sajdagohlarni[95] yoʻq qilmagan boʻlsa ham, umr boʻyi Egamizga sodiq qoldi.

¹⁸Otasi va oʻzi Xudoga atab nazr etgan oltinu kumushlarni, idishlarni Xudoning uyiga olib keldi.

¹⁹Oso hukmronligining oʻttiz beshinchi yiliga qadar urush boʻlmadi.