Read Uzbek Muqaddas Kitob 2 Solnomalar 21 Bible Online

2 Solnomalar 21 - Uzbek Muqaddas Kitob bible

2 Solnomalar 21

¹Yohushafat olamdan oʻtdi. U ham Dovud qal’asida, ota — bobolari yoniga dafn qilindi. Uning oʻrniga oʻgʻli Yohuram shoh boʻldi.

²Yohuramning Ozariyo, Yoxiyol, Zakariyo, Ozariyohu, Mikoyil va Shafatiyo degan ukalari bor edi. Bularning hammasi shoh Yohushafatning oʻgʻillari edi.

³Otasi ularga koʻp miqdorda oltinu kumush va qimmatbaho ashyolar bilan birga Yahudo yurtidagi mustahkam shaharlarni hadya etgan edi. Yohuramni esa, toʻngʻich oʻgʻil boʻlgani uchun taxt vorisi qilgan edi.

⁴Yohuram otasi oʻrniga taxtga oʻtirib, oʻzini mustahkamlab olgandan keyin, ukalarining hammasini va Isroil a’yonlaridan ba’zilarini qilichdan oʻtkazdi.

⁵Yohuram Yahudo shohi boʻlganda, oʻttiz ikki yoshda edi. U Quddusda sakkiz yil hukmronlik qildi.

⁶Xotini Axabning qizi boʻlgani uchun Yohuram ham, Axab xonadoni singari, Isroil shohlari yoʻlidan yurib, Egamiz oldida qabihliklar qildi.

⁷Shunday boʻlsa — da, Dovudning xonadonini Egamiz halokatga uchratishni istamadi, chunki U Dovud bilan ahd qilib: “Sening naslingga to abad soʻnmaydigan chiroq beraman”, deb va’da qilgan edi[116].

⁸Yohuram davrida Edom Yahudo shohligiga qarshi isyon qildi. Edom xalqi oʻzlarining mustaqil shohligini qurdilar.

⁹Yohuram hamma lashkarboshilari va jang aravalarini Edomga boshlab bordi. Edom lashkari Yohuramni va uning jang aravalari sardorlarini oʻrab oldi, lekin Yohuram tunda hujum qilib, qamalni yorib chiqdi.

¹⁰Oʻsha paytdan beri hozirgacha[117] Edom xalqi Yahudo hukmronligidan ozoddir. Yohuram ota — bobolarining Xudosi — Egamizni tark etgani uchun Libna shahri[118] ham oʻsha davrda isyon koʻtargan edi.

¹¹Yohuram Yahudo qirlarida sajdagohlar[119] barpo qildi, u Yahudo va Quddus aholisini Xudoga bevafolik qilishga boshladi, ularni haq yoʻldan ozdirdi.

¹²Oʻsha paytda Ilyos paygʻambar unga quyidagicha maktub yubordi: “Bobong Dovudning Xudosi — Egamiz shunday demoqda: sen otang Yohushafatning yoʻlidan yurmading, Yahudo shohi Osoning izidan ham bormading,

¹³balki Isroil shohlarining yoʻlidan yurding. Axab xonadoni Isroilni Menga bevafolik qilishga boshlaganday, sen ham Yahudo va Quddus aholisini Menga bevafolik qilishga boshlading. Sen hatto oʻz ukalaringni oʻldirding, ular sendan yaxshiroq edi.

¹⁴Shu sababdan Men, Egangiz, sening xalqing, bolalaring, xotinlaring boshiga va butun mol — mulkingga ogʻir kulfat keltiraman.

¹⁵Sen oʻzing esa ogʻir ichak xastaligiga yoʻliqasan. Ichak — chovoqlaring tashqariga chiqqunga qadar, xastaliging kundan — kunga kuchayib boraveradi.”

¹⁶Egamiz Filistlarni va Habashiston[120] yonida yashayotgan Arablarni Yohuramga qarshi qoʻzgʻatdi.

¹⁷Ular Yahudoga bostirib kelib, shoh saroyidagi hamma boyliklarni, shohning oʻgʻillarini va xotinlarini olib ketdilar. Shohning Oxoziyodan[121] boshqa oʻgʻli qolmadi. Oxoziyo shohning kenja oʻgʻli edi.

¹⁸Shundan keyin Egamiz shoh Yohuramni tuzalmas ichak xastaligiga yoʻliqtirdi.

¹⁹Oradan ikki yil oʻtgach, Yohuramning xastaligi zoʻrayib, ichak — chovoqlari tashqariga chiqdi. Yohuram qattiq azob — uqubat tortib, vafot etdi. Odamlar Yohuramning ota — bobolari sharafiga gulxan yoqishgan boʻlsa — da, Yohuramning sharafiga gulxan yoqishmadi.

²⁰Yohuram taxtga oʻtirgan paytda oʻttiz ikki yoshda boʻlib, Quddusda sakkiz yil hukmronlik qildi. Uning oʻlimi uchun hech kim qaygʻurmadi. Garchi uni Dovud qal’asiga dafn etgan boʻlsalar — da, shohlar qabriga dafn qilmadilar.