Read Uzbek Muqaddas Kitob 2 Solnomalar 31 Bible Online

2 Solnomalar 31 - Uzbek Muqaddas Kitob bible

2 Solnomalar 31

¹Bayram tugagandan keyin, oʻsha yerdagi butun xaloyiq Yahudo, Benyamin, Efrayim va Manashe hududidagi shaharlarga borib, butsimon toshlarni parchalab tashladilar, Asheraning[179] ustunlarini kesdilar, sajdagohlar[180] va qurbongohlarni vayron qildilar. Bittasini ham qoldirmadilar. Shundan keyin hammalari oʻz shaharlariga, oʻzlarining mulkiga qaytdilar.

²Hizqiyo ruhoniylarni va levilarni guruhlarga boʻldi. Har bir guruhga quyidagi vazifalarni taqsimlab berdi: Egamizning Ma’badi hovlisida kuydiriladigan qurbonliklarni va tinchlik qurbonliklarini nazr qilish, u yerda xizmat qilib, hamdu sano va madhiyalar aytish.

³Egamizning qonuniga koʻra, har kuni ertalab va kechqurun, Shabbat kunlari, yangi oy shodiyonalari va tayinlangan bayram kunlari kuydiriladigan qurbonliklar keltirilishi lozim edi. Shoh Hizqiyo oʻzining shaxsiy mulkidan bu qurbonliklar uchun hayvonlarni berdi.

⁴U Quddusda yashagan xalqqa: “Ruhoniylar va levilarga tegishli ulushni beringlar, toki ular oʻzlarini toʻliq Egamizning qonunlarini bajarishga bagʻishlasinlar”, deb farmon berdi.

⁵Farmon berilgach, xalq bugʻdoyning, sharob, zaytun moyi, asal va dalada yetishtirilgan donlarning birinchi hosilidan moʻl qilib, olib keldilar. Ular olib kelgan hamma narsaning ushri[181] nihoyatda moʻl edi.

⁶Yahudo shaharlarida yashagan Isroil va Yahudo xalqi mol — qoʻylarining ushrini hamda Egasi Xudoga atab bagʻishlangan in’omlarning ushrini olib kelib, uyum — uyum qildilar.

⁷Xalq in’omlar olib kelishni uchinchi oyda[182] boshlab, yettinchi oyda[183] tugatdi.

⁸Hizqiyo va uning a’yonlari kelib uyum — uyum in’omlarni koʻrishgach, Egamizga hamdu sano aytib, Isroil xalqini duo qilishdi.

⁹Hizqiyo ruhoniylar va levilardan bu in’omlar haqida soʻraganda,

¹⁰Zodoʻx xonadonidan boʻlgan oliy ruhoniy Ozariyo Hizqiyoga shunday javob berdi: “Xalq in’omlarni Egamizning uyiga olib kela boshlaganidan beri, ozuqamiz yetarli. Juda koʻp ortib qolgani ham bor. Ha, Egamiz Oʻz xalqiga baraka berdi, ortganining koʻpligini bir koʻrib qoʻying.”

¹¹Shunda Hizqiyoning buyrugʻiga binoan, Egamiz uyining omborxonalari tayyorlandi.

¹²Bu omborxonalarga hamma hadyalar, ushrlar va bagʻishlangan in’omlar qoʻyildi. Bularga nazoratchi qilib levi Xonaniyo, uning yordamchisi qilib ukasi Shimax tayinlandi.

¹³Ularning qoʻli ostida quyidagi oʻn nafar levi ishlaydigan boʻldi: Yoxiyol, Ozaziyo, Naxat, Osoyil, Yarimoʻt, Yoʻzabad, Eliyol, Yismaxiyo, Maxat va Binayo. Bularning hammasi shoh Hizqiyo va oliy ruhoniy Ozariyo tomonidan tayinlangan edilar.

¹⁴Kori Ma’badning sharqiy darvozasi darvozaboni boʻlib, Xudoga koʻngildan qilingan nazrlar uchun mas’ul edi. Kori levi Yimnaxning oʻgʻli edi. Uning vazifasi Egamizga atalgan in’omlarni va eng muqaddas nazrlarni ruhoniylar va levilarga boʻlib berish edi.

¹⁵Uning sodiq yordamchilari Eden, Minyomin, Yeshuva, Shamayo, Emoriyo va Shaxaniyo edilar. Ular ruhoniylarga qarashli shaharlarda xizmat qilib, u yerdagi ruhoniylarning oilalariga guruhlari boʻyicha ulush taqsimlab berishar edi. Yoshu qariga bir xil ulush ajratishardi:

¹⁶Egamizning uyidagi xizmatni guruhlari boʻyicha bajaradigan hamma erkaklarga, shuningdek, nasabnomada nomlari qayd etilgan uch va undan yuqori yoshdagi oʻgʻil bolalarga ulush berishardi.

¹⁷Ular xonadonlari boʻyicha roʻyxatga olingan ruhoniylarga, shuningdek, yigirma va undan yuqori yoshdagi levilarga ulush ajratishardi. Levilarning roʻyxati bajaradigan vazifalari va guruhlari asosida tuzilgan edi.

¹⁸Nasabnomada nomlari qayd etilgan hamma erkaklarning oilalariga — xotini, oʻgʻil — qizlari, chaqaloqlariga ham ulush berilardi. Zotan, ular oʻzlarini pok saqlashda sadoqat koʻrsatar edilar.

¹⁹Shaharlarning chetlarida istiqomat qilgan, Horun naslidan boʻlgan ruhoniylarga kelsak, ularga ham ulush tarqatadigan odamlar tayinlangan edi. Bu odamlar ruhoniy urugʻidan boʻlgan har bir erkak zotiga va roʻyxatga olingan har bir leviga ulush berishar edi.

²⁰Shu yoʻsinda, Hizqiyo butun Yahudo boʻylab ulush tarqatish vazifasini uddaladi. U Egasi Xudo oldida yaxshi, toʻgʻri va halol ishlar qildi.

²¹Ma’bad xizmatiga, Xudoning qonunlari va amrlariga oid qilgan har bir ishini Xudoga intilgan holda, chin yurakdan qilgani uchun koʻp muvaffaqiyatga erishdi.