Read Uzbek Muqaddas Kitob 2 Solnomalar 35 Bible Online

2 Solnomalar 35 - Uzbek Muqaddas Kitob bible

2 Solnomalar 35

¹Shoh Yoʻshiyo Quddusda Egamizning sharafiga Fisih ziyofatini[208] nishonladi. Birinchi oyning[209] oʻn toʻrtinchi kuni Fisih qoʻzilari qurbonlik qilindi.

²Yoʻshiyo ruhoniylarni xizmatga tayinlab, Egamizning uyidagi xizmatga ularni ragʻbatlantirdi.

³Soʻng Egamizga bagʻishlangan va xalqqa ta’lim bergan levilarga dedi: — Muqaddas Sandiqni Isroil shohi Dovud oʻgʻli Sulaymon qurgan Egamizning uyiga olib kiringlar. Sandiqni bundan buyon yelkangizda koʻtarib yurishga hojat yoʻq. Endi Egangiz Xudoga va Uning xalqi Isroilga xizmat qilinglar.

⁴Shoh Dovudning va oʻgʻli Sulaymonning yozib qoldirgan koʻrsatmalariga muvofiq[210], xonadoningiz va guruhlaringiz boʻyicha xizmatga tayyorlaninglar.

⁵Muqaddas maskanga shunday tartibda joylashinglarki, Isroil xalqining birorta xonadoni e’tiboringizdan chetda qolib ketmasin.

⁶Fisih qoʻzisini soʻyib, oʻzingizni poklanglar. Soʻng yurtdoshlaringiz uchun Fisih qoʻzilarini tayyorlab beringlar. Xullas, Egamizning Muso orqali bergan koʻrsatmalariga rioya qilinglar.

⁷Shoh Yoʻshiyo bu yerda hozir boʻlgan xalqqa Fisih qurbonliklari uchun 30.000 ta qoʻzi va uloqchani, 3000 ta buqani berdi. Bularning hammasi shohning shaxsiy mulkidan edi.

⁸Shohning a’yonlari ham xalqqa, ruhoniy va levilarga qurbonliklar uchun koʻngildan chiqarib hayvonlarni berdilar. Xudoning uyida xizmat qiluvchilarning boshliqlari Xilqiyo, Zakariyo va Yoxiyol ruhoniylarga Fisih qurbonliklari uchun 2600 ta qoʻzi bilan uloqcha va 300 ta buqa berdilar.

⁹Xonaniyo, uning ukalari Shamayo va Natanil, levilarning yoʻlboshchilari Xashaviyo, Yaviyol va Yoʻzabad Fisih qurbonliklari uchun levilarga 5000 ta qoʻzi bilan uloqcha va 500 ta buqa berdilar.

¹⁰Fisih marosimiga oid tayyorgarliklar tugagach, ruhoniylar bilan levilar shohning buyrugʻiga binoan oʻz joylarini egalladilar.

¹¹Levilar Fisih qoʻzilarini boʻgʻizlab, qonini ruhoniylarga berdilar. Ruhoniylar qonni qurbongohga sepdilar. Levilar esa qoʻzilarning terisini shilishga kirishdilar.

¹²Ular soʻyilgan qoʻzi, uloqcha va buqalarning qurbongohda kuydiriladigan qismlarini ajratib qoʻydilar. Soʻng bularni odamlarga xonadonlari boʻyicha taqsimlab berdilar. Toki har bir xonadon oʻziga tegishli qurbonligini Egamizga bagʻishlab, Musoning qonunidagi koʻrsatmalarga binoan keltirsin.

¹³Levilar qonun — qoidaga muvofiq, Fisih qoʻzilarini olovda pishirdilar, muqaddas qurbonliklar goʻshtini esa togʻoralarda, qozonlarda va tovalarda qaynatdilar. Goʻsht tayyor boʻlgach, uni darrov xalqning oldiga dasturxonga tortdilar.

¹⁴Shundan soʻnggina levilar oʻzlari uchun va ruhoniylar uchun Fisih taomini tayyorlashga kirishdilar. Negaki, Horun naslidan boʻlgan ruhoniylarning qoʻli kechgacha boʻshamadi, ular kuydiriladigan qurbonliklarni va yogʻlarni kuydirish bilan ovora edilar.

¹⁵Osif naslidan boʻlgan qoʻshiqchilar shoh Dovudning, Osif, Xaman va shohning valiysi Yodutunning koʻrsatmasiga binoan oʻz joylarida turdilar. Ma’bad darvozabonlari ham oʻz joylaridan siljimadilar. Levi birodarlari ularga Fisih taomini tayyorlaganlari uchun xizmatlarini toʻxtatishga zarurat boʻlmadi.

¹⁶Shunday qilib, oʻsha kuni shoh Yoʻshiyoning farmoniga koʻra, Egamizga bagʻishlangan hamma xizmatlar bajarildi. Fisih ziyofati nishonlanib, Egamizning qurbongohida kuydiriladigan qurbonliklar keltirildi.

¹⁷Isroil xalqi Fisih ziyofatini va yetti kun davomida Xamirturushsiz non bayramini nishonladi.

¹⁸Shomuil paygʻambar davridan buyon Isroilda Fisih ziyofati bu singari nishonlanmagan edi. Isroil shohlaridan birortasi, Yoʻshiyo singari Fisih ziyofatini ruhoniylar, levilar, jamiki Yahudo va Isroil xalqi hamda Quddus aholisi ishtirokida nishonlamagan edi.

¹⁹Bu Fisih ziyofati shoh Yoʻshiyo hukmronligining oʻn sakkizinchi yilida nishonlandi.

²⁰Bu voqealardan soʻng, Yoʻshiyo Ma’badni tartibga solib boʻlgach, Misr shohi Nexo jang qilgani Furot daryosi boʻyidagi Karxamish shahriga lashkarini boshlab keldi. Yoʻshiyo unga qarshi otlandi[211].

²¹Lekin Nexo Yoʻshiyoga elchilar orqali shunday xabar yubordi: “Ey Yahudo shohi! Sen bu jangga aralashma! Men senga emas, oʻz dushmanlarimga qarshi urushga otlandim. Xudo menga, shoshil, deb amr berdi. Xudo men tomonda, Unga qarshilik koʻrsatishni bas qil, aks holda, nobud boʻlasan.”

²²Ammo Yoʻshiyo jang qilishdan qaytmadi. Xudoning Nexo orqali aytgan soʻzlariga quloq solmadi. Shohona kiyimlarini oʻzgartirib, Magidoʻ[212] tekisligida jangga kirdi.

²³Jang paytida Misr kamonkashlari shoh Yoʻshiyoga oʻq otdilar. Shunda shoh a’yonlariga: “Meni bu yerdan olib chiqinglar, ogʻir yaralandim”, dedi.

²⁴A’yonlar Yoʻshiyoni jang aravasidan olib, boshqa jang aravasiga soldilar — da, Quddusga olib keldilar. Yoʻshiyo shu yerda vafot etdi. U ota — bobolarining xilxonasiga dafn qilindi. Butun Yahudo va Quddus aholisi Yoʻshiyo uchun aza tutdi.

²⁵Yeremiyo paygʻambar shoh Yoʻshiyoga atab marsiya aytdi. Shu kunga qadar[213] erkak va ayol qoʻshiqchilar Yoʻshiyoni xotirlaganlarida shu marsiyani aytishadi, bu Isroilda odat boʻlib qoldi. Bu marsiya qoʻshigʻi “Marsiyalar toʻplami”ga kiritilgan.

²⁶Yoʻshiyoning boshqa ishlari, Egamizga sodiqligi, Uning qonuniga binoan olib borgan faoliyati,

²⁷hayotidagi barcha voqealar, boshdan oxirigacha “Isroil va Yahudo shohlari kitobi”da yozilgan.