Read Uzbek Muqaddas Kitob Ezra 1 Bible Online

Ezra 1 - Uzbek Muqaddas Kitob bible

Ezra 1

¹Fors shohi Kurush hukmronligining birinchi yilida[3] Egamizning Yeremiyo orqali bildirgan soʻzlari[4] bajo boʻlishi uchun, Egamiz shoh Kurushning yuragiga Quddusdagi Ma’badni qayta qurish istagini soldi. Shunday qilib, Kurush oʻz shohligining hamma tomoniga xabarchilar joʻnatdi va yozma farmonda quyidagilarni e’lon qildi:

²“Fors shohi Kurush shunday demoqda: Samoviy Xudo — Egamiz yer yuzidagi jamiki shohliklarni menga bergan. U Yahudo yurtidagi Quddus shahrida Oʻziga bir uy qurishni menga topshirdi.

³Xudoning xalqidan boʻlganlarga men ijozat beraman: ular Quddusga borishlari va Isroil xalqining Xudosi — Egamizning uyini qayta qurishlari mumkin. Quddusda sajda qilinadigan Xudo Udir. Isroil xalqiga oʻzlarining Xudosi yor boʻlsin.

⁴Surgundagi yahudiylar yashaydigan hamma joyda shunday deb e’lon qilinsin: Quddusga qaytmaydigan yahudiylar qaytadigan yahudiylarga yordam bersin. Ularga kumush, oltin, safar uchun zarur buyumlar va chorva berishsin. Bulardan tashqari, Xudoning Quddusdagi uyi qayta qurilishi uchun koʻngildan chiqarib nazrlar berishsin.”

⁵Shunday qilib, Yahudo va Benyamin qabilalarining urugʻboshilari, ruhoniylar va levilar, shuningdek, Xudo ruhlantirgan har bir odam Egamizning Quddusdagi uyini qayta qurish uchun safarga tayyorlandi.

⁶Barcha qoʻshnilari ularga chin koʻngildan chiqarib nazrlar berdilar. Bulardan tashqari, kumush idishlar, oltin, safar uchun buyumlar, chorva va boshqa qimmatbaho hadyalar berib yordam qildilar.

⁷Shoh Kurush Egamizning uyiga tegishli boʻlgan buyumlarni olib kelishni buyurdi. Bu buyumlarni shoh Navuxadnazar Quddusdan olib kelib[5], oʻzining xudolari[6] uyiga qoʻygan edi.

⁸Shoh Kurush bu buyumlarni xazinabon Mitradot nazorati ostiga topshirdi. Mitradot esa bularni sanab, Yahudo yoʻlboshchisi[7] Shashbazzarga berdi.

⁹Buyumlarning roʻyxati quyidagicha edi: oltin togʻorachalar — 30 ta kumush togʻorachalar — 1000 ta boshqa idishlar[8] — 29 ta

¹⁰oltin kosalar — 30 ta kumush kosalar — 410 ta boshqa buyumlar — 1000 ta.

¹¹Oltin va kumush buyumlarning jami 5400[9] ta edi. Shashbazzar boshqa asirlar qatorida Bobildan Quddusga qaytib ketayotganda, bu buyumlarning hammasini oʻzi bilan olib ketdi.