Read Uzbek Muqaddas Kitob Ezra 10 Bible Online

Ezra 10 - Uzbek Muqaddas Kitob bible

Ezra 10

¹Ezra Xudoning uyi oldida oʻzini yerga otib yigʻlaganicha, xalqning gunohlarini e’tirof etdi. U Xudoga iltijo qilayotganda, atrofiga Isroildan katta jamoa — erkagu ayol, bolalar yigʻilishdi. Xalq ham achchiq — achchiq yigʻlardi.

²Elam naslidan Yoxiyol oʻgʻli Shaxaniyo Ezraga shunday deya murojaat qildi: “Biz mahalliy xalqlarning butparast ayollariga uylanib, Xudoyimizga xiyonat qildik. Lekin shunga qaramay, biz — Isroil xalqi uchun hali ham umid bor!

³Keling, Xudoyimiz bilan ahd qilaylik. Hazratim, sizning maslahatingizga koʻra va Xudoyimizning soʻzlaridan qoʻrqadiganlarning maslahatiga koʻra, barcha butparast xotinlarni bolalari bilan birga qoʻyib yuboraylik. Xudoning qonuniga amal qilaylik.

⁴Qani hazratim, ishga kirishing, bu sizning burchingizdir. Biz siz bilanmiz. Dadil boʻling, ishni boshlang.”

⁵Shunda Ezra oʻrnidan turib, ruhoniylarning, levilarning va butun Isroil xalqining boshliqlariga, aytilganlarni qilamiz, deb ont ichirdi. Hammalari ont ichdilar.

⁶Soʻng Ezra Xudoning uyi oldidan ketib, Eliashab oʻgʻli Yohuxanonning xonasiga bordi, tunni oʻsha yerda oʻtkazdi. U[90] na non yedi, na suv ichdi, surgundan qaytganlarning xiyonatkorligi dastidan qaygʻurayotgan edi.

⁷“Surgundan qaytganlarning hammasi Quddusga toʻplansin”, deb Yahudo yurti va Quddus boʻylab jar solindi.

⁸“Agar kimki uch kun ichida kelmasa, yoʻlboshchilarning va oqsoqollarning buyrugʻiga koʻra, ularning hamma mol — mulki musodara qilinsin, oʻzlari surgundan qaytganlar jamoasidan chiqarilsin”, deb xabar berildi.

⁹Uch kun ichida Yahudo va Benyamin hududida yashayotganlarning hammasi Quddusda toʻplandi. Bu voqea toʻqqizinchi oyning[91] yigirmanchi kunida roʻy berdi. Odamlar Xudoning uyi oldidagi hovlida joylashib oʻtirdi. Ahvolning jiddiyligidan va kuchli yomgʻir yogʻayotganidan xalq titrardi.

¹⁰Ruhoniy Ezra oʻrnidan turib, xalqqa dedi: “Sizlar butparast ayollarga uylanib, Egamizga xiyonat qildingizlar, Isroil xalqining ayblari ustiga ayb orttirdingizlar.

¹¹Endi ota — bobolaringizning Xudosi — Egamiz oldida bu gunohlaringizni tan olinglar, Uning xohishi boʻyicha ish tutinglar. Oʻzlaringizni mahalliy xalqlardan ayirib, butparast xotinlaringizni qoʻyib yuboringlar.”

¹²Shundan keyin butun jamoa baland ovoz bilan javob berdi: “Siz haqsiz! Aytganlaringizni qilamiz.

¹³Lekin xalq koʻp, yomgʻir ham yogʻyapti, shuning uchun ochiq joyda tura olmaymiz. Oramizdagi koʻpchilik bu gunohga qoʻl urgan, shuning uchun bu masalani bir — ikki kunda hal qilib boʻlmaydi.

¹⁴Mayli, yoʻlboshchilarimiz Quddusda qolsinlar, ular bu ishning mas’uliyatini oʻz zimmalariga olsinlar. Butparast ayollarga uylanganlarning hammasi belgilangan vaqtda oʻz shahar oqsoqoli va hakami bilan birga kelishsin. Bu qilmishimizdan gʻazablangan Xudo shunda gʻazabidan tushadi.”

¹⁵Faqat Osoyil oʻgʻli Yoʻnatan bilan Tixvo oʻgʻli Yaxziyo bu taklifga qarshi chiqdilar, levilardan Mashullom va Shabbatay ham ularni qoʻllab — quvvatladilar.

¹⁶Shunday qilib, surgundan qaytganlar berilgan taklifni qabul qildilar. Ruhoniy Ezra urugʻboshilar orasidan odamlarni tayinlab, ularning ismlarini yozib qoʻydi. Oʻninchi oyning[92] birinchi kuni ular bu ishni tekshirishga kirishdilar.

¹⁷Birinchi oyning[93] birinchi kuniga kelib, butparast ayollarga uylangan barcha erkaklar bilan bogʻliq boʻlgan masala koʻrib chiqildi.

¹⁸Butparast ayollarga uylangan odamlar quyidagilardir: Ruhoniylardan: Yohuzadax[94] oʻgʻli Yoshuaning urugʻidan va uning hamkorlaridan — Masiyo, Eliazar, Yoriv va Gadaliyo.

¹⁹Ular xotinlarini qoʻyib yuborishga ont ichdilar va ayblari uchun bitta qoʻchqorni ayb qurbonligi qildilar.

²⁰Immar urugʻidan — Xonin va Zabadiyo.

²¹Xarim urugʻidan — Masiyo, Ilyos, Shamayo, Yoxiyol va Uzziyo.

²²Pashxur urugʻidan — Eliyoʻnay, Masiyo, Ismoil, Natanil, Yoʻzabad va Elasax.

²³Levilardan: Yoʻzabad, Shimax, Kilayox (Kilit deb ham aytiladi), Patixiyo, Yahudo va Eliazar.

²⁴Qoʻshiqchilardan: Eliashab. Ma’bad darvozabonlaridan: Shallum, Talim va Uri.

²⁵Isroil xalqining qolganlaridan: Paroʻsh urugʻidan — Romiyo, Yiziyo, Malkiyo, Miyomin, Elazar, Malkiyo va Binayo.

²⁶Elam urugʻidan — Mattaniyo, Zakariyo, Yoxiyol, Abdi, Yorimoʻt va Ilyos.

²⁷Zattu urugʻidan — Eliyoʻnay, Eliashab, Mattaniyo, Yorimoʻt, Zabad va Azizax.

²⁸Boʻvay urugʻidan — Yohuxanon, Xanoniyo, Zabbay va Otley.

²⁹Banix urugʻidan — Mashullom, Mallux, Odayo, Yoshuv, Shayol va Yorimoʻt.

³⁰Paxatmoʻab urugʻidan — Adna, Xilol, Binayo, Masiyo, Mattaniyo, Bazalil, Binnuy va Manashe.

³¹Xarim urugʻidan — Eliazar, Ishshiyo, Malkiyo, Shamayo, Shimoʻn,

³²Benyamin, Mallux, Shamariyo.

³³Xashum urugʻidan — Mattanay, Mattatax, Zabad, Elifalet, Yorimay, Manashe va Shimax.

³⁴Banix urugʻidan — Maday, Imrom, Uval,

³⁵Binayo, Bidayo, Xalux,

³⁶Vaniyo, Miromoʻt, Eliashab,

³⁷Mattaniyo, Mattanay va Yasoy.

³⁸Binnuy urugʻidan — Shimax[95],

³⁹Shalamiyo, Natan, Odayo,

⁴⁰Maxnadbay, Shoshay, Shoroy,

⁴¹Ozariyol, Shalamiyo, Shamariyo,

⁴²Shallum, Emoriyo va Yusuf.

⁴³Navo urugʻidan — Yaviyol, Mattitiyo, Zabad, Zabino, Yadday, Yoʻel va Binayo.

⁴⁴Yuqoridagilarning hammasi butparast ayollarga uylangan edilar. Oʻsha ayollardan ayrimlari ularga farzandlar ham tugʻib bergan edilar[96].