Read Uzbek Muqaddas Kitob Ezra 7 Bible Online

Ezra 7 - Uzbek Muqaddas Kitob bible

Ezra 7

¹Oradan koʻp yillar[64] oʻtdi. Fors shohi Artaxshas[65] hukmronligi davrida Ezra degan bir odam bor edi. Uning nasabnomasi quyidagicha edi: Ezra — Sarayoning oʻgʻli[66], Sarayo — Ozariyoning oʻgʻli, Ozariyo — Xilqiyoning oʻgʻli,

²Xilqiyo — Shallumning oʻgʻli, Shallum — Zodoʻxning oʻgʻli, Zodoʻx — Oxitobning oʻgʻli,

³Oxitob — Emoriyoning oʻgʻli, Emoriyo — Ozariyoning oʻgʻli, Ozariyo — Maroyoʻtning oʻgʻli,

⁴Maroyoʻt — Zaraxiyoning oʻgʻli, Zaraxiyo — Uzzining oʻgʻli, Uzzi — Bukkining oʻgʻli,

⁵Bukki — Abushuvaning oʻgʻli, Abushuva — Finxazning oʻgʻli, Finxaz — Elazarning oʻgʻli, Elazar — oliy ruhoniy Horunning oʻgʻli edi.

⁶Ezra Isroil xalqining Xudosi — Egamizning Musoga bergan qonunini juda yaxshi biladigan mohir tafsirchi edi. Shoh Artaxshas hukmronligining yettinchi yilida[67] Ezra Bobildan Quddusga tomon yoʻlga otlandi. Isroil xalqidan, ruhoniylardan, levilardan, qoʻshiqchilardan, Ma’bad darvozabonlaridan, Ma’bad xizmatkorlaridan ba’zilari ham Ezra bilan birga Quddusga ketmoqchi boʻldilar. Ezraga Egasi Xudo yor boʻlgani uchun, shoh unga soʻragan narsasini in’om qildi.

⁸Birinchi oyning[68] birinchi kunida ular Ezraning boshchiligida Bobildan chiqdilar. Ezraga Xudoning marhamati yor boʻlgani uchun, ular toʻrt oydan keyin — beshinchi oyning[69] birinchi kunida Quddusga yetib keldilar.

¹⁰Ezra butun hayotini Egamiz bergan Tavrot kitobini oʻrganishga, unga amal qilishga, Tavrotdagi qonun — qoidalarni Isroil xalqiga oʻrgatishga bagʻishlagan edi.

¹¹Egamizning Isroil xalqiga bergan amr va qonunlarining mohir tafsirchisi — ruhoniy Ezraga shoh Artaxshas maktub bergan edi. Maktubning mazmuni quyidagicha edi:

¹²“Samoviy Xudo qonunlarining mohir tafsirchisi — ruhoniy Ezraga shohanshoh Artaxshasdan salomlar boʻlsin.

¹³Mening shohligimda istiqomat qilayotgan Isroil xalqidan, shuningdek, ruhoniy va levilardan sen bilan Quddusga ketishni istagan har kimga ijozat berilsin, deb farmon beraman.

¹⁴Men va yettita maslahatchim seni Yahudo yurti va Quddusga yuborib, u yerdagi vaziyatni tekshirib chiqishingga vakolat beramiz. Senga topshirilgan Xudoyingning qonuni u yerda ijro etilyaptimi yoki yoʻqmi, bilib kel.

¹⁵Quddusda maskan qilgan Isroil xalqining Xudosiga biz koʻngildan chiqarib nazr qilgan kumush va oltinlarni ham oʻzing bilan olib ket.

¹⁶Bobil viloyati boʻylab sen toʻplaydigan hamma kumush va oltinni ol. Isroil xalqi va ularning ruhoniylari oʻz Xudosining Quddusdagi uyi uchun koʻngildan chiqarib beradigan nazrlarni ham olib ket.

¹⁷Bu kumush va oltinga, birinchi navbatda, buqalar, qoʻchqorlar, qoʻzilar, ularga qoʻshib qilinadigan don bilan sharob nazrlarini sotib ol. Bularni Xudoyingning Quddusdagi uyi qurbongohida nazr qil.

¹⁸Qolgan kumush va oltinni esa Xudoyingning xohishiga muvofiq, oʻzingga va hamkorlaringga ma’qul kelganicha ishlatsang boʻladi.

¹⁹Xudoyingning uyida foydalanish uchun berilgan buyumlarni Quddusdagi Xudoga in’om qil.

²⁰Bordi — yu, Xudoyingning uyi uchun yana boshqa xarajatlar talab qilinsa, mablagʻni shoh xazinasidan olishing mumkin.

²¹Men, shoh Artaxshas, Furot daryosining gʻarbidagi viloyat[70] xazinabonlarining hammasiga farmon beraman: Samoviy Xudo qonunlarining mohir tafsirchisi — ruhoniy Ezra nima talab qilmasin, uning talabi soʻzsiz ijro etilsin.

²²200 pudga[71] qadar kumush, 1000 togʻoraga[72] qadar bugʻdoy, 200 koʻzaga[73] qadar sharob, 200 koʻzaga qadar moy va keragicha tuz berilsin.

²³Samoviy Xudo Oʻz uyi uchun nimalarni amr qilgan boʻlsa, oʻsha narsalar albatta muhayyo qilinsin. Mendan va mening merosxoʻrlarimdan Xudo gʻazablanmasin.

²⁴Biz yana sizlarni xabardor qilamizki, ruhoniylardan, levilardan, qoʻshiqchilardan, Ma’bad darvozabonlaridan, Ma’bad xizmatkorlaridan, Xudoning uyidagi boshqa xizmatkorlardan oʻlpon, soliq yoki xiroj olish man etiladi.

²⁵Sen esa, Ezra, Xudo bergan donolik bilan qozi va hakamlarni tayinla. Ular Furot daryosining gʻarbidagi viloyatda Xudoyingning qonunlarini biladigan jamiki xalqni hukm qilsinlar. Qonunlarni bilmaydigan odamlarga sizlar ta’lim beringlar.

²⁶Xudoyingning qonuniga va shohning qonuniga itoat qilmaganlarning hammasi albatta jazoga tortilsin: qatl qilinsin yoki surgun qilinsin, qamoqqa tashlansin yoki mol — mulki musodara qilinsin.”

²⁷Ota — bobolarimizning Xudosi — Egamizga hamdu sanolar boʻlsin! Egam Quddusdagi uyini sharaflash istagini shohning yuragiga soldi.

²⁸Egam Xudoning marhamati bilan men[74] shohning, uning maslahatchilari va barcha obroʻli a’yonlarining iltifotiga sazovor boʻldim. Egam Xudo menga yor boʻlgani uchun men dadil boʻlib, Isroil yoʻlboshchilarini oʻzim bilan olib ketgani toʻpladim.