Read Uzbek Muqaddas Kitob Ezra 9 Bible Online

Ezra 9 - Uzbek Muqaddas Kitob bible

Ezra 9

¹Shu voqealardan keyin Isroil xalqining yoʻlboshchilari mening[88] oldimga kelib, shunday deyishdi: “Surgundan qaytgan Isroil xalqining koʻpchiligi, hatto ba’zi ruhoniylar bilan levilar mahalliy xalqlardan oʻzlarini saqlamadilar. Ular Kan’on, Xet, Pariz, Yobus, Ommon, Moʻab, Misr va Amor xalqlarining jirkanch odatlarini oʻzlashtirib oldilar.

²Yahudiy erkaklarining ba’zilari oʻsha xalqlarning qizlariga uylandilar, oʻgʻillariga ham oʻsha xalqlarning qizlaridan olib berdilar. Shu tariqa muqaddas xalq yurtdagi boshqa xalqlar bilan chatishib ketdi. Bu xiyonatni yoʻlboshchilar bilan amaldorlar boshlab berishdi.”

³Men bu gaplarni eshitganimda qaygʻudan koʻylagim va ridoimni yirtib tashladim, soch — soqolimni yuldim. Qattiq iztirobda qoldim.

⁴Surgundan qaytganlarning bu xiyonati dastidan Isroil Xudosining soʻzlaridan qoʻrqadigan hamma odamlar mening atrofimga toʻplandilar. Men esa kechki qurbonlik nazr qilinadigan paytgacha iztirob chekib oʻtiraverdim.

⁵Kechki qurbonlik paytida men hamon iztirob chekkanimcha oʻtirgan oʻrnimdan turdim. Koʻylaklarim va ridoim yirtilgan holatda tiz choʻkdim. Egam Xudoga qoʻllarimni choʻzib,

⁶yolvordim: “Ey Xudoyim! Qattiq xijolatdaman, huzuringda boshimni koʻtarishga botinolmayman. Ey Xudoyim! Ayblarimiz boshimizdan ham oshib ketgan, gunohlarimiz togʻday uyilib, osmonu falakka yetgan.

⁷Ota — bobolarimiz davridan shu kungacha biz gunohga botib keldik. Ayblarimiz tufayli Sen bizni, shohlarimizni, ruhoniylarimizni boshqa yurtlarning shohlariga magʻlub qilding. Ular bizni oʻldirishdi, talon — taroj qilishdi, asir qilib olib ketishdi, xuddi hozirgiday, biz sharmandali ahvolga tushdik.

⁸Endi esa, ey Egamiz Xudo, Sen qisqa vaqt davomida bizga shafqatingni koʻrsatib, bizni omon saqlading, muqaddas maskaning oldiga joylashtirding. Bizga umid berding, qulligimizda[89] ozgina boʻlsa ham, halovat ato qilding.

⁹Ey Xudoyimiz, biz qul boʻlsak ham, Sen bizni tark etmading. Bizga marhamat koʻrsatib, Fors shohining iltifotiga sazovor qilding. Bizga yangi hayot ato qilding, uyingni qayta qurishimizga, uni tiklashimizga imkoniyat berding, Yahudo yurtida va Quddusda bexatar yashashimizga imkoniyat yaratding.

¹⁰Ey Xudoyimiz, endi nima ham derdik?! Bularning hammasidan keyin ham biz amrlaringga rioya qilmadik.

¹¹Sen paygʻambar qullaring orqali shunday amr bergan eding: «Sizlar egalik qilish uchun kirayotgan bu yurt mahalliy xalqlarning butparast udumlari tufayli harom boʻlgan. Xalqlar jirkanch odatlari bilan butun yurtni u boshidan bu boshigacha bulgʻadilar.

¹²Shuning uchun ularga qiz uzatmanglar, oʻgʻillaringizga ularning qizlarini olib bermanglar. Ularga hech qachon tinchlik va farovonlikni ravo koʻrmanglar. Shundagina sizlar kuchli boʻlasizlar, yurtning a’lo hosilidan yeb, rohatlanasizlar, bu yurtni bolalaringizga abadiy meros qilib qoldirasizlar.»

¹³Qabih ishlarimiz, oʻzlarimizning ayblarimiz boshimizga tushgan hamma koʻrgiliklarga sabab boʻldi. Aslida, ey Xudoyim, Sen bizni gunohlarimiz uchun yanada koʻp jazolashing kerak edi, lekin unday qilmading, ayrimlarimizni omon saqlading. Mana shulardan keyin ham

¹⁴biz amrlaringni buzdik. Jirkanch odatlarga mukkasidan ketgan xalqlar bilan quda — andachilik qildik! Endi Sen bizdan gʻazablanib, birontamizni ham tirik qoldirmay qirib tashlashing aniq!

¹⁵Ey Isroil xalqining Xudosi — Egamiz, Sen adolatlisan. Shunga qaramay, shu kungacha Sen bizni asrab kelding. Sening oldingda turishga haqimiz yoʻq, lekin mana, ayblarimiz bilan oldingda turibmiz.”