Read Uzbek Muqaddas Kitob Naximiyo 1 Bible Online

Naximiyo 1 - Uzbek Muqaddas Kitob bible

Naximiyo 1

¹Quyidagilar Xaxaliyo oʻgʻli Naximiyoning xotiranomasidir[2]. Shoh Artaxshas hukmronligining yigirmanchi yilida[3], Xislav oyida[4] men Shushandagi[5] qal’ada edim.

²Shunda ukam[6] Xonin boshqa ba’zi odamlar bilan Yahudo yurtidan keldi. Men ulardan asirlikka olib ketilmagan va surgundan qaytib borgan yahudiylarning holini, shuningdek, Quddus shahrining ahvolini soʻradim.

³Ular shunday javob berdilar: “Viloyatdagi[7] asirlikka olib ketilmagan va surgundan qaytib borgan yahudiylar ogʻir qaygʻu, sharmandali ahvolda qolganlar: Quddusning devori vayron boʻlib ketgan, darvozalari yondirilgan.”

⁴Bu soʻzlarni eshitganimda, oʻtirib yigʻladim. Bir necha kun qaygʻurib yurdim. Roʻza tutdim, Samoviy Xudoga iltijo qilib yurdim. Unga shunday deb yolvordim:

⁵“Ey Samoviy Xudo — Egam! Sen buyuk va haybatli Xudosan. Seni sevib, amrlaringga rioya qilgan bandalaringga ahdingni sodiq saqlaysan.

⁶Men, qulingning ibodatlarini eshit, ahvolimga boq. Isroil xalqi uchun kechayu kunduz qilgan iltijolarimni eshit. Axir, ular Sening qullaring — ku. Men xalqim qilgan hamma gunohlarni e’tirof etaman. Men oʻzim ham, xonadonim ham gunoh qildik.

⁷Quling Muso orqali bergan amrlaringga, farmonlaringga, qonun — qoidalaringga biz rioya qilmadik, Seni qattiq xafa qildik.

⁸Yolvoraman, quling Musoga bergan va’dangni[8] yodingda tut. Axir, Sen shunday degansan: «Agar sizlar Menga sodiq boʻlmasangizlar, Men sizlarni xalqlar orasiga tarqatib yuboraman.

⁹Lekin Menga yuz bursangizlar, amrlarimga rioya qilib, ularni bajarsangizlar, Men sizlarni yigʻib olaman. Yerning eng chetiga surgun qilingan boʻlsangiz ham, sizlarni oʻsha joylardan yigʻib kelaman, Men ulugʻlanishim uchun tanlangan joyga sizlarni qaytarib olib kelaman.»

¹⁰Biz Sening qullaringmiz, buyuk qudrating va ajoyibotlaring bilan Oʻzing qutqargan xalqingmiz.

¹¹Yo Rabbiy! Bu qulingning iltijolarini eshit. Seni izzat — hurmat qilishni xush koʻradigan hamma qullaringning iltijolariga quloq tut. Men, qulingga bugun muvaffaqiyat ber, shoh Artaxshasda menga nisbatan shafqat uygʻotgin.” Oʻsha paytlarda men shohning soqiysi[9] edim.