Read Uzbek Muqaddas Kitob Naximiyo 2 Bible Online

Naximiyo 2 - Uzbek Muqaddas Kitob bible

Naximiyo 2

¹Shoh Artaxshas hukmronligining yigirmanchi yili[10], Nison oyi[11] edi. Bir kuni shohga sharob keltirildi. Men sharobni olib kirib, unga uzatdim. Shoh qarshisida men hech qachon gʻamgin ahvolda boʻlmagandim.

²Shuning uchun shoh mendan soʻradi: — Nega gʻamgin koʻrinasan? Kasalga oʻxshamaysan — ku! Yuragingda biror darding boʻlsa kerak — a? Men qattiq qoʻrqib ketdim,

³shunga qaramay shohga dedim: — Shoh hazratlarining umrlari uzoq boʻlsin. Ota — bobolarimning qabrlari joylashgan shahar tashlandiq boʻlib, oʻsha shaharning darvozalari yondirib yuborilsa — yu, nega gʻamgin boʻlmayin?! —

⁴Shoh mendan: — Tilaging nima? — deb soʻradi. Shunda men Samoviy Xudoga ibodat qilib,

⁵shohga shunday javob berdim: — Agar shoh hazratlari ma’qul topsalar, bu qulingiz shoh hazratlaridan marhamat topgan boʻlsa, meni Yahudo yurtiga — ota — bobolarimning qabrlari joylashgan shaharga yuborsalar, deb iltimos qilmoqchi edim, toki men u shaharni qaytadan qurayin.

⁶Malika ham shohning yonida oʻtirgan edi. Shoh mendan: — Qancha vaqt yoʻl yurasan? Qachon qaytib kelasan? — deb soʻradi. Men unga qachon qaytib kelishimni aytdim. Shoh menga marhamat qilib, ijozat berdi.

⁷Soʻngra men shohga yana dedim: — Agar shoh hazratlari ma’qul deb topsalar, Furot daryosining gʻarbidagi viloyat[12] hokimlariga maktublar yozib berilsa, toki Yahudoga kirib borishim uchun ular menga ijozat berishsin.

⁸Yana shoh hazratlari oʻrmon qorovuli Osifga ham maktub yozib, unga koʻrsatmalar bersalar, u menga daraxtlar kesib bersin. Ma’bad yonidagi qal’a darvozalari uchun, shahar devori va oʻzim yashaydigan uy uchun kerak boʻladigan yogʻoch bilan u meni ta’minlasin. Men nima soʻragan boʻlsam, shoh hammasiga ijozat berdi, chunki Xudoyimning marhamati menga yor edi.

⁹Shoh bir necha lashkarboshisini va otliq sipohlarini menga hamroh qilib joʻnatdi. Men Furot daryosining gʻarbidagi viloyat hokimlari huzuriga borib, ularga shohning maktublarini berdim.

¹⁰Bayt — Xoʻronlik Sanballat[13] va Ommonlik malay Toʻviyo: “Isroil xalqining manfaati uchun jon kuydiradigan bittasi kelibdi” degan gapni eshitib, gʻoyat gʻazablandilar.

¹¹Shunday qilib, men Quddusga yetib keldim. Oradan uch kun oʻtgach,

¹²tunda oʻrnimdan turdim, yonimga bir nechta sheriklarimni olib, tashqariga chiqdim. Lekin Quddus haqidagi Xudo koʻnglimga solgan rejamni hech kimga aytmadim. Men mingan eshakdan boʻlak boshqa birorta hayvonni oʻzimiz bilan olmadik.

¹³Men tunda Soylik darvozasi orqali shahardan chiqib, Ajdar bulogʻiga[14], u yerdan Goʻng darvozasiga bordim. Vayron boʻlib yotgan Quddus devorini, yonib ketgan darvozalarini koʻzdan kechirdim.

¹⁴Soʻngra Buloq darvozasiga va Shoh hovuziga bordim. Lekin minib borayotgan eshagim vayronalar orasidan yoʻl topa olmadi.

¹⁵Shu sababdan men Qidron soyligiga[15] tushdim. Soylik boʻylab chiqib borib, oʻsha yerdan devorni koʻzdan kechirishda davom etdim. Soʻng ortimga qaytib, Soylik darvozasi orqali shaharga kirdim.

¹⁶Qayerga borganimni, nima qilayotganimni shahar amaldorlari bilmasdilar. Men yahudiylarga, ruhoniylarga, yoʻlboshchilarga, amaldorlarga va ishda qatnashadigan boshqa odamlarga hali hech gap aytmagandim.

¹⁷Nihoyat, endi ularga shunday dedim: “Qanchalar kulfatda qolganimizni oʻzlaringiz koʻrib turibsizlar! Quddus vayron boʻlib yotibdi, shaharning darvozalari yonib ketgan. Kelinglar, shahar devorini qaytadan quraylik, sharmandali ahvolimizdan qutulaylik.”

¹⁸Xudoyimning marhamati menga yor boʻlganini va shohning menga aytgan gaplarini ularga aytib berdim. Ular: “Qurilishni boshlaylik”, deyishdi. Shunday qilib, ular ishni boshlashga tayyor boʻldilar.

¹⁹Bayt — Xoʻronlik Sanballat, Ommonlik malay Toʻviyo va Arabistonlik Gashim buni eshitib, bizning ustimizdan kuldilar, nafrat bilan shunday dedilar: — Bu qilayotganlaringiz nimasi?! Sizlar shohga qarshi isyon koʻtaryapsizlarmi?!

²⁰Men ularga shunday javob berdim: — Samoviy Xudo ishimizning barorini beradi. Biz, Uning qullari, devorni qayta qurishni boshlaymiz. Ammo sizlar bizga gaplaringni oʻtkaza olmaysizlar, qoʻlingizdan hech narsa kelmaydi. Sizlar bizning diniy marosimlarimizda ham qatnasha olmaysiz.