Read Uzbek Muqaddas Kitob Naximiyo 3 Bible Online

Naximiyo 3 - Uzbek Muqaddas Kitob bible

Naximiyo 3

¹[16] Oliy ruhoniy Eliashab qoʻli ostidagi ruhoniylar bilan ishga kirishib, Qoʻy darvozasini qaytadan qurdilar. Soʻngra darvozani Xudoga bagʻishlab, darvozaning qanotlarini oʻrnatdilar. Miyo[17] minorasidan Xanonil minorasigacha boʻlgan devorni ham Xudoga bagʻishladilar.

²Yerixo shahridan boʻlgan erkaklar devorning keyingi qismini qurdilar. Ulardan keyingi qismini esa Imri oʻgʻli Zakkur qurdi.

³Xassano urugʻi Baliq darvozasini qurdi. Ular darvozaning yondorlarini tiklab, darvoza qanotlarini, zulfinlarini, tambalarini oʻrnatdilar.

⁴Devorning undan keyingi qismida Xakkoʻzning nabirasi, Uriyoning oʻgʻli Miromoʻt ta’mirlash ishlarini olib bordi. Keyingi qismida Mashazavilning nabirasi, Barxiyoning oʻgʻli Mashullom, undan keyingi qismida Bano oʻgʻli Zodoʻx ta’mirlash ishlarini olib bordilar.

⁵Keyingi qismida Taxuva shahridan boʻlgan erkaklar ta’mirlash ishlarini olib bordilar. Lekin shahar zodagonlari qurilish nazoratchilari buyurgan ishlardan[18] bosh tortdilar.

⁶Posiyox oʻgʻli Yoʻxadax va Besodayax oʻgʻli Mashullom Yashono darvozasini[19] ta’mirladilar. Ular darvozaning yondorlarini tiklab, darvoza qanotlarini, zulfinlarini, tambalarini oʻrnatdilar.

⁷Devorning navbatdagi qismida Givonlik Malatiyo, Mironoʻtlik Yodoʻn, shuningdek, Givon va Mispax aholisining erkaklari ta’mirlash ishlarini olib bordilar. Mispax shahri Furot daryosining gʻarbidagi viloyatning[20] ma’muriy markazi edi.

⁸Devorning keyingi qismida zargarlardan biri Xarhiyo oʻgʻli Uziyol ta’mirlash ishlarini olib bordi. Uning yonida attorlardan biri Xanoniyo ta’mirlash ishlarini olib bordi. Ular Quddus devorining Keng devorgacha boʻlgan qismini ta’mirladilar.

⁹Devorning keyingi qismida Xur oʻgʻli Rafiyo ta’mirlash ishlarini olib bordi. Rafiyo Quddus hududining yarmini boshqaruvchi hokim edi.

¹⁰Undan keyin Xarumaf oʻgʻli Yodiyo oʻz uyining roʻparasidagi devorni ta’mirladi. Devorning keyingi qismida Xashavniyo oʻgʻli Xattush ta’mirlash ishlarini olib bordi.

¹¹Xarim oʻgʻli Malkiyo va Paxatmoʻab oʻgʻli Xashshub devorning keyingi qismini va Tandir minorasini ta’mirladilar.

¹²Devorning keyingi qismida Xalloxesh oʻgʻli Shallum oʻz qizlari bilan ta’mirlash ishlarini olib bordi. Shallum Quddus hududining ikkinchi yarmini boshqaruvchi hokim edi.

¹³Xanun boshchiligida Zonoʻvax aholisi Soylik darvozasini ta’mirladi. Ular darvozani qurib, darvozaning qanotlarini, zulfinlarini, tambalarini oʻrnatishdi, devorning ming tirsak[21] uzunligidagi Goʻng darvozasigacha boʻlgan qismini ham ta’mirlashdi.

¹⁴Bayt — Xakerem hududining hokimi Raxav oʻgʻli Malkiyo Goʻng darvozasini ta’mirladi. U darvozani qurib, darvozaning qanotlarini, zulfinlarini, tambalarini oʻrnatdi.

¹⁵Mispax hududining hokimi Xolxozi oʻgʻli Shallum Buloq darvozasini ta’mirladi. U darvozani qurib, ustini yopdi va darvozaning qanotlarini, zulfinlarini, tambalarini oʻrnatdi. Shuningdek, Siloam[22] hovuzi yonidagi devorni ham qaytadan qurdi. Devorning bu qismi shohning bogʻidan to Dovud qal’asidan pastga ketgan zinapoyagacha choʻzilgan edi.

¹⁶Undan keyin Ozbuk oʻgʻli Naximiyo ta’mirlash ishlarini olib bordi. Naximiyo Bayt — Zur hududining yarmini boshqaruvchi hokim edi. U devorni Dovud qabristonining roʻparasigacha — sun’iy hovuz va Jangchilar uyigacha boʻlgan qismini ta’mirladi.

¹⁷Quyidagi levilar devorning keyingi bir necha qismlarini qaytadan qurdilar: Banix oʻgʻli Raxum devorning keyingi qismini qurdi. Keylax hududining yarmini boshqaruvchi hokim Xashaviyo oʻz hududi nomidan devorning navbatdagi qismini qurdi.

¹⁸Devorning undan keyingi qismini ularning birodarlari Xanadod oʻgʻli Binnuy[23] boshchiligida qurishdi. Binnuy Keylax hududining ikkinchi yarmini boshqaruvchi hokim edi.

¹⁹Keyingi qismida Mispax shahri hokimi Yeshuva oʻgʻli Eyzar ta’mirlash ishlarini olib bordi. U aslahaxonaga chiqadigan yoʻlning roʻparasidagi devorni gʻisht tirgovuchigacha[24] boʻlgan qismini ta’mirladi.

²⁰Zabbay oʻgʻli Borux devorning keyingi qismini — gʻisht tirgovuchidan oliy ruhoniy Eliashabning uyi eshigigacha boʻlgan qismini ta’mirladi.

²¹Xakkoʻzning nabirasi, Uriyo oʻgʻli Miromoʻt[25] devorning keyingi qismini — Eliashab uyining eshigi roʻparasidan to uyning oxirigacha boʻlgan qismini ta’mirladi.

²²Quddus atrofida istiqomat qiladigan ruhoniylar devorning navbatdagi qismini ta’mirladilar.

²³Ulardan keyin Benyamin va Xashshub devorning oʻz uylari roʻparasidagi qismini ta’mir qildilar. Ulardan keyin Ononiyohning nabirasi, Masiyoning oʻgʻli Ozariyo oʻz uyining roʻparasidagi qismini ta’mirladi.

²⁴Xanadod oʻgʻli Binnuy[26] devorning keyingi qismini — Ozariyoning uyidan to devorning burchagidagi gʻisht tirgovuchigacha boʻlgan qismini ta’mirladi.

²⁵Uzay oʻgʻli Polol devorning gʻisht tirgovuchidan boshlangan qismini ta’mirladi. Devorning bu qismi soqchilar hovlisi yonidagi shohning yuqori saroy minorasi roʻparasida joylashgan edi. Paroʻsh oʻgʻli Podiyo

²⁶va Ofel tepaligida[27] istiqomat qiluvchi Ma’bad xizmatkorlari devorning keyingi qismini ta’mirladilar. Ular devorning sharq tomonidagi Suv darvozasigacha va baland minoragacha boʻlgan qismini ta’mirladilar.

²⁷Taxuvalik erkaklar[28] devorning keyingi qismini ta’mirladilar. Ular baland minoraning roʻparasini to Ofel devorigacha ta’mir qildilar.

²⁸Ruhoniylar guruhi devorning Ot darvozasidan tepalikka tomon ketgan qismini ta’mirladilar. Har biri oʻz uyining roʻparasini ta’mir qildi.

²⁹Immar oʻgʻli Zodoʻx oʻz uyining roʻparasini ta’mirladi. Shaxaniyo oʻgʻli Shamayo devorning keyingi qismini ta’mirladi. Shaxaniyo Ma’badning Sharqiy darvozasi darvozaboni edi.

³⁰Shalamiyo oʻgʻli Xanoniyo va Zalafning oltinchi oʻgʻli Xanun devorning keyingi qismini ta’mirladi. Barxiyo oʻgʻli Mashullom oʻzining uyi roʻparasini ta’mirladi.

³¹Zargarlardan biri Malkiyo devorning burchagidagi yuqori xonagacha boʻlgan qismini ta’mirladi. Ma’bad xizmatkorlarining va savdogarlarning uyi shu yerda — Nazorat[29] darvozasi yonida joylashgan edi.

³²Devorning burchakdagi yuqori xonadan Qoʻy darvozasigacha boʻlgan qismini zargarlar va savdogarlar ta’mirladilar.