Read Uzbek Muqaddas Kitob Ester 4 Bible Online

Ester 4 - Uzbek Muqaddas Kitob bible

Ester 4

¹Mardoxay yuz bergan voqeadan xabardor boʻlgach, kiyimlarini yirtdi, qanorga oʻranib, ustiga kul sochdi[30]. Keyin qattiq alamli faryod koʻtarib, shahar boʻylab yurdi.

²Oʻsha holatda saroy darvozasiga bordi, lekin qanor kiyib saroy darvozasidan ichkariga kirish mumkin emasdi.

³Shuningdek, har bir viloyatda — shohning amru farmoni yetib borgan joylarda yahudiylar chuqur qaygʻuga botdilar, roʻza tutib, yigʻlab nola qildilar. Koʻpchilik qanorga oʻranib va kulga belanib yotdi.

⁴Esterning kanizlari va xizmatkorlari kelib, bu haqda xabar berishganda, malika qattiq tashvishga tushdi. “Mardoxay ustidagi qanorni yechib, mana bu kiyimlarni kiyib olsin”, deb malika kiyim berib yuborgan edi, Mardoxay olmadi.

⁵Esterning xizmatiga shoh tayinlagan Xatax ismli mulozim[31] bor edi. Ester Xataxni chaqirib, unga: “Bu nimasi, Mardoxay nimaga bunday qilyapti ekan, bilib kel — chi”, deb buyurdi.

⁶Xatax shoh saroyi darvozasi oldidagi shahar maydoniga — Mardoxayning yoniga ketdi.

⁷Mardoxay oʻzining boshiga tushgan hamma kulfatni, Xomon yahudiylarga qirgʻin keltirish uchun shoh xazinasiga qancha miqdorda kumush berishga va’da qilganini Xataxga aytib berdi.

⁸Keyin Mardoxay Xataxga yahudiylarni qirish toʻgʻrisida Shushanda e’lon qilingan farmondan bir nusxasini berib: “Esterga buni koʻrsat, u hamma narsani tushunib olsin”, dedi. “Ester shoh huzuriga kirib, oʻz xalqiga rahm etishini iltijo qilib soʻrasin”, deb tayinladi.

⁹Xatax qaytib kelib, Mardoxayning gaplarini Esterga aytib berdi.

¹⁰Ester: “Mardoxayga ushbu gaplarni yetkaz”, deb Xataxni yana joʻnatdi:

¹¹“Shoh saroyida hamma xizmat qilayotganlar va shohning qoʻli ostidagi viloyatlar xalqi shuni biladilarki, kimki ichki hovliga — shoh huzuriga chaqirilmasdan kirsa, erkakmi, ayolmi, baribir, hukm bitta — uni oʻlim kutadi. Shoh saltanatning oltin hassasini kimga tomon uzatsagina, oʻsha tirik qoladi. Lekin oʻttiz kundan buyon shoh meni chaqirgani yoʻq.”

¹²Esterning bu gaplarini Mardoxayga aytishgach,

¹³u Esterga shu javobni yetkazishni soʻradi: “Saroyda yashaganim uchun yahudiylardan yolgʻiz oʻzim omon qolaman, deb oʻylamagin.

¹⁴Agar shu damlarda sen sukut saqlasang, yahudiylarga boshqa joydan najot keladi, ular ozod boʻladilar. Sen va otang xonadoni esa halok boʻlasizlar. Kim bilsin, balki shunaqa kunlar uchun sen malikalik martabasiga erishgandirsan.”

¹⁵Ester ham Mardoxayga quyidagicha javob joʻnatdi:

¹⁶“Boring, Shushandagi hamma yahudiylarni toʻplab, men uchun roʻza tutinglar. Uch kechayu uch kunduz hech narsa yemanglar ham, ichmanglar ham. Men ham kanizaklarim bilan roʻza tutaman, soʻngra qonunga xilof boʻlsa ham, shoh huzuriga boraman. Mayli, oʻlsam, oʻlay.”

¹⁷Mardoxay ketdi va Ester nima buyurgan boʻlsa, hammasini qildi.