Read Uzbek Muqaddas Kitob Ester 5 Bible Online

Ester 5 - Uzbek Muqaddas Kitob bible

Ester 5

¹Uchinchi kuni Ester shohona liboslarini kiyib, saroyning ichki hovlisida — shoh yashaydigan xosxona roʻparasida paydo boʻldi. Shoh xosxonaning toʻridagi taxtda oʻtirib,

²hovlida kutib turgan malika Esterni koʻrdi — yu, unga marhamat qildi va qoʻlidagi saltanatning oltin hassasini Esterga tomon choʻzdi. Ester yaqinroq kelib hassaning uchiga tegindi.

³Shoh undan: — Senga nima kerak, malika Ester? — deb soʻradi. — Tilaging nima? Hatto yarim shohlikni soʻrasang ham beriladi.

⁴— Agar shohimiz ma’qul koʻrsalar, bugun Xomon bilan birga menikiga ziyofatga kelsalar, — dedi malika. — Men shohimiz uchun ziyofat tayyorlagandim.

⁵Shoh: — Zudlik bilan borib Xomonni topib kelinglar! — deb buyurdi. — Esterning istagini bajo qilaylik. Shunday qilib, shoh Xomon bilan birga Ester tayyorlagan ziyofatga bordi.

⁶Shoh maydan ichar ekan: — Ayt, nima istaysan? Nima istasang beriladi, — dedi Esterga. — Qanday tilaging bor? Yarim shohlikni soʻrasang ham, xohishing qondiriladi. Ester shunday javob berdi:

⁷— Mening istagim va iltimosim shuki,

⁸agar shohimiz mendan mamnun boʻlsalar, shohimiz mening tilagimni va istagimni qondirishni ma’qul koʻrsalar, ertaga men tayyorlaydigan ziyofatga yana Xomon bilan birga kelsinlar. Oʻshanda shohimizning savoliga javob beraman.

⁹Xomon oʻsha kuni ziyofatdan xursand, kayfiyati chogʻ boʻlib chiqdi. U shoh saroyi darvozasi oldida Mardoxayni koʻrdi. Mardoxay Xomonning hurmati uchun oʻrnidan turmadi ham, ta’zim ham qilmadi. Xomon esa gʻazabdan tutaqib ketdi.

¹⁰Biroq u oʻzini bosdi. Uyiga kelib, doʻstlarini va xotini Zareshni chaqirtirdi.

¹¹Xomon ularga oʻzining cheksiz boyligi va koʻpdan — koʻp oʻgʻillari toʻgʻrisida gapirdi, shuningdek, shoh uni a’yonlar va xizmatkorlar ustidan yuksak martabaga koʻtargani haqida maqtandi.

¹²Keyin u yana aytdi: — Malika Ester ziyofat tayyorlagan ekan, shoh bilan mendan boshqa hech kimni taklif qilmabdi. Ertaga ham men shoh bilan birga unikiga ziyofatga chaqirilganman.

¹³Lekin saroy darvozasida turgan yahudiy Mardoxayni koʻrganimda, bularning men uchun hech bir qimmati qolmaydi.

¹⁴Shunda xotini Zaresh va hamma doʻstlari Xomonga maslahat berishdi: — Dor tayyorlashsin, balandligi ellik tirsak[32] boʻlsin. Ertalab shohdan iltimos qil, Mardoxayni oʻsha dorga osishsin[33]. Keyin xursand boʻlib, shoh bilan birga ziyofatga boraverasan. Bu gap Xomonga ma’qul tushdi. U dorni[34] tayyorlatib qoʻydi.