Read Uzbek Muqaddas Kitob Ester 9 Bible Online

Ester 9 - Uzbek Muqaddas Kitob bible

Ester 9

¹Shohning amru farmoni ijro qilinadigan oʻn ikkinchi oy — Adar oyining[53] oʻn uchinchi kuni keldi. Bu kunni yahudiylarning gʻanimlari, ularning ustidan hukmronlikni egallaymiz, deb umid bilan kutgan edilar. Ammo aksincha boʻlib chiqdi: yahudiylar oʻz gʻanimlari ustidan hukmronlikni oʻrnatdilar.

²Yahudiylar yovuz kimsalarga qarshi kurashish uchun shoh Axashverashga[54] qarashli hamma viloyatlardagi oʻzlari yashaydigan shaharlarda[55] bir joyga yigʻildilar. Hech kim yahudiylarga dosh bera olmadi, chunki yahudiylardan qoʻrquv tuygʻusi hamma xalqlarni qamrab olgan edi.

³Viloyatlardagi hamma beklar, noiblar, hokimlar va shohning a’yonlari Mardoxaydan qoʻrqqanlari uchun yahudiylarni qoʻllab — quvvatladilar.

⁴Mardoxay saroyning yuksak martabali odami boʻlib, u tobora kuchayib borar, uning shuhrati butun viloyatlarga yoyilardi.

⁵Yahudiylar jamiki dushmanlarini qilichdan oʻtkazib, oʻldirib, qirib tashladilar. Gʻanimlariga nisbatan istaganini qildilar.

⁶Jumladan, yahudiylar Shushan qal’asida besh yuz kishini qirib tashladilar.

⁷Yana yahudiylar oʻzlarining dushmani Xamadoto oʻgʻli Xomonning oʻnala oʻgʻlini — Parshandata, Dalfon, Aspata, Poʻrata, Odaliyo, Oridato, Parmashto, Orisay, Oriday va Vayzotoni oʻldirdilar. Ammo mol — mulkiga qoʻl tekkizmadilar.

¹¹Oʻsha kuni Shushan qal’asida oʻldirilganlarning hisobini shohga ma’lum qildilar.

¹²Shoh esa malika Esterga aytdi: — Yahudiylar Shushan qal’asida Xomonning oʻnala oʻgʻlini va yana besh yuz kishini qirib, yoʻq qildilar. Kim bilsin, boshqa viloyatlarimda ular nima qildilar ekan? Istaging nima? Ayt, qondirayin. Yana qanday tilaging bor? Bajo qilayin.

¹³— Agar shohimizga ma’qul boʻlsa, Shushandagi yahudiylar ertaga ham bugungi farmoningizni ijro etsinlar, — dedi Ester. — Xomonning oʻnala oʻgʻlining jasadlari ham dorga osilsin[56].

¹⁴Shoh ushbu istakni bajarishni buyurdi. Shushanda farmon chiqarildi. Xomonning oʻnala oʻgʻlining jasadi ham dorga osildi.

¹⁵Adar oyining oʻn toʻrtinchi kuni Shushandagi yahudiylar yana toʻplanib, qal’ada dushmanlardan uch yuztasini oʻldirdilar. Lekin mol — mulkiga qoʻl tekkizmadilar.

¹⁶Shohlikning turli viloyatlarida yashaydigan boshqa yahudiylar ham jonini saqlash va dushmanlaridan qutulish uchun bir joyga toʻplandilar. Dushmanlaridan yetmish besh ming kishini oʻldirdilar, lekin mol — mulkiga qoʻl tekkizmadilar.

¹⁷Bularning hammasi Adar oyining oʻn uchinchi kuni yuz berdi. Yahudiylar oʻn toʻrtinchi kuni tinchib, bu kunni bayram qildilar.

¹⁸Shushandagi yahudiylar ham oʻzlarini qutqarish uchun oʻn uchinchi va oʻn toʻrtinchi kunlari yigʻildilar. Oʻn beshinchi kuni esa tinchib, bu kunni bayram qildilar.

¹⁹Shuning uchun qishloqlardagi aholi Adar oyining oʻn toʻrtinchi kunini bayram sifatida nishonlab ziyofat uyushtiradilar va bir — birlariga taom ulashadilar.

²⁰Mardoxay bu voqealarni yozib qoʻydi. Soʻngra shoh Axashverash qoʻli ostidagi uzoq — yaqindagi hamma yurtlarda yashayotgan yahudiylarga maktublar yubordi.

²¹Maktubda har yili Adar oyining oʻn toʻrtinchi va oʻn beshinchi kunlarini nishonlash lozimligi ta’kidlangan edi.

²²Chunki bu kunlar yahudiylar oʻz dushmanlaridan qutulgan kunlardir. Oʻsha oy gʻam — xursandchilikka, motam bayramga aylangan oydir. Mardoxay: “Shu kunlari ziyofat berib, xursandchilik qilinsin, taomlar ulashilsin, kambagʻallarga hadyalar in’om qilinsin”, deb buyurgan edi.

²³Shunday qilib, yahudiylar Mardoxayning buyrugʻini qabul qildilar va bu bayramlarini har yil nishonlashni davom ettiraverdilar.

²⁴Darvoqe, butun yahudiylarning dushmani Oʻgax[57] naslidan boʻlgan Xamadoto oʻgʻli Xomon fitna qoʻzgʻab yahudiylarni ezib, yoʻq qilish uchun pur[58] — qur’a tashlagandi.

²⁵Lekin Ester shohning huzuriga kirganda[59], shoh yana boshqa bir maktub orqali farmon bergandi[60]. Shunday qilib, Xomon yahudiylarga qarshi yovuz reja oʻylab qoʻygandi, lekin rejasi oʻzining boshiga yetdi. Xomon va uning oʻgʻillari dorga osildi.

²⁶Shuning uchun bu bayramga Purim[61] deb nom berilgandi. Bu nom “pur” soʻzidan olingan. Shunday qilib, yahudiylar Mardoxayning maktubida[62] yozilganlardan, koʻrgan — kechirganlaridan va boshlariga tushgan koʻrgiliklardan keyin,

²⁷oʻzlari, bolalari va barcha qabiladoshlari oʻsha ikki kunni belgilangan vaqtda, yozilganiday, har yili doimiy ravishda bayram qilishga qaror qilgandilar.

²⁸“Bu kunlar avlodlar osha hamma oilada, viloyatlarda, har bir shaharda unutilmasdan, bayram qilinsin, Purim kunlarini yahudiylar oʻtkazib yubormasin, bu kunlar avlodlar osha davom etib xotirlansin”, deb qaror chiqardilar.

²⁹Abuhayil qizi malika Ester, yahudiy Mardoxay bilan birga, oʻz huquqi boʻyicha, Purim toʻgʻrisidagi oʻsha maktubni[63] yozib, tasdiqlagandi.

³⁰Mardoxay Axashverashning hukmronligi ostidagi yuz yigirma yettita viloyatda yashaydigan hamma yahudiylarga tinchlik — omonlik tilangan oʻsha maktublarni yubordi.

³¹Maktubda malika Ester bilan Mardoxay buyurganlariday, Purim kunlarini belgilangan sanada nishonlashga qat’iy rioya qilishlari aytilgan edi. Yahudiylarning oʻzlari va bolalari roʻza tutishga va motam odatlariga amal qilganlari singari, bu bayramga ham rioya qilishlari kerakligi ta’kidlangan edi.

³²Shunday qilib, Purimga oid qoidalar, Esterning buyrugʻiga koʻra, tasdiqlandi va kitobga yozib qoʻyildi.