Read Uzbek Muqaddas Kitob Chiqish 11 Bible Online

Chiqish 11 - Uzbek Muqaddas Kitob bible

Chiqish 11

¹Egamiz Musoga aytgandi[37]: “Men fir’avnning boshiga ham, Misr yurtiga ham yana bitta falokat yuboraman, oʻshandan keyingina bu yerdan ketishingizga u sizlarga ijozat beradi. Bu yurtdan oʻzi sizlarni hatto haydab chiqaradi.

²Endi Isroil xalqiga ayt: hamma erkagu ayol Misrlik qoʻshnisidan oltin, kumush taqinchoqlar soʻrab olsin.”

³Egamiz Misrliklarni shunday qildiki, ular Isroil xalqiga iltifot koʻrsatdilar. Musoni ham Misr yurtida, fir’avnning a’yonlari, Misr xalqi koʻz oldida gʻoyat ulugʻ qilgan edi.

⁴Shunda Muso fir’avnga dedi: — Egamiz shunday aytmoqda: “Tun yarmida Misr boʻylab yuraman.

⁵Shunda Misrdagi hamma toʻngʻich oʻgʻillar — taxtda oʻtirgan fir’avnning toʻngʻichidan tortib, qoʻl tegirmonida oʻtirib ishlayotgan choʻri xotinning toʻngʻich oʻgʻligacha nobud boʻladi. Hatto chorvaning birinchi erkak bolasigacha nobud boʻladi.

⁶Butun Misr boʻylab qattiq faryod koʻtariladi. Bunaqa voqea ilgari boʻlmagan, bundan keyin ham boʻlmaydi.

⁷Isroil xalqi yashagan yerlarda esa tinchlik hukm suradi. Ularga qarashli birorta odamga yoki birorta hayvonga hatto it ham hurib qoʻymaydi. Oʻshanda Men, Egangiz, Isroil xalqini Misr xalqidan ayirganimni bilib olasizlar.”

⁸Oʻshanda a’yonlaring hammasi kelib, menga ikki bukilib ta’zim qiladi. Menga: “Sen ham, senga ergashgan xalqing ham ketinglar”, deb yolvorasizlar. Men oʻshandan keyin ketaman. Muso gʻazab bilan fir’avnning huzuridan chiqib ketdi.

⁹Egamiz Musoga shunday degan edi: “Misrda Mening ajoyibotlarim koʻpayishi uchun fir’avn sizlarning gapingizga quloq solmaydi.”

¹⁰Muso bilan Horun fir’avnning oldida hamma ajoyibotlarni koʻrsatib boʻldilar. Lekin Egamiz fir’avnning yuragini tosh qilib qoʻydi. Fir’avn oʻz yurtidan Isroil xalqining ketishiga ijozat bermadi.