Read Uzbek Muqaddas Kitob Chiqish 18 Bible Online

Chiqish 18 - Uzbek Muqaddas Kitob bible

Chiqish 18

¹Midiyon yurtining ruhoniysi Yatro Musoning qaynatasi edi. Xudo Musoga va Oʻz xalqi Isroilga hamma qilganlarini, Egamiz Isroil xalqini Misrdan qanday qilib olib chiqqanini u eshitdi.

²Muso xotinini otasi yoniga joʻnatib yuborganda[79], Yatro Musoning xotini Zippura bilan

³ikkala oʻgʻlini yoniga olgan edi. Muso: “Men begona yurtda musofir boʻlib qoldim”, deb toʻngʻich oʻgʻliga Gershom[80] deb ism qoʻygan edi.

⁴Soʻngra: “Ota — bobolarimning Xudosi menga madad berdi, meni fir’avnning qilichidan qutqardi[81]”, deb ikkinchi oʻgʻliga Eliazar[82] deb ism qoʻygandi.

⁵Qaynatasi Musoning xotini va oʻgʻillarini Xudoning muqaddas togʻi[83] etagiga — sahroda Muso tikkan chodirga boshlab keldi.

⁶Yatro Musoga: “Men, qaynatang Yatro, xotining va ikkala oʻgʻling bilan birga sening yoningga boryapmiz”, deb xabar berdi.

⁷Muso qaynatasini kutib olgani chiqdi va unga ta’zim qilib, oʻpdi. Ikkovlari bir — biridan hol — ahvol soʻrab, chodirga kirishdi.

⁸Egamiz Isroil xalqi uchun fir’avnni va Misr xalqini nimalar qilganini, Isroil xalqi yoʻlda chekkan azob — uqubatlarni, Egamiz ularni qanday qutqarganini Muso qaynatasiga aytib berdi.

⁹Egamiz Isroil xalqiga qilgan yaxshiliklari uchun, ularni Misrliklarning qoʻlidan qutqargani uchun Yatro sevinib, shunday dedi:

¹⁰— Sizlarni Misrliklarning va fir’avnning qoʻlidan qutqargan Egamizga hamdu sanolar boʻlsin! Isroil xalqini Misrliklarning zulmidan U qutqardi.

¹¹Egamiz boshqa hamma xudolardan ulugʻ ekanini endi bilaman. Egamiz Oʻz xalqini takabbur Misrliklarning qoʻlidan xalos qildi.

¹²Soʻngra Musoning qaynatasi Yatro Xudoga kuydiriladigan qurbonlik va boshqa qurbonliklar keltirdi. Horun va barcha Isroil oqsoqollari Musoning qaynatasi bilan Xudoning huzurida muqaddas taom yegani kelishdi.

¹³Ertasi kuni Muso hukm kursisiga oʻtirib, xalqning janjallarini ajrim qila boshladi. Xalq Musoning atrofida ertalabdan kechgacha tik turdi.

¹⁴Qaynatasi Musoning xalq uchun qilayotgan hamma ishlarini koʻrgach, aytdi: — Nimaga shuncha ishni bir oʻzing qilyapsan? Odamlar sendan yordam soʻrash uchun kun boʻyi tik turishdi.

¹⁵Shunda Muso qaynatasiga aytdi: — Odamlar Xudoning hukmini bilish uchun mening oldimga kelishadi.

¹⁶Qachon bir janjalli ish boʻlsa ham mening oldimga kelishadi. Men esa ikkala tomon oʻrtasida qaror chiqarib, Xudoning qonun — qoidalarini ularga aytaman.

¹⁷— Bu yoʻl yaxshi emas, — dedi qaynatasi Musoga.

¹⁸— Ham oʻzingni, ham yoningdagi xalqni qiynayapsan. Bu ish juda ogʻir yuk, bir oʻzing bajara olmaysan.

¹⁹Gapimga quloq sol, senga bir maslahat berayin: Xudo senga yor boʻlsin. Xudoning huzurida xalq uchun sen vositachi boʻlishing kerak. Xalqning bahs — munozaralarini Xudoga sen yetkazishing lozim.

²⁰Xudoning qarorini xalqqa sen ayt, Xudoning qonun — qoidalarini oʻrgat, ular qanday qilib toʻgʻri hayot kechirishlari kerakligini koʻrsat.

²¹Ammo bularga qoʻshimcha qilib, sen Xudodan qoʻrqqan, diyonatli, tamadan nafratlanadigan, layoqatli odamlarni tanlab ol. Ularni xalq tepasiga mingboshi, yuzboshi, ellikboshi, oʻnboshi qilib tayinla.

²²Bu odamlar hamma haq masalalar ustidan qaror qilib, xalqqa xizmat qilishsin. Juda muhim yoki juda qiyin masalalarni esa senga olib kelishlari mumkin. Kichikroq ishlarni oʻzlari koʻrib chiqaversin. Ular sen uchun ishni osonroq qilib, ogʻirlikni koʻtarishda senga yordam beradilar.

²³Agar Xudo shu maslahatlarimni yuragingga solsa, sen tazyiqlarga bardosh bera olasan. Hamma tinchgina oʻz joyiga ketadi.

²⁴Muso qaynatasining gapiga quloq soldi. U nima aytgan boʻlsa, hammasini qildi.

²⁵Isroil xalqi orasidan layoqatli odamlarni tanlab oldi. Oʻsha odamlarni mingboshi, yuzboshi, ellikboshi, oʻnboshi qilib tayinladi.

²⁶Ular hamma masalalarni adolatli hal qilardilar. Qiyin masalalarni Musoga olib kelishar, kichikroq ishlarni esa oʻzlari qarab chiqishardi.

²⁷Shundan keyin Muso qaynatasiga ijozat berdi. Yatro oʻz yurtiga qaytib ketdi.