Read Uzbek Muqaddas Kitob Chiqish 20 Bible Online

Chiqish 20 - Uzbek Muqaddas Kitob bible

Chiqish 20

¹Keyin Xudo quyidagi soʻzlarni aytdi:

²“Men sizlarni Misrdagi qullikdan olib chiqqan Egangiz Xudoman.

³Mendan boshqa xudolarga sajda qilmang.

⁴Oʻzlaringizga hech qanday butni yasamang. Osmonda yo yerda yo yer ostidagi suvda mavjud boʻlgan biror narsaning shaklini yasamang.

⁵Oʻsha xudolar yoki butlarga[88] sajda qilmang, xizmat qilmang. Men, Egangiz Xudo, sizlarning sevgingizni boshqa xudolar bilan baham koʻrmaydigan Xudoman. Mendan nafratlanadiganlarni jazolayman, ularning gunohlari oqibatidan farzandlari, nabiralari va chevaralari ham qochib qutulmaydi.

⁶Lekin Meni sevib, amrlarimga rioya qiladiganlarning ming — ming avlodlariga[89] sodiq sevgimni koʻrsataman.

⁷Men, Egangiz Xudoning ismini suiiste’mol qilmang[90]. Kim Mening ismimni suiiste’mol qilsa, oʻshani jazosiz qoldirmayman.

⁸Shabbat kunini muqaddas deb biling, bu kunga rioya qilib yuring.

⁹Hamma ishlaringizni bajarishingiz uchun olti kun bor.

¹⁰Yettinchi kun esa Men, Egangiz Xudoga atalgan Shabbat kunidir. Oʻsha kuni hech qanday ish qilmanglar. Oʻgʻillaringiz, qizlaringiz, qullaringiz, choʻrilaringiz, hayvonlaringiz, shahringizdagi musofirlar ham hech qanday ish qilishmasin.

¹¹Men, Egangiz, olti kun davomida osmon bilan yerni, dengizni va ulardagi hamma mavjudotni yaratdim. Yettinchi kuni esa dam oldim. Shuning uchun Men, Egangiz, Shabbat kunini muborak qilib, muqaddas deb boshqa kunlardan ajratdim.

¹²Ota — onangizni hurmat qiling. Oʻshanda Men, Egangiz Xudo, sizlarga berayotgan yurtda umringiz uzoq boʻladi.

¹³Qotillik qilmang.

¹⁴Zino qilmang.

¹⁵Oʻgʻrilik qilmang.

¹⁶Qoʻshningizga qarshi yolgʻon guvohlik bermang.

¹⁷Qoʻshningizning uyiga koʻz olaytirmang. Qoʻshningizning xotini, quli yoki choʻrisi, moli yoxud eshagi, unga qarashli biror narsasiga koʻz olaytirmang.”

¹⁸Butun xalq chaqmoqni va togʻning tutunini koʻrdi, momaqaldiroq tovushini va burgʻuning baland ovozini eshitdi. Xalq qoʻrqqanidan titrab, uzoqroqqa borib turdi.

¹⁹Xalq Musoga aytdi: — Bizga oʻzingiz gapiring, biz quloq solaylik. Xudo bizga gapirmasin, tagʻin oʻlib ketmaylik.

²⁰— Qoʻrqmanglar! — dedi Muso xalqqa. — Xudo faqat sizlarni sinash uchun, Undan qoʻrqib, gunoh qilmasligingiz uchun kelgan.

²¹Ammo xalq uzoq masofada turaverdi. Muso Xudo turgan qalin bulutga yaqin bordi.

²²Soʻngra Egamiz Musoga aytdi: — Isroil xalqiga Mening shu gapimni yetkaz: “Men sizlarga samodan gapirganimga oʻzlaringiz guvoh boʻldingiz.

²³Oʻzlaringiz uchun kumush yoki oltindan xudolar yasamanglar. Mendan boshqa hech bir xudoga sajda qilmanglar.

²⁴Men Oʻzimni sizlarga qayerda zohir qilsam, oʻsha joyda Menga atab tuproqdan qurbongoh quringlar. Shunda Men kelib, sizlarga marhamat qilaman. Oʻsha qurbongoh ustida qoʻylaringizdan, echkilaringizdan, mollaringizdan Menga kuydiriladigan va tinchlik qurbonliklari keltiringlar.

²⁵Agarda Menga atab toshdan qurbongoh yasasangiz, uni yoʻnilgan toshdan qilmanglar. Toshga teshani tekkizganlaringizda, tosh harom boʻladi.

²⁶Menga atalgan qurbongohga zinapoya orqali chiqmanglar, aks holda, zinapoyadan chiqayotganingizda, ochiq joylaringiz koʻrinib qoladi[91].”