Read Uzbek Muqaddas Kitob Chiqish 23 Bible Online

Chiqish 23 - Uzbek Muqaddas Kitob bible

Chiqish 23

¹Yolgʻon xabarlar tarqatmanglar. Yolgʻon guvohlik berish orqali fosiq odamlarga qoʻshilmanglar.

²Koʻpchilik notoʻgʻri ish qilganda yoki adolatdan chetga chiqib guvohlik berganda, ularga ergashmanglar.

³Kambagʻalni hukm qilayotganda ham, kambagʻal, deb uning tarafini olmang.

⁴Agar dushmaningizning yoʻqolib qolgan hoʻkizini yoki eshagini topib olsangiz, egasiga olib borib bering.

⁵Dushmaningizning eshagi yuk ogʻirligidan yiqilib qolsa, siz uni koʻrgan boʻlsangiz, dushmaningizni tashlab ketmang. Unga yordam bering.

⁶Hukmda kambagʻalga qarshi adolatdan koʻz yummang.

⁷Tuhmatchilardan uzoq turinglar, aybsiz, toʻgʻri odamni oʻlimga hukm qilmanglar. Men bunday ish qilgan aybdorlarni hukmda oqlamayman.

⁸Pora olmanglar. Pora tufayli koʻzi ochiqlarning koʻzini yogʻ bosadi. Pora har doim toʻgʻri odamlarning ishiga zarar yetkazadi.

⁹Musofirga zulm qilmanglar. Oʻzlaringiz Misrda musofir boʻlgan edingizlar, shu bois musofirning ahvolini bilasizlar.

¹⁰Olti yil dalangizga urugʻ sepib, hosilini yigʻishtirib oling.

¹¹Yettinchi yili[105] esa yeringizni boʻsh qoldiring, dam bering. Xalqingiz orasidagi kambagʻallar yeringizdan oʻsib chiqadigan hosildan biron yegulik topib yesin. Ulardan qolganini esa dasht hayvonlari yesin. Uzumzoringizni va zaytunzoringizni ham shunday qilinglar.

¹²Olti kun ish qilinglar, yettinchi kuni esa ishlamanglar, toki hoʻkizlaringiz, eshaklaringiz ham ishdan tinsin, qullaringiz, musofirlar ham orom olsin.

¹³Men sizlarga bergan amrlarimga rioya qilinglar. Boshqa xudolarga iltijo qilmanglar. Ularning nomlarini hatto tilga ham olmanglar.

¹⁴Menga atab yilda uch marta bayram qilinglar:

¹⁵Abib oyining[106] belgilangan vaqtida xamirturushsiz non bayramini nishonlanglar. Sizlar oʻsha oyda Misrdan chiqqansizlar. Men sizlarga amr etganimday[107], yetti kun xamirturushsiz non yenglar. Har kim Mening huzurimga munosib nazrlar olib kelishi lozim.

¹⁶Bugʻdoy oʻrimini yigʻishtirishni boshlaganingizda, dalangizga ekkan urugʻning ilk hosilidan nazr qilinglar. Shu orqali Hosil bayramini nishonlanglar. Kuzda daladagi hamma hosilingizni yigʻishtirib boʻlganingizda, Chayla bayramini[108] nishonlanglar.

¹⁷Hamma erkaklar har yili shu uchala bayramda Men, Egangiz Rabbiyning huzuriga kelib sajda qilsin.

¹⁸Menga qilingan qurbonlikning qonini xamirturush qoʻshilgan non bilan birga nazr qilmanglar. Qilingan qurbonlikning yogʻini ertalabga qoldirmay kuydiringlar.

¹⁹Yeringizdan olgan ilk hosilning eng yaxshisini Men, Egangiz Xudoning uyiga olib kelinglar. Uloqchani onasining sutida qaynatmanglar[109].

²⁰Sizlarni yoʻlda muhofaza etsin, sizlarni Men tayyorlagan yerga olib borsin deb, oldingizda farishtani yuboryapman.

²¹Mening nomimdan keladigan qudratu hokimiyat unga berilgan. Shuning uchun unga oʻjarlik qilmanglar, aks holda, u oʻjarligingizni kechirmaydi.

²²Agar farishtamning aytganlariga diqqat bilan quloq solsangiz, Mening amrlarimga itoat etsangiz, dushmanlaringizga dushman, raqibingizga raqib boʻlaman.

²³Farishtam oldingizda borib, sizlarni Amor, Xet, Pariz, Kan’on, Xiv va Yobus xalqlarining yerlariga boshlab boradi. Men oʻsha xalqlarni yoʻq qilaman.

²⁴Ularning xudolariga sajda qilmanglar, xizmat qilmanglar. Bu xalqlarning odatlariga taqlid qilmanglar. Ularning xudolarini yoʻq qilinglar, butsimon toshlarini sindirib tashlanglar.

²⁵Faqat Men, Egangiz Xudogagina xizmat qilinglar. Shunda Men osh — suvingizni barakali qilaman, orangizdan xastaliklarni yoʻq qilaman.

²⁶Yurtingizda homilasi tushib qolgan yoki befarzand ayol boʻlmaydi. Men umringizni uzoq qilaman.

²⁷Sizlarga qarshi boʻlgan xalqlarni Mendan qoʻrqadigan qilaman. Sizlarga qarshi jang qiladigan xalqlarni sarosimaga solaman. Dushmanlaringizning hammasini oldingizdan qochiraman.

²⁸Men Xiv, Kan’on va Xet xalqlarini vahimaga solaman — da, oldingizdan quvib yuboraman[110].

²⁹Lekin Men bir yil ichidayoq ularni oldingizdan haydab yubormayman. Agar bir yilning ichida ularni haydasam, oʻsha yurt boʻm — boʻsh boʻlib qoladi, dasht hayvonlari koʻpayib, sizga xavf soladi.

³⁰Shuning uchun sizlar koʻpayib, oʻsha yurtni butunlay egallab olmaguningizcha, u yerning xalqlarini oz — ozdan oldingizdan haydayman.

³¹Chegaralaringizni Qizil dengizdan[111] Oʻrta yer dengizigacha[112], sahrodan Furot daryosigacha[113] kengaytiraman. Shu yurtning xalqlarini qoʻllaringizga beraman. Sizlar ularni oldingizdan quvasizlar.

³²Ularning oʻzlari bilan ham, xudolari bilan ham ahd qilmanglar.

³³U xalqlar sizning yurtingizda yashamasin. Boʻlmasa ular sizni oʻzlarining xudolariga sajda qildirib, Menga qarshi gunohga boshlaydi. Bu yoʻl bilan sizlarni tuzogʻiga ilintirib oladi.”