Read Uzbek Muqaddas Kitob Chiqish 24 Bible Online

Chiqish 24 - Uzbek Muqaddas Kitob bible

Chiqish 24

¹Shundan keyin Egamiz Musoga dedi: — Sen Horunni va uning ikki oʻgʻli Nadov bilan Abihuni, Isroilning yetmishta oqsoqolini Mening huzurimga olib kel[114]. Keyin uzoqdan sajda qilinglar.

²Menga faqat sen yaqin kelgin, boshqa hech kim yaqin kelmasin. Xalq esa sizlar bilan birga chiqmasin.

³Muso kelib, Egamizning hamma amrlarini, hamma qonun — qoidalarini xalqqa aytib berdi. Xalq bir ovozdan: “Egamizning hamma aytganlarini bajaramiz”, deya javob berdi.

⁴Muso Egamizning hamma amrlarini va qonun — qoidalarini yozdi. Soʻng ertasi kuni tongda turib, togʻ etagiga qurbongoh qurdi. Oʻn ikki Isroil qabilasining miqdoriga koʻra, oʻn ikkita tosh oʻrnatdi.

⁵Muso Isroil xalqi orasidan yosh yigitlarni qurbonliklar keltirgani yubordi. Ular Egamizga kuydiriladigan qurbonliklar qilishdi. Buqalarni tinchlik qurbonliklari qilishdi.

⁶Muso qonning yarmini togʻoraga quydi, qolgan yarmini esa qurbongohga sepdi.

⁷Soʻngra u Ahd kitobini[115] olib, xalqqa ovoz chiqarib oʻqib berdi. Shunda xalq: “Egamizning hamma aytganlarini bajaramiz, Unga itoat qilamiz”, dedi.

⁸Muso togʻoradagi qonni oldi — da, xalqqa sepib: “Ana shu soʻzlarga muvofiq, shu qon Egamizning sizlar bilan qilgan ahdini tasdiqlaydi”, — dedi.

⁹Shundan keyin Muso, Horun, Nadov, Abihu va Isroilning yetmishta oqsoqoli toqqa chiqishib,

¹⁰u yerda Isroil xalqining Xudosini koʻrdilar: Uning oyoqlari ostida zangori yoqutdan qilingan polga oʻxshash bir narsa bor edi. U moviy osmon kabi musaffo edi.

¹¹Isroil xalqining bu yoʻlboshchilari Xudoni koʻrgan boʻlsalar — da, Xudo ularni oʻldirmadi. Ular oʻsha yerda qurbonlik goʻshtini tanovul qildilar.

¹²Keyin Egamiz Musoga aytdi: — Toqqa, Mening oldimga chiqib, shu yerda tur[116]. Men senga amr va qonunlar yozilgan ikkita tosh lavhani beraman. Bu amr va qonunlarni xalq oʻrgansin deb yozdim.

¹³Muso bilan uning shogirdi Yoshua otlanishdi. Muso Xudoning muqaddas togʻiga ketayotib,

¹⁴oqsoqollarga aytdi: — Yonlaringizga qaytib kelgunimizcha shu yerda — qarorgohda kutib turinglar. Horun bilan Xur sizlarning yoningizda qoladi. Kimning ishi boʻlsa, ularga murojaat etsin.

¹⁵Muso toqqa chiqqanda, togʻni bulut qopladi.

¹⁶Egamiz ulugʻvorligini zohir qilib, Sinay togʻiga tushdi. Olti kun davomida bulut togʻni qoplab turdi. Yettinchi kuni Egamiz bulut orasidan Musoni chaqirdi.

¹⁷Egamizning ulugʻvorligi togʻ choʻqqisida lovullayotgan alanga kabi, Isroil xalqi koʻzi oʻngida zohir boʻlib turardi.

¹⁸Muso bulut orasida yurib, togʻ choʻqqisiga chiqdi. Muso togʻda qirq kechayu qirq kunduz qoldi.