Read Uzbek Muqaddas Kitob Chiqish 26 Bible Online

Chiqish 26 - Uzbek Muqaddas Kitob bible

Chiqish 26

¹Endi Muqaddas chodirning[133] oʻziga kelsak, uning ichki qavatini qildir. U mayin zigʻir matosidan tikilgan oʻnta choyshabdan iborat boʻlsin. Mohir ustalar bu choyshablarni bezatib, ularga koʻk, safsar va qirmizi iplar bilan karublar tasvirini solishsin.

²Har bir choyshabning boʻyi yigirma sakkiz tirsak, eni toʻrt tirsak[134] boʻlsin. Hamma choyshablarning oʻlchovi bir xil boʻlsin.

³Choyshablardan beshtasining boʻyini bir — biri bilan birlashtirib tiktir, qolgan beshtasini ham shunday qildir.

⁴Hosil boʻlgan ikki uzun boʻlak choyshabning boʻyiga koʻk matodan elliktadan halqa tiktir. Har ikki tomonga tikilgan halqalar bir — biriga roʻparama — roʻpara boʻlsin.

⁶Keyin oltindan ellikta ilgak yasattir, ikkala choyshabning halqalarini ilgaklar bilan bir — biriga ulat. Shunda Chodirning ichki qavati bir butun boʻladi[135].

⁷Muqaddas chodirning qoplamasi uchun echki juni matosidan oʻn bitta choyshab tiktir.

⁸Har bir choyshabning boʻyi oʻttiz tirsak, eni toʻrt tirsak[136] boʻlsin. Oʻn bitta choyshabning hammasi bir oʻlchovda boʻlsin.

⁹Choyshablardan beshtasining boʻyini bir — biri bilan birlashtirib tiktir, qolgan oltitasini ham shunday qildir. Ulangan ikki boʻlak choyshabning boʻyiga elliktadan halqa tiktir. Keyin bronzadan ellikta ilgak yasat, ikkala choyshabning halqalarini ilgaklar bilan bir — biriga ulat. Shunda Chodirning qoplamasi bir butun boʻladi[137]. Chodir ustiga qoplamani tashlaganlaringizda, Chodirga kiraverishning yuqorisida oltinchisini uzunasi boʻylab ikki bukla.

¹²Qoplamaning boʻyidan qolgan ikki tirsagi[138] Chodirning orqasida yerga yoyilib turadi[139].

¹³Qoplamaning eni oxiridagi qoʻshimcha bir tirsak Chodirning ikki yonboshida yerga osilib turadi va Chodirni butunlay qoplaydi[140].

¹⁴Bu qoplama ustiga qoʻyish uchun qizilga boʻyalgan qoʻchqor terisidan qoplama, soʻng yumshoq teridan[141] tashqi qoplama qildir.

¹⁵Akas yogʻochidan[142] Muqaddas chodirni tutib turadigan romlar[143] yasat.

¹⁶Har bir romning boʻyi oʻn tirsak, eni bir yarim tirsak[144] boʻlsin.

¹⁷Har bir romning ostida bir — biriga parallel boʻlgan ikkita tirgak yasat.

¹⁸Chodirning janub tomonidagi devor uchun yigirmata rom yasat.

¹⁹Bu romlar ostiga qoʻyish uchun kumushdan qirqta taglik — har bir rom uchun ikkitadan taglik qildir, toki har bir tirgak ostida bitta taglik boʻlsin.

²⁰Chodirning shimol tomonidagi devori uchun yigirmata rom yasat.

²¹Har bir rom ostiga qoʻyish uchun ikkitadan, jami qirqta kumush taglik yasat.

²²Chodirning orqadagi — gʻarb tomonidagi devor uchun oltita rom,

²³Chodirning orqasida burchaklar hosil qilish uchun har ikki tomoniga yana bittadan rom yasat.

²⁴Bu ikkala romni pastdan va yuqoridan tutashgan devordagi oxirgi romga birlashtir. Bitta burchak hosil qilish uchun bitta halqa bilan yaxlit qilib birlashtir. Bu har ikkala burchak shu yoʻl bilan hosil qilinadi.

²⁵Shunday qilib, har bir rom ostiga qoʻyish uchun ikkitadan — oʻn oltita kumush taglikka tayangan sakkizta romdan orqadagi devor yasaladi.

²⁶Muqaddas chodirning janub tomonidagi romlarni ushlab turish uchun akas yogʻochidan beshta tamba,

²⁷shimol tomonidagi romlarni ushlab turish uchun ham beshta tamba, orqa tomoni — gʻarb tomonidagi romlarni ushlab turish uchun ham beshta tamba yasat.

²⁸Romlarning yarmigacha oʻrnashtirilgan oʻrtadagi tambalar Chodirning boshidan oxirigacha choʻziladi.

²⁹Romlarni oltin bilan qoplat, tambalarni ushlab turadigan oltin halqalarni romlarga birlashtir[145], tambalarni ham oltin bilan qoplat.

³⁰Chodirni Men senga shu yerda — togʻda koʻrsatgan namuna boʻyicha oʻrnashtir.

³¹Mayin zigʻir matosidan ichki pardani tiktir. Mohir ustalar bu pardani bezatib, unga koʻk, safsar va qirmizi iplar bilan karublar tasvirini solishsin.

³²Akas yogʻochidan toʻrtta ustun yasat. Ustunlarga oltin qoplatib, ularga oltin ilgaklarni mahkamlat. Kumush taglikka ustunlarni bittadan oʻrnashtir va ichki pardani ustundagi ilgaklarga osdir.

³³Ichki parda Chodir shipidagi ilgaklar[146] ostida osilib tursin. Ahd sandigʻi[147] ichki pardaning orqasiga olib kirilsin. Ichki parda Muqaddas xonani Eng muqaddas xonadan ajratib turadi.

³⁴Sandiqning qopqogʻi Eng muqaddas xonaga olib kirilsin, uni Ahd sandigʻi ustiga qoʻydir.

³⁵Xontaxtani Chodirning shimol tomoniga — ichki pardaning tashqarisiga qoʻydir. Chiroqpoyani esa Chodirning janub tomoniga — ichki pardaning tashqarisidagi xontaxtaning roʻparasiga oʻrnat.

³⁶Chodirga kirish joyi uchun mayin zigʻir matosidan pardani tiktir. Parda ustiga koʻk, safsar va qirmizi iplardan nafis naqsh soldir.

³⁷Akas yogʻochidan beshta ustun yasat, toki pardani ushlab tursin. Ustunlarga oltin qoplatib, ularga oltin ilgaklarni mahkamlat. Eritilgan bronzadan ustunlar ostiga qoʻyish uchun beshta taglik yasat.