Read Uzbek Muqaddas Kitob Chiqish 29 Bible Online

Chiqish 29 - Uzbek Muqaddas Kitob bible

Chiqish 29

¹Horun bilan uning oʻgʻillari ruhoniy boʻlib Menga xizmat qiladilar. Shuning uchun ularni Menga bagʻishlab, quyidagicha marosim oʻtkaz. Nuqsonsiz bitta buqani va ikkita qoʻchqorni ol.

²Sifatli bugʻdoy unidan qilingan xamirturushsiz nonlarni, zaytun moyi qoʻshilgan xamirturushsiz nonlarni va zaytun moyi surtilgan xamirturushsiz chalpaklarni ham pishirtir.

³Shundan keyin nonlarni savatga solib, buqa va ikkala qoʻchqor bilan birga Menga nazr qilib olib kel.

⁴Horun bilan oʻgʻillarini Uchrashuv chodiri kiraverishiga olib kel. Hammalarini yuvintir.

⁵Soʻngra ruhoniylik liboslarini ol. Horunga koʻylakni va ridoni, efodni, koʻkrakpechni kiygiz[170]. Beliga efodning nafis naqshinkor kamarini bogʻla.

⁶Keyin Horunning boshiga sallani kiygizib, sallaning ustiga oltin lavhani — uni boshqalardan ajratib turadigan muqaddaslik ramzini oʻrnashtir.

⁷Soʻngra muqaddas qiladigan moyni[171] olib, uning boshiga surt va uni Mening xizmatimga bagʻishla.

⁸Horunning oʻgʻillarini olib kelib, ularga koʻylakni kiygizib,

⁹boshlariga peshanabogʻ bogʻla. Horun bilan oʻgʻillariga yana belbogʻ bogʻla. Doimiy qonun — qoida boʻyicha ruhoniylik ularniki boʻladi. Soʻng Horun va uning oʻgʻillarini ruhoniylik xizmatiga tayinla.

¹⁰Buqani Uchrashuv chodiri oldiga olib kel. Horun bilan oʻgʻillari esa buqaning boshiga qoʻllarini qoʻyishgach,

¹¹Uchrashuv chodiriga kiraverishda Men, Egangizning huzurida buqani soʻy.

¹²Buqaning qonidan olib, barmogʻing bilan qurbongohning shoxlariga[172] qonni surt. Ortgan qonning hammasini esa qurbongohning yoniga toʻk.

¹³Ichak — chovoqlarini qoplab turgan hamma yogʻlarini, jigarning a’lo qismini[173], ikkala buyragini va buyrak atrofidagi yogʻlarini olib, qurbongohda kuydir.

¹⁴Buqaning goʻshtini, terisini, chiqindilarini qarorgohdan tashqariga olib chiqib kuydir. Bu gunoh qurbonligidir[174].

¹⁵Soʻngra qoʻchqorning bittasini olib kel. Horun bilan oʻgʻillari qoʻchqorning boshiga qoʻllarini qoʻyishgach,

¹⁶qoʻchqorni soʻyib, qonidan olgin — da, qurbongohning toʻrtala yon tomoniga sep.

¹⁷Qoʻchqorning tanasini boʻlaklab, ichak — chovoqlarini, oyoqlarini yuv. Qoʻchqorning bu a’zolarini boʻlaklangan tanasi va kallasi ustiga qoʻyib,

¹⁸qoʻchqorni qurbongohda kuydir. Olovda kuydirilgan bu qurbonlikdan Men, Egangizga yoqimli hid keladi.

¹⁹Keyin ikkinchi qoʻchqorni olib kel. Horun bilan oʻgʻillari qoʻllarini qoʻchqorning boshiga qoʻygach,

²⁰qoʻchqorni soʻyib, qonini ol. Soʻngra Horun bilan oʻgʻillarining oʻng qulogʻi solinchagiga[175], oʻng qoʻlining bosh barmogʻiga, oʻng oyogʻining bosh barmogʻiga qon surt. Soʻngra qurbongohning toʻrtala yon tomoniga qon sep.

²¹Keyin qurbongohdagi qondan, muqaddas qiladigan moydan olib, Horun bilan oʻgʻillariga, hammalarining ruhoniylik liboslariga sachrat. Shunday qilib, Horun bilan oʻgʻillari, hammalarining liboslari muqaddas boʻladi.

²²Bu qoʻchqor Horun va uning oʻgʻillarini ruhoniylikka tayinlash marosimida foydalaniladi. Shuning uchun qoʻchqorning oʻng sonini, ichak — chovoqlarini qoplab turgan hamma yogʻlarini, jigarning a’lo qismini, ikkala buyragini va buyrak atrofidagi yogʻlarni ol.

²³Yana Men, Egangizning huzuridagi savatdan sifatli bugʻdoy unidan qilingan xamirturushsiz nondan bittasini, zaytun moyi qoʻshilgan xamirturushsiz nondan bittasini va zaytun moyi surtilgan xamirturushsiz chalpakdan bittasini ol.

²⁴Bularning hammasini Horun va oʻgʻillarining qoʻllariga qoʻy. Bularni ular Men, Egangizga bagʻishlaganlarini koʻrsatish uchun yuqoriga koʻtarishsin.

²⁵Soʻngra bu hamma nazrlarni ularning qoʻllaridan olib, qurbongohda birinchi kuydiriladigan qoʻchqor bilan kuydir. Olovda kuydirilgan bu nazrlardan ham Men, Egangizga yoqimli hid keladi.

²⁶Soʻngra ruhoniylikka tayinlash marosimida foydalaniladigan oʻsha ikkinchi qoʻchqorning toʻshini olib, Men, Egangizga bagʻishlaganini koʻrsatish uchun yuqoriga koʻtar. Bunisi sening ulushing boʻladi.

²⁷Horun va uning oʻgʻillari Mening huzurimda ruhoniylikka tayinlanish marosimida qoʻchqorning yuqoriga koʻtariladigan qismlari — toʻshi va soni muqaddas deb qaraladi.

²⁸Kelgusida Isroil xalqi Men, Egangizga tinchlik qurbonliklari qilganlarida, bu qismlar Horun va uning oʻgʻillariga doimiy ulush qilib berilsin.

²⁹Horunning muqaddas ruhoniylik liboslari oʻzidan keyin uning nasllariniki boʻlsin. Horunning nasllariga shu liboslarda moy surtilib, shu liboslarda ular oliy ruhoniylikka tayinlanadilar.

³⁰Horunning oʻrniga oliy ruhoniy boʻlib Muqaddas xonada xizmat qilish uchun Uchrashuv chodiriga kiradigan oʻgʻli bu liboslarni yetti kun kiyib yursin.

³¹Endi ruhoniylikka tayinlanish marosimida qurbonlik qilingan qoʻchqorning goʻshtini olib, muqaddas joyda qaynat.

³²Horun bilan oʻgʻillari Uchrashuv chodiriga kiraverishda qoʻchqor goʻshtidan va savatdagi nonlardan[176] tanovul qilishsin.

³³Faqat ular bu goʻshtdan va nondan tanovul qila oladilar. Horun va uning oʻgʻillarini ruhoniylikka tayinlash va bagʻishlash marosimida ularni gunohdan poklash uchun oʻsha non va goʻshtdan foydalaniladi. Bu goʻsht va non muqaddas boʻlgani uchun ruhoniy boʻlmagan odamlar bulardan tanovul qila olmaydi.

³⁴Agar ruhoniylikka tayinlanish marosimida qurbonlik qilingan hayvon goʻshtidan va nonlar nazridan ertalabgacha qolsa, qolganlarini olovda kuydir. Bular muqaddas boʻlgani uchun tanovul qilish mumkin emas.

³⁵Men senga amr etganimday, yetti kun davomida har kuni Horun va uning oʻgʻillari uchun ruhoniylikka tayinlanish marosimini takrorla.

³⁶Ularni gunohlaridan poklash uchun har kuni buqani qurbonlik qil. Qurbongohni poklash uchun marosim oʻtkaz. Qurbongohga moydan surtib, muqaddas qil.

³⁷Yetti kun davomida har kuni shunday qil. Ana shunda qurbongoh gʻoyat muqaddas boʻladi. Birontasi yoki biron narsa qurbongohga tegib ketsa ham, u muqaddas boʻladi.

³⁸Har kuni ikkita bir yoshli qoʻzini qurbongohda qurbonlik qilib kuydir.

³⁹Bitta qoʻzini ertalab, ikkinchisini kechqurun qurbonlik qil.

⁴⁰Har bir qoʻziga qoʻshib, ikki kosa[177] toza zaytun moyi aralashtirilgan toʻrt kosa[178] sifatli unni don nazri qilib keltir. Shu bilan birga, ikki kosa sharob nazrini ham keltir. Olovda kuydiriladigan bu qurbonliklardan Men, Egangizga yoqimli hid keladi.

⁴²Kuydiriladigan bu ikki qurbonlik Men, Egangizning huzurida Uchrashuv chodiriga kiraverishda avlodlar osha qilinsin. Oʻsha yerda Men sen bilan uchrashib, gaplashaman.

⁴³Uchrashuv chodirida Men zohir boʻlib, Isroil xalqi bilan uchrashaman, ulugʻvorligimdan bu joy muqaddas boʻladi.

⁴⁴Men Uchrashuv chodirini va qurbongohni muqaddas qilaman. Horun bilan oʻgʻillari ruhoniy boʻlib Menga xizmat qilishlari uchun ularni ham muqaddas qilaman.

⁴⁵Men Isroil xalqi orasida istiqomat qilaman, ularning Xudosi boʻlaman.

⁴⁶Shunda ular Egasi Xudo Men ekanligimni bilib oladilar. Axir, Men Isroil xalqi orasida istiqomat qilay deb, ularni Misr yurtidan olib chiqqanman. Men ularning Egasi Xudoman.