Read Uzbek Muqaddas Kitob Chiqish 30 Bible Online

Chiqish 30 - Uzbek Muqaddas Kitob bible

Chiqish 30

¹Tutatqi tutatish uchun akas yogʻochidan[179] qurbongoh[180] yasat.

²Qurbongoh toʻrtburchak, uzunligi bir tirsak, eni ham bir tirsak, boʻyi esa ikki tirsak[181] boʻlsin. Qurbongohning toʻrtala burchagiga oʻzidan yoʻnib chiqarilgan bittadan shox yasat.

³Qurbongohning ustini, yon — atrofini, shoxlarini toza oltin bilan qoplat, aylanasi boʻylab oltindan gulchambar yasat.

⁴Qurbongohning ikki tomonidagi gulchambarning ostiga ikkita oltin halqa oʻrnashtir. Akas yogʻochidan ikkita xoda yasatib, ularni oltin bilan qoplat. Bu xodalarni halqalardan oʻtkazib, qurbongohni koʻtarib yurishda foydalan.

⁶Tutatqi qurbongohini Ahd sandigʻining[182] qopqogʻi oldida osilib turadigan ichki pardaning tashqarisiga qoʻydir. Bu joy — sen bilan Men uchrashadigan joyning tashqarisida.

⁷Horun har kuni ertalab moychiroqlardan xabar olganda bu qurbongohda xushboʻy tutatqi tutatsin.

⁸U kechqurun moychiroqlardan xabar olganda ham tutatqi tutatsin. Bu tutatqi nazrlari sizlarning avlodlaringiz osha Men, Egangizning huzurida har kuni tutatilishi lozim.

⁹Bu qurbongohda faqat muqaddas tutatqini[183] tutatinglar. Tutatqi qurbongohida kuydiriladigan qurbonlik keltirmanglar, don nazri yoki sharob nazri ham qilmanglar.

¹⁰Horun bir yilda bir marta[184] qurbongohni poklash marosimini oʻtkazsin. Buning uchun gunoh qurbonligining qonidan qurbongohning toʻrtala shoxiga surtib, qurbongohni poklasin. Bu marosim har yili avlodlar osha qilinishi lozim. Bu qurbongoh Men, Egangizga bagʻishlangan gʻoyat muqaddas qurbongohdir.”

¹¹Soʻngra Egamiz Musoga yana gapirdi:

¹²“Isroilda erkaklarni roʻyxatga olganingda, ularning har biri Men, Egangizga himoya qiladigan toʻlov[185] toʻlasin. Shunda sen ularni sanaganingda, ularga kulfat keltirmayman.

¹³Roʻyxatga kiritiladigan yigirma va undan yuqori yoshdagi har bir odam 1,25 misqol kumushdan[186] Men, Egangizga nazr qilishi lozim.

¹⁵Ular oʻzlarini Mening hukmimdan himoya qiladigan nazrni[187] berganlarida, boy odam oʻshandan koʻp bermasin, kambagʻal ham oʻshandan oz bermasin.

¹⁶Bagʻishlangan bu kumushni Uchrashuv chodirini yasash uchun sarf qil. Men, Egangizning huzurida bu kumush Isroil xalqiga hukmimdan himoya qiladigan nazr berilganini eslatib turadi.”

¹⁷Egamiz Musoga yana gapirdi:

¹⁸“Yuvinish uchun bronzadan qoʻlyuvgich yasat. Qoʻlyuvgichning tagligi ham bronzadan boʻlsin. Qoʻlyuvgichni Uchrashuv chodiri bilan qurbongoh oʻrtasiga oʻrnatib, unga suv quy.

¹⁹Horun bilan uning oʻgʻillari Uchrashuv chodiriga kirayotganlarida, qoʻlyuvgichdagi suv bilan qoʻllarini va oyoqlarini yuvishsin. Shunda ular nobud boʻlmaydi. Qurbongohda kuydirgani nazrlar olib kelib Men, Egangizga xizmat qilganlarida ham,

²¹albatta qoʻl — oyoqlarini yuvishsin. Shunda ular nobud boʻlmaydi. Bu Horun va uning nasllari uchun avlodlari osha doimiy qonun boʻlsin.”

²²Egamiz Musoga yana aytdi:

²³“Quyidagi eng yaxshi xushboʻy ziravorlardan ol: 1250 misqol[188] suyuq mirra[189], 625 misqol[190] dolchin, 625 misqol qamish

²⁴va 1250 misqol kassiya[191]. Sakkiz kosa[192] zaytun moyi olib,

²⁵usta odam xushboʻy moy tayyorlash uchun ziravorlarni moy bilan aralashtirsin. Bu muqaddas qiladigan moydir.

²⁶Bu moyni Uchrashuv chodiriga, Ahd sandigʻiga,

²⁷xontaxtaga va xontaxtaning hamma buyumlariga, chiroqpoyaga va uning hamma buyumlariga, tutatqi qurbongohiga,

²⁸qurbonlik kuydiriladigan qurbongohga va uning hamma buyumlariga, qoʻlyuvgichga va uning tagligiga surt.

²⁹Shu tariqa bu narsalarni Menga bagʻishla. Shunda ular gʻoyat muqaddas boʻladi. Birontasi yoki biron narsa ularga tekkanda, muqaddas boʻladi.

³⁰Soʻng Horun bilan oʻgʻillariga bu moydan surtib, ularni bagʻishla, toki ular ruhoniy boʻlib Menga xizmat qilishsin.

³¹Isroil xalqiga esa Mening shu gapimni yetkaz: — Muqaddas qiladigan moy sizlarning butun avlodlaringiz osha Menga bagʻishlansin.

³²Bu moy ruhoniy boʻlmagan odamning tanasiga surtilmasligi kerak. Shu tarkibdagi moy aralashmasini sizlar tayyorlamanglar. Chunki bu moy muqaddasdir, sizlar bunga muqaddas deb qarashingiz lozim.

³³Kimki bunga oʻxshash hidli moyni tayyorlasa yoki bu moydan ruhoniy boʻlmagan odam ustiga surtsa, u Isroil xalqi orasidan yoʻq qilinadi.”

³⁴Egamiz yana Musoga gapirdi: “Quyidagi xushboʻy ziravorlarni olib, ularni aralashtir: yelimdan qilingan ziravor, moluska qobigʻidan qilingan ziravor, xilvon. Soʻngra usta odam toza xushboʻy tutatqidan, xushboʻy aralashmadan bir oʻlchovda olsin. Ularni tuz bilan aralashtirib, toza, muqaddas boʻladigan tutatqi qilsin.

³⁶Bu tutatqidan bir qismini olib, mayda qilib tuygin va Men sen bilan uchrashadigan Uchrashuv chodiridagi Ahd sandigʻi[193] oldiga qoʻy. Bu tutatqini sizlar gʻoyat muqaddas deb bilishingiz lozim.

³⁷Oʻsha tarkibdagi tutatqi aralashmasini oʻzlaringiz uchun qilmanglar. Buni Men, Egangizga bagʻishlangan muqaddas tutatqi deb biling.

³⁸Kimki tutatgani oʻzicha shunga oʻxshagan tutatqi qilsa, u Isroil xalqi orasidan yoʻq qilinadi.”