Read Uzbek Muqaddas Kitob Chiqish 33 Bible Online

Chiqish 33 - Uzbek Muqaddas Kitob bible

Chiqish 33

¹Keyin Egamiz Musoga aytdi: — Qani, sen ham, Misrdan oʻzing olib chiqqan xalqing ham bu joydan ketinglar. Ota — bobolaringiz Ibrohim, Is’hoq va Yoqubga Men: “Sizlarning naslingizga beraman”, deb qasam ichgan yurtga boringlar.

²Sendan oldinda farishtani yuborib, Kan’on, Amor, Xet, Pariz, Xiv va Yobus xalqlarini haydayman.

³Sut va asal oqib yotgan oʻsha yurtga[204] ketinglar. Ammo Men sizlar bilan bormayman, chunki sizlar oʻjar xalqsiz. Sizlar bilan borsam, sizlarni yoʻlda halok qilib tashlashim mumkin.

⁴Isroil xalqiga Mening shu gapimni yetkaz: “Sizlar oʻjar xalqsiz. Agar Men bir lahza sizlar bilan borsam, sizlarni qirib tashlashim mumkin. Endi zeb — ziynatlaringizni yechib qoʻyinglar. Men sizlarni nima qilishim toʻgʻrisida bir qarorga kelaman.” Xalq bu vahimali gapni eshitgach, dod solib yigʻladi. Hech kim zeb — ziynatlarini taqmadi.

⁶Shunday qilib, Isroil xalqi Sinay togʻida[205] zeb — ziynatlarini yechib qoʻydi. Oʻshandan keyin ular zeb — ziynatlarini boshqa taqmadilar.

⁷Muso bir chodirni qarorgohning tashqarisiga — qarorgohdan uzoqroqqa olib borib oʻrnatdi. Bu chodirga u Uchrashuv chodiri[206] deb nom berdi. Egamizdan maslahat soʻramoqchi boʻlgan har bir odam oʻsha yerga kelardi.

⁸Muso Uchrashuv chodiriga borganda, butun xalq turib, oʻz chodirining kiraverishida chiqib turardi. Muso chodirga kirib ketguncha, hamma tik turganicha uning orqasidan qarab turardi.

⁹Muso chodirga kirib, Egamiz Muso bilan gaplashganda, ustun shaklidagi bulut pastga tushib, chodirning kiraverishida turardi.

¹⁰Butun xalq buni koʻrganda, oʻz chodirlari kiraverishida muk tushib ta’zim qilardi.

¹¹Birortasi doʻsti bilan gaplashganday, Egamiz ham Muso bilan yuzma — yuz[207] gaplashardi. Keyin Muso qarorgohga qaytib kelar, uning yosh yordamchisi Nun oʻgʻli Yoshua esa chodirni tark etmasdi.

¹²Shundan keyin Muso Egamizga aytdi: — Sen: “Bu xalqni boshlab olib ket”, deb menga amr berding — u, lekin biz bilan kimni yuborishingni aytmading. Yana: “Men seni tanladim, sen haqiqatan Mendan marhamat topgansan”, degan eding.

¹³Agar men Sendan marhamat topgan boʻlsam, iltijo qilaman: menga yoʻllaringni koʻrsatgin. Sendan marhamat topib yurishim uchun Seni bilayin. Bu xalq Oʻzingning xalqing ekanini yodingda tutgin.

¹⁴Egamiz Musoga dedi: — Men sizlar bilan boraman. Sizlarga tinchlik ato qilaman.

¹⁵Muso esa Egamizga aytdi: — Agar Sen biz bilan bormaydigan boʻlsang, bizni bu yerdan olib chiqmagin.

¹⁶Boʻlmasa, men va xalqingdan mamnun ekanliging nimadan bilinadi? Biz bilan birga borganingdan emasmi?! Yer yuzidagi hamma xalqlardan bizning farqimiz ham shu emasmi?!

¹⁷Shunda Egamiz Musoga aytdi: — Sen nimani soʻragan boʻlsang, Men shuni qilaman. Chunki sen Mendan marhamat topgansan. Men seni tanladim.

¹⁸— Iltijo qilaman: menga ulugʻvorligingni zohir qilgin, — dedi Muso.

¹⁹— Men Oʻzimni senga ma’lum qilaman[208]. Men sening oldingdan oʻtib, butun ezguligimni senga zohir qilaman, — dedi Egamiz Musoga. — Marhamat qiladiganimga marhamat qilaman, shafqat qiladiganimga shafqat qilaman.

²⁰Lekin Mening yuzimni[209] koʻra olmaysan. Meni koʻrgan odam tirik qolmaydi.

²¹Menga yaqin joyda qoya bor. Oʻsha qoyaning ustida tur!

²²Men oʻtayotib ulugʻvorligimni zohir qilganimda, seni qoyaning yoriq joyiga qoʻyaman. Oʻtib ketgunimcha seni qoʻlim bilan toʻsib turaman.

²³Keyin qoʻlimni olaman. Sen Meni orqamdan koʻrasan. Yuzimni esa koʻrmaysan.