Read Uzbek Muqaddas Kitob Chiqish 36 Bible Online

Chiqish 36 - Uzbek Muqaddas Kitob bible

Chiqish 36

¹Bazalil, Oxoliyov va boshqa hamma iqtidorli ustalar Egamiz amr etgan hamma ishlarni bajarsinlar. Muqaddas chodir yasashda talab qilingan har qanday xizmatni bajarishlari uchun Egamiz ularga mahorat va qobiliyat ato qilgan.”

²Muso Bazalilni, Oxoliyovni va Egamiz qobiliyat ato qilgan hamma iqtidorli ustalarni, yuragi zavqqa toʻlgan odamlarni chaqirdi.

³Muqaddas chodirni yasash uchun Isroil xalqi olib kelgan hamma nazrlarni Muso ustalarga berdi. Bulardan tashqari, xalq har kuni ertalab Musoga koʻngildan chiqarib nazrlar olib kelishardi.

⁴Ishlarni bajarayotgan hamma ustalar yumushlarini tashlab,

⁵Musoning oldiga kelib aytishdi: — Egamiz bizga amr etgan ishlar uchun xalq keragidan ortiq olib kelyapti.

⁶Shunda Muso: “Bironta erkak, ayol endi Muqaddas chodir uchun nazr olib kelmasin”, deb buyruq berdi. Uning buyrugʻi qarorgoh boʻylab e’lon qilindi. Shundan keyin xalq nazr olib kelishni toʻxtatdi.

⁷Xalqning olib kelgan nazrlari ishning hammasini bajarishga yetib, hatto ortib ham qolar edi.

⁸Ishlayotganlar orasidagi eng mohir odamlar Muqaddas chodirni[232] yasadilar: Mohir tikuvchilar Bazalilning koʻrsatmasi bilan Chodirning ichki qavatini qildilar. U mayin zigʻir matosidan tikilgan oʻnta choyshabdan iborat boʻldi. Koʻk, safsar va qirmizi iplar bilan karublar tasvirini mahorat bilan solib, bu choyshablarni bezatdilar.

⁹Har bir choyshabning boʻyi yigirma sakkiz tirsak, eni toʻrt tirsak[233] edi. Hamma choyshablarning oʻlchovi bir xil edi.

¹⁰Ular choyshablardan beshtasining boʻyini bir — biri bilan birlashtirib tikdilar, qolgan beshtasini ham shunday qildilar.

¹¹Hosil boʻlgan ikki uzun boʻlak choyshabning boʻyiga koʻk matodan elliktadan halqa tikdilar. Har ikki tomonga tikilgan halqalar bir — biriga roʻparama — roʻpara edi.

¹³Keyin oltindan ellikta ilgak yasadilar, ikkala choyshabning halqalarini ilgaklar bilan bir — biriga uladilar. Shunda Chodirning ichki qavati bir butun boʻldi[234].

¹⁴Muqaddas chodirning qoplamasi uchun echki juni matosidan oʻn bitta choyshab tikdilar.

¹⁵Har bitta choyshabning boʻyi oʻttiz tirsak, eni toʻrt tirsak[235] edi. Oʻn bitta choyshabning hammasi bir oʻlchovda edi.

¹⁶Choyshablardan beshtasining boʻyini bir — biri bilan birlashtirib tikdilar, qolgan oltitasini ham shunday qildilar.

¹⁷Ulangan ikki boʻlak choyshabning bir boʻyiga elliktadan halqa tikdilar.

¹⁸Keyin, Chodirning qoplamasi bir butun boʻlsin[236] deb, ikkala choyshabni birlashtirish uchun bronzadan ellikta ilgak yasadilar.

¹⁹Bu qoplama ustiga qoʻyish uchun qizilga boʻyalgan qoʻchqor terisidan qoplama, soʻng yumshoq teridan[237] tashqi qoplama qildilar.

²⁰Akas yogʻochidan[238] Muqaddas chodirni tutib turadigan romlar[239] yasadilar.

²¹Har bir romning boʻyi oʻn tirsak, eni bir yarim tirsak[240] edi.

²²Har bir romning ostida bir — biriga parallel boʻlgan ikkita tirgak yasadilar.

²³Chodirning janub tomonidagi devor uchun yigirmata rom yasadilar.

²⁴Bu romlar ostiga qoʻyish uchun kumushdan qirqta taglik — har bir rom uchun ikkitadan taglik qildilar, har bir tirgak ostida bitta taglik boʻldi.

²⁵Chodirning shimol tomonidagi devori uchun yigirmata rom yasadilar.

²⁶Har bir rom ostiga qoʻyish uchun ikkitadan, jami qirqta kumush taglik yasadilar.

²⁷Chodirning orqadagi — gʻarb tomonidagi devor uchun oltita rom,

²⁸Chodirning orqasida burchaklar hosil qilish uchun har ikki tomoniga yana bittadan rom yasadilar.

²⁹Bu ikkala romni pastdan va yuqoridan tutashgan devordagi oxirgi romga birlashtirdilar. Bitta burchak hosil qilishi uchun bitta halqa bilan yaxlit qilib birlashtirdilar. Har ikkala burchak shu yoʻl bilan hosil qilindi.

³⁰Shunday qilib, oʻn oltita kumush taglikka tayangan sakkizta romdan orqadagi devor qilindi, har bir rom ostiga qoʻyish uchun ikkitadan taglik yasaldi.

³¹Muqaddas chodirning janub tomonidagi romlarni ushlab turish uchun akas yogʻochidan beshta tamba,

³²shimol tomonidagi romlarni ushlab turish uchun ham beshta tamba, orqa tomoni — gʻarb tomonidagi romlarni ushlab turish uchun ham beshta tamba yasadilar.

³³Romlarning yarmigacha oʻrnashtirilgan oʻrtadagi tambalar Chodirning boshidan oxirigacha choʻzildi.

³⁴Romlarni oltin bilan qopladilar, tambalarni ushlab turadigan oltin halqalarni romlarga birlashtirdilar[241], tambalarni ham oltin bilan qopladilar.

³⁵Mayin zigʻir matosidan ichki pardani[242] tikdilar. Pardaga koʻk, safsar va qirmizi iplar bilan karublar tasvirini mahorat bilan solib, uni bezatdilar.

³⁶Ichki parda ushlab turilishi uchun akas yogʻochidan toʻrtta ustun yasadilar. Ustunlarga oltin qoplab, ularga oltin ilgaklarni mahkamladilar. Ustunlar uchun eritilgan kumushdan toʻrtta taglik yasadilar.

³⁷Chodirga kirish joyi uchun mayin zigʻir matosidan pardani tikdilar. Parda ustiga koʻk, safsar va qirmizi iplardan mahorat bilan naqsh soldilar.

³⁸Bu parda ushlab turilishi uchun beshta ustun yasadilar. Ustunlarning tepasini va halqalarini oltin bilan qopladilar. Ustunlarning beshta tagligini esa bronzadan qildilar.