Read Uzbek Muqaddas Kitob Chiqish 39 Bible Online

Chiqish 39 - Uzbek Muqaddas Kitob bible

Chiqish 39

¹Ular koʻk, safsar va qirmizi iplardan Muqaddas xonada xizmat qilganda kiyish uchun ruhoniylarga liboslarni ajoyib qilib tikdilar. Horunga muqaddas ruhoniylik liboslari tikishdi. Hammasini Egamiz Musoga amr etganday qildilar.

²Ular efodni[273] mayin zigʻir matosidan tikib, ustiga koʻk, safsar, qirmizi va zar iplardan naqsh soldilar.

³Oltinni yupqa qilib yoyib, ingichka — ingichka qilib kesib, zar ip qilishdi. Ular oʻz mahoratlarini ishga solib koʻk, safsar, qirmizi iplardan naqsh solingan mayin zigʻir matosini bu zar ip bilan bezatdilar.

⁴Efodning old va orqa qismlarini bir — biriga bogʻlash uchun ikkita yelka bogʻichini qilib, ularni old va orqa qismlarining ustki chetiga tikdilar.

⁵Kamar yasab, uni efodga bogʻladilar. Kamarni ham mayin zigʻir matosidan qildilar. Unga koʻk, safsar, qirmizi va zar iplardan mahorat bilan naqsh soldilar. Hammasini Egamiz Musoga amr etganday qildilar.

⁶Keyin muhr oʻyganday qilib, Isroil oʻgʻillarining ismini ikkita aqiq toshga oʻyib yozdilar. Yozilgan toshlarni oltindan qilingan naqshli uyalar ichiga qoʻyib,

⁷Isroilning oʻn ikki qabilasini eslatib turish uchun efodning yelka bogʻichlariga oʻrnashtirdilar. Hammasini Egamiz Musoga amr etganday qildilar.

⁸Ular koʻkrakpechni[274] yasadilar. Koʻkrakpechni, efod singari, mayin zigʻir matosidan qilib, koʻk, safsar, qirmizi va zar iplardan unga mahorat bilan naqsh soldilar.

⁹Koʻkrakpechni toʻrtburchak xalta shaklida, ikki buklangan, boʻyi bir qarich, eniga ham bir qarich qilib yasadilar.

¹⁰Koʻkrakpechga toʻrt qator toshni[275] toʻgʻri qilib terdilar: qizil yoqut, xrizolit va zumrad toshlarni birinchi qatorga terdilar.

¹¹Ikkinchi qatorga firuza, zangori yoqut va olmosni terdilar.

¹²Uchinchi qatorga lojuvard, agat va ametist toshlarni terdilar.

¹³Toʻrtinchi qatorga topaz, aqiq va yashma toshlarni terdilar. Hamma toshlarni oltindan qilingan naqshli uyalarga oʻrnashtirdilar.

¹⁴Bu oʻn ikki tosh Isroilning oʻn ikki qabilasini eslatib turardi. Muhr oʻyganday qilib, Isroilning oʻn ikki oʻgʻlidan har birining ismini bu toshlarning har biriga oʻyib yozdilar.

¹⁵Ular koʻkrakpechni efodga bogʻlash uchun toza oltindan ipga oʻxshatib eshilgan ikkita zanjir yasadilar.

¹⁶Yana naqshli ikkita oltin uya va ikkita oltin halqa yasab, ikkala halqani koʻkrakpechning ustki burchaklariga mahkamladilar.

¹⁷Ikkala oltin zanjirning bir uchini koʻkrakpechdagi halqalarga bogʻlab,

¹⁸ikkinchi uchini naqshli oltin uyalarga mahkamladilar. Uyalarni efodning old tomonidagi yelka bogʻichlariga oʻrnashtirdilar.

¹⁹Yana oltindan toʻrtta halqa yasadilar. Ikkitasini koʻkrakpechning ostki burchaklariga — efodga yaqin boʻlgan ichki qirgʻogʻiga mahkamladilar. Ikkitasini efodning old tomoniga, ikkala yelka bogʻichining pastiga — naqshli kamardan yuqoriga mahkamladilar.

²¹Koʻkrakpech efodning naqshli kamaridan yuqorida boʻlsin, efoddan osilib turmasligi uchun koʻkrakpechni halqalari yordamida efodning halqalariga koʻk bogʻich bilan mahkamladilar. Hammasini Egamiz Musoga amr etganday qildilar.

²²Efodning ridosini[276] koʻk iplardan toʻqilgan matodan tikdilar.

²³Ridoning oʻrtasidan bosh sigʻadigan teshik qildilar. Rido yirtilib ketmasligi uchun teshikning chetini toʻqidilar.

²⁴Rido etagining uchiga aylanasi boʻylab anor[277] shaklini va qoʻngʻiroqchalarni birin — ketin qilib bittama — bitta osib chiqdilar. Anor shakli yigirilgan koʻk, safsar va qirmizi iplardan qilingan edi. Qoʻngʻiroqchalar toza oltindan qilingan boʻlib, anor shakli oralariga osilgan edi. Horun oliy ruhoniy boʻlib xizmat qilganda, u shu ridoni kiyishi kerak edi. Hammasini Egamiz Musoga amr etganday qildilar.

²⁷Horun bilan uning oʻgʻillariga mayin zigʻir matosidan koʻylaklarni,

²⁸sallani, peshanabogʻlarni va ishtonlarni qildilar.

²⁹Belbogʻini mayin zigʻir matosidan toʻqib, ustiga koʻk, safsar va qirmizi iplardan mahorat bilan naqsh soldilar. Hammasini Egamiz Musoga amr etganday qildilar.

³⁰Toza oltindan lavhani — muqaddaslik ramzini yasadilar. Lavhaning yuzasiga muhr oʻyganday, “Egamizga bagʻishlangan” deb oʻyib yozdilar.

³¹Lavhani sallaga mahkamlash uchun koʻk bogʻichni lavhaga bogʻlab qoʻydilar. Hammasini Egamiz Musoga amr etganday qildilar.

³²Shunday qilib, Uchrashuv chodiri — Muqaddas chodir yasalishiga oid hamma ishlar nihoyasiga yetdi. Isroil xalqi hammasini Egamiz Musoga amr etganday qildilar.

³³Keyin Musoning oldiga quyidagilardan iborat Muqaddas chodirni olib keldilar: Chodirning ichki qavatini va uning hamma qismlarini — ilgaklarini, romlarini, tambalarini, ustunlari va tagliklarini,

³⁴qizilga boʻyalgan qoʻchqor terisidan yopinchiqni, yumshoq teridan[278] yopinchiq va Eng muqaddas xonani toʻsib turadigan ichki pardani,

³⁵Ahd sandigʻini[279], uning xodalari va qopqogʻini,

³⁶xontaxtani, uning hamma buyumlarini va unga qoʻyiladigan muqaddas nonlarni[280],

³⁷toza oltindan qilingan chiroqpoya, unga oʻrnatilgan moychiroqlarni, uning hamma buyumlarini va moychiroqlar uchun zaytun moyini,

³⁸oltin tutatqi qurbongohini, muqaddas qiladigan moy[281] va xushboʻy tutatqini, Chodirga kiraverishdagi pardani,

³⁹bronza qurbongohni, uning bronza panjarasini, xodalari va hamma buyumlarini, qoʻlyuvgichni va uning tagligini,

⁴⁰hovlini toʻsib turadigan pardalarni, pardalarni ushlab turadigan ustunlarni, ustunlarning tagliklarini va hovliga kiraverishdagi pardani, Chodir va hovli uchun arqonlarni, qoziqlarni, Muqaddas chodir — Uchrashuv chodirida foydalanadigan hamma ashyolarni,

⁴¹Ruhoniy Horun va uning oʻgʻillari Muqaddas xonada xizmat qilganda kiyadigan, ajoyib qilib tikilgan muqaddas liboslarni.

⁴²Xullas, Isroil xalqi hammasini Egamiz Musoga amr etganday qildilar.

⁴³Muso qilingan hamma ishlarni koʻzdan kechirdi, Isroil xalqi bu ishlarni Egamizning amri boʻyicha qilganlarini koʻrib, Muso ularni duo qildi.