Read Uzbek Muqaddas Kitob Chiqish 5 Bible Online

Chiqish 5 - Uzbek Muqaddas Kitob bible

Chiqish 5

¹Shundan keyin Muso bilan Horun fir’avn huzuriga borib, unga shunday dedilar: — Isroil xalqining Xudosi — Egamiz shunday aytmoqda: “Xalqimga ijozat ber, ular sahro ichkarisiga borib, Menga atab bayram nishonlashsin.”

²Fir’avn esa: — Egangiz kim oʻzi?! Uning soʻziga kirib Men Isroil xalqini qoʻyib yuboraymi?! — dedi. — Egangizni tanimayman, Isroil xalqining ketishiga esa ijozat bermayman.

³Shunda Muso bilan Horun: — Ibroniylarning Xudosi bizga Oʻzini zohir qildi, — deb javob berishdi. — Ijozat bering, sahroda uch kun yoʻl yurib borib, Egamiz Xudoga qurbonliklar keltiraylik. Aks holda, U bizni yo oʻlatga mubtalo qiladi, yoki qilichning damiga roʻpara qilib jazolaydi.

⁴Lekin Misr fir’avni: — Ey Muso! Ey Horun! Nimaga xalqni ishdan qoldiryapsizlar?! — dedi. — Boringlar, ishlaringizni qilinglar!

⁵Qaranglar, bu yerda qancha qarollar[24] bor — a! Sizlar boʻlsa, ularni chalgʻitib, ishdan qoʻymoqchisizlar!

⁶Oʻsha kuni fir’avn Isroil xalqining tepasida turgan Misrlik nazoratchilarga va Isroil xalqidan boʻlgan ishboshilarga shunday farmon berdi:

⁷“Isroil xalqiga gʻisht quygani endi oldingiday somon bermanglar. Oʻzlari yurib somon yigʻishsin.

⁸Oldin qancha gʻisht quyishgan boʻlsa, bundan keyin ham shuncha gʻisht quyishga majbur qilinglar. Gʻisht quyish miqdorini hech ham kamaytirmanglar. Ular dangasa xalq. Shuning uchun ular, ijozat bering, borib, Xudoyimizga qurbonliklar keltiraylik, deb nola qilishyapti.

⁹Ularni shunaqangi ishlatinglarki, ish bilan qattiq band boʻlib, behuda gaplarga quloq solishmasin[25].”

¹⁰Shunday qilib, Isroil xalqining tepasida turgan Misrlik nazoratchilar bilan Isroil xalqidan boʻlgan ishboshilar borib, Isroil xalqiga aytdilar: — Fir’avn shunday demoqda: “Sizlarga endi somon bermayman.

¹¹Boringlar! Qayerdan boʻlsa ham oʻzlaringiz somon topinglar. Lekin quyayotgan gʻishtingizning miqdori aslo kamaymasin.”

¹²Isroil xalqi somon oʻrniga xas — choʻp yigʻish uchun butun Misr yurti boʻylab tarqalib ketdi.

¹³Nazoratchilar esa ularni siquvga olar edilar. “Kundalik ishlaringizni somon berilgan kunlardagiday kamaytirmasdan bajaringlar”, deb aytardilar.

¹⁴Fir’avnning nazoratchilari oʻzlari xizmatga tayinlagan Isroil xalqi ishboshilarini kaltaklab: “Nimaga kecha ham, bugun ham, oldingiday, belgilangan miqdordagi gʻishtni quymayapsizlar?” deb talab qilardilar.

¹⁵Shundan soʻng Isroil xalqining ishboshilari fir’avn huzuriga borib, faryod qildilar: — Nimaga biz, qullaringizga, bunday muomala qilyapsiz?

¹⁶Bizga somon berishmaydi — yu, “Gʻisht quyinglar!” deb buyruq qilishadi. Biz kaltak ostida qoldik — ku! Aybdor esa sizning odamlaringiz.

¹⁷Fir’avn esa: — Dangasasizlar, dangasa! — deya javob berdi. — Shuning uchun: “Ijozat ber, borib, Egamizga qurbonliklar keltiraylik”, deyaverasizlar.

¹⁸Boringlar, ishlanglar! Sizlarga somon berilmaydi. Lekin belgilangan miqdordagi gʻishtni quyasizlar.

¹⁹Shunda Isroil xalqining ishboshilari: “Kunda belgilangan gʻisht miqdorini kamaytirmasdan quyasizlar!” degan gapni eshitib, qiyin ahvolda qolganlarini tushundilar.

²⁰Ular fir’avn huzuridan chiqishlari bilan, Muso bilan Horunga duch kelishdi. Ikkovi ularni kutib turgan edi.

²¹Isroil xalqi ishboshilari: — Sizlar bizni fir’avnga, uning a’yonlariga yomon koʻrsatib qoʻydingizlar, — deyishdi. — Bizni oʻldirishiga sabab topib berdingiz. Egamiz qilmishlaringizni koʻrib, jazoingizni bersin!

²²Shundan keyin Muso ularning oldidan ketib, Egamizga iltijo qildi: — Yo Rabbiy! Nimaga bu xalqni shunchalik kulfatga qoʻyding? Nimaga meni yubording?

²³Fir’avnga Sening xabaringni olib kelishim bilanoq, u xalqingga battar vahshiylik qila boshladi. Sen esa Oʻzingning xalqingni ozod qilmading.