Read Uzbek Muqaddas Kitob Ayub 11 Bible Online

Ayub 11 - Uzbek Muqaddas Kitob bible

Ayub 11

¹Keyin Namaxlik[32] Zoʻfar shunday dedi:

²“Shuncha koʻp gap javobsiz qolaveradimi? Koʻp gapirgan inson oqlanar ekanmi?

³Bekorchi gaplaring boshqalarning ovozini oʻchirib qoʻydimi? Nahotki mazax qilib aytgan gaplaring uchun hech kim seni uyaltirmasa?

⁴Sen: «Men haqman, bunga ishonchim komil, Oʻzim ham Xudoning nazarida pokman», deb aytasan.

⁵Qani endi, Xudo gapirsa, Uning Oʻzi senga qarshi ogʻiz ochsa edi.

⁶Qani endi, U senga donolikning sirlarini bildirsa edi. Axir, haqiqiy donolik koʻp qirrali — ku! Bilib qoʻy, Xudo seni oʻz gunohlaringga yarasha jazolagani yoʻq, Jazoni ancha kam beryapti.

⁷Xoʻsh, Xudoning sirlarini anglay olasanmi?! Qodir Xudoning komilligini bila olasanmi?!

⁸Xudoning donoligi osmondan ham yuksakdir, Sen nima qila olarding?! Xudoning donoligi oʻliklar diyoridan[33] ham chuqurroqdir, Sen nimani bila olarding?!

⁹Uning oʻlchami yer tevaragidan ham uzunroq, Dengizdan ham kengroqdir.

¹⁰Xudo kelib, seni qamoqqa tashlasa, Yoki hammani hukmga yigʻsa, Kim Uni toʻxtata olardi?

¹¹Albatta U yolgʻonchilarni biladi, Yovuzlikni koʻrganda, e’tiborga oladi — ku!

¹²Asov eshakdan odam tugʻilmaganday, Nodon[34] ham donolikka erisha olmaydi.

¹³Oʻz yuragingni Xudoga bagʻishla, Ibodat qilib, qoʻllaringni U tomon choʻzgin.

¹⁴Qoʻllaring gunohdan bulgʻangan boʻlsa, poklagin, Chodiringda yovuzlikka joy bermagin.

¹⁵Shunda sen uyalmasdan boshingni tik koʻtarib yurasan. Qoʻrquvdan xoli boʻlib, barqaror turasan.

¹⁶Qaygʻularingni esdan chiqarasan, Ular oqib ketgan suvlarday boʻlib qoladi.

¹⁷Hayoting kunduzgi nurday yorugʻ boʻladi, Har qanday zulmat tongday boʻlib qoladi.

¹⁸Umiding borligi uchun ishonching komil boʻladi, Atrofingda himoyang boʻlib, tinchlikda orom olasan.

¹⁹Yotganingda hech kimdan qoʻrqmaydigan boʻlasan, Hamma sendan marhamat istab keladi.

²⁰Fosiqlarning koʻz nuri soʻnadi, Ular qochishga yoʻl topolmaydilar, Oʻlib qutulamiz, deb umid qiladilar.”