Read Uzbek Muqaddas Kitob Ayub 12 Bible Online

Ayub 12 - Uzbek Muqaddas Kitob bible

Ayub 12

¹Ayub shunday deb javob berdi:

²“Ha, sizlar hammaning oʻrniga gapirasizlar, toʻgʻrimi? Oʻlsangiz, donolik ham siz bilan birga oʻlsa kerak — a?!

³Men ham bir — ikkita narsa bilaman, Sizlar mendan ustun emassizlar. Sizlar aytayotganlarni kim ham bilmas ekan?!

⁴Men Xudoga iltijolar qilyapman. Uning javob berishini kutyapman. Doʻstlarim esa ustimdan kulaveradilar. Solih va aybsiz boʻlsam ham, hammaga mazax boʻlib qoldim.

⁵Betashvish yurganlar kulfatga takabburlik bilan qaraydilar. Falokatni qoqilayotganlarning taqdiri deb biladilar.

⁶Oʻgʻrilarning chodirida ham tinchlik hukmron, Xudoning gʻazabini keltiradiganlar ham xavf — xatarsiz yuribdi. Goʻyo ular «gah» desa, Xudo qoʻliga qoʻnadi![35]

⁷Mana, hayvonlardan soʻranglar, Ular sizlarga oʻrgatadilar. Osmondagi qushlardan soʻranglar, Ular sizlarga aytib beradilar.

⁸Yerdan soʻranglar, u sizlarga yoʻl — yoʻriq koʻrsatadi. Dengizdagi baliqlar sizlarga tushuntiradilar.

⁹Mana shu jonzotlarning orasida qaysi biri Hammasiga Egamiz sababchi ekanini bilmaydi?!

¹⁰Har bir jonivorning hayotiyu Insonlarning nafasi Uning qoʻlidadir.

¹¹Ogʻiz ovqatning ta’mini biladi. Xuddi shunday qilib, quloq ham eshitgan soʻzlarini sinab koʻrishi kerak — ku?!

¹²Aql — idrok uzoq umr koʻrgan odamlarda, Donolik keksalarda boʻladi.

¹³Lekin haqiqiy donolik va qudrat Xudodadir. Maslahat va aql — idrok Unga tegishlidir.

¹⁴Agar Xudo nimanidir buzsa, qayta qurib boʻlmaydi, Agar U qamab qoʻysa, hech kim qochib keta olmaydi.

¹⁵Agar U yomgʻirni ushlab tursa, yer choʻlga aylanadi. Suvlarni qoʻyib yuborsa, yer yuzini suv bosadi.

¹⁶Kuch va zafar Xudoga tegishli! Yolgʻonchiyu aldanganlar ham Uning qoʻlida!

¹⁷U maslahatchilarni qip — yalangʻoch qilib qoʻyadi, Hakamlarni ham aqldan ozdiradi.

¹⁸Xudo shohlarning ham toʻnlarini yechib tashlaydi. Ularni qul qilib, bellariga arqon bogʻlab qoʻyadi.

¹⁹Ruhoniylarni ham qip — yalangʻoch qilib qoʻyadi, Mustahkam oʻrnashganlarni Xudo agʻdarib tashlaydi.

²⁰Ishonchli maslahatchilarni tildan qoldiradi, Oqsoqollarni esa idrokidan mahrum qiladi.

²¹Shahzodalarning ustidan sharmandalik yogʻdiradi, Kuchlilarning qurol — aslahalarini tortib oladi.

²²Xudo zulmatning eng yashirin joylarini ochadi, Tim qorongʻiliklarni ham yoritadi.

²³Xalqlarni yuksaltiradi — yu, yana Oʻzi ularni halokatga duchor qiladi, Xalqlarni koʻpaytiradi — da, keyin ularni tarqatib yuboradi.

²⁴Yer yuzidagi yoʻlboshchilarni aql — zakovatdan mahrum qiladi, Ularni soʻqmoqsiz choʻllarda sargardon qilib qoʻyadi.

²⁵Nursiz bir qorongʻilikda ular paypaslanib yuradilar. Xudo ularni mast odamday qilib qoʻyadi, Ular dovdirab yuradigan boʻlib qoladilar.